លោកនាយករដ្ឋមន្ដ្រី ហ៊ុន សែន បានជំរុញទៅភាគីមីយ៉ាន់ម៉ាឲ្យបង្កើនទំហំពាណិជ្ជកម្មទ្វេភាគីដល់ចំនួន ១០លានដុល្លារសហរដ្ឋអាមេរិក។
គេហទំព័រហ្វេសប៊ុកផ្លូវការរបស់លោកនាយករដ្ឋមន្ដ្រី ហ៊ុន សែន ឲ្យដឹងថា នៅថ្ងៃនេះ លោក ហ៊ុន សែន បានជួបជាមួយលោកស្រី អង់សាន ស៊ូជី ទីប្រឹក្សានៃសាធារណរដ្ឋសហភាពមីយ៉ាន់ម៉ា ដែលកំពុងមកបំពេញទស្សនកិច្ចរយៈពេល ៣ថ្ងៃនៅប្រទេសកម្ពុជា ដែលចាប់ផ្ដើមពីថ្ងៃទី២៩ មេសា រហូតដល់ថ្ងៃទី១ ខែឧសភាស្អែកនេះ។
បើតាមហ្វេសប៊ុកផ្លូវការរបស់នាយករដ្ឋមន្ដ្រី ហ៊ុន សែន នៅក្នុងជំនួបនេះ លោក ហ៊ុន សែន បានស្នើឲ្យរដ្ឋាភិបាលមីយ៉ាន់ម៉ាបង្កើនទំហំពាណិជ្ជកម្មដល់ ១០លានដុល្លារសហរដ្ឋអាមេរិក។ ក្រៅពីនេះ លោក ហ៊ុន សែន ក៏ស្នើឲ្យមីយ៉ាន់ម៉ាត្រួតពិនិត្យលើបញ្ហាពន្ធ និងវិស័យដទៃទៀត ដើម្បីជំរុញកំណើនសេដ្ឋកិច្ចប្រទេសទាំងពីរ។
លោក ហ៊ុន សែន សរសេរលើហ្វេសប៊ុកថា៖ «រាល់កិច្ចការដែលបានលើកឡើងខាងលើនេះ លោកជំទាវ និងសម្ដេចតេជោបានឯកភាពគ្នា ជំរុញវិស័យសំខាន់ៗទាំងនេះ ហើយក៏បានផ្ដល់ការទុកចិត្ត និងឲ្យរដ្ឋមន្ត្រីដែលពាក់ព័ន្ធនៃប្រទេសទាំងពីរ ធ្វើការងារនោះជាបន្តបន្ទាប់ទៀត»។
បើតាមរបាយការណ៍របស់ក្រសួងពាណិជ្ជកម្ម ទំហំពាណិជ្ជកម្មទ្វេភាគីរវាងកម្ពុជា និងមីយ៉ាន់ម៉ា សម្រាប់រយៈពេល ៣ឆ្នាំចុងក្រោយនេះ គឺមានចំនួនជិត ២០លានដុល្លារប៉ុណ្ណោះ។
បើតាមរបាយការណ៍ក្រសួងពាណិជ្ជកម្មដដែល រយៈពេល៦ខែ ឆ្នាំ២០១៨ ទំហំពាណិជ្ជកម្មកម្ពុជា និងមីយ៉ាន់ម៉ា មានចំនួន ៤.៥៣លានដុល្លារ ក្នុងនោះកម្ពុជានាំចេញទៅមីយ៉ាន់ម៉ាចំនួន ៨៦ម៉ឺនដុល្លារ ខណៈមីយ៉ាន់ម៉ានាំចូលមកកម្ពុជាចំនួន ៣.៦៧លានដុល្លារអាមេរិក។
កម្ពុជា និងមីយ៉ាន់ម៉ា គឺប្រទេសដែលទទួលរងការព្រមានដកហូតប្រព័ន្ធអនុគ្រោះពន្ធពីសហភាពអឺរ៉ុប ជុំវិញការចោទប្រកាន់រឿងបញ្ហារំលោភសិទ្ធិមនុស្ស និងការធ្លាក់ចុះនៃលទ្ធិប្រជាធិបតេយ្យក្នុងប្រទេសទាំងពីរនេះ៕
