អាជ្ញាធរឧតុនិយមកម្ពុជា បានព្រមានទៅប្រជាពលរដ្ឋឲ្យប្រុងប្រយ័ត្នចំពោះគ្រោះថ្នាក់នៃបាតុភូមិធម្មជាតិ ចំពេលដែលកម្ពុជានឹងបន្ដទទួលរងបាតុភូតភ្លៀងធ្លាក់នៅមុនរដូវរស្សាមកដល់។
ក្នុងសេចក្ដីប្រកាសព័ត៌មាននៅថ្ងៃនេះ ក្រសួងធនធានទឹក និងឧតុនិយម បានឲ្យដឹងថា កម្ពុជានៅតែបន្ដស្ថិតក្នុងដំណាក់កាលអន្ដរកាល ឆ្លងពីរដូវប្រាំងចូលរដូវវស្សា។
ក្រសួងបន្ដថា ជ្រលងសម្ពាធទាបបានអូសបន្លាយមលើប្រទេសកម្ពុជា ស្របពេលចលនាខ្យល់បានប្ដូរទិសមករកភាពវិជ្ជមាន។
ដោយផ្អែកលើកត្ដាទាំងពីរនេះ ក្រសួងព្យាករថា ចាប់ពីថ្ងៃទី៦ ដល់ថ្ងៃទី១២ឧសភាខាងមុខនេះ សីតុណ្ហភាពអតិបរិមា គឺចន្លោះពី ៣៤ ទៅ ៣៧អង្សាសេ។ ម្យ៉ាងទៀត ក្រសួងក៏អំពាវនាវឲ្យប្រជាពលរដ្ឋប្រុងប្រយ័ត្នចំពោះបាតុភូតផ្គរ រន្ទះ និងខ្យល់កន្ដ្រាក់ ដោយថា ភ្លៀងនឹងបន្ដធ្លាក់ពីកម្រិតខ្សោយទៅបង្គួរ ហើយនៅតំបន់ខ្លះអាចមានភ្លៀងធ្លាក់ច្រើនផងដែរ។
ក្រសួងអះអាងថា បាតុភូតធម្មជាតិទាំងនេះ គឺកើតឡើងមុនពេលរដូវវស្សា ដែលនឹងមកដល់នៅសប្ដាហ៍ទី៣ ខែឧសភានេះ។
បើតាមរបាយការណ៍គណៈកម្មាធិការជាតិគ្រប់គ្រងគ្រោះមហន្តរាយ រយៈពេល ៤ខែ ដើមឆ្នាំ២០១៩នេះ យ៉ាងហោចមនុស្ស ១៦នាក់បានស្លាប់ និងជិត ៤០នាក់ទៀតបានទទួលរងរបួស បន្ទាប់ពីរងគ្រោះដោយសារខ្យល់កន្ដ្រាក់ និងរន្ទះបាញ់ ហើយផ្ទះសម្បែងប្រជាពលរដ្ឋប្រមាណ ៣ពាន់ខ្នង ព្រមទាំងខូចខាតដំណាំកសិកម្មផ្សេងៗទៀត៕
