ក្រសួងរៀបចំដែនដី នគរូបនីយកម្ម និងសំណង់ បានប្រកាសថា ខ្លួនទទួលបានបណ្ដឹងជម្លោះដីធ្លីជាង ១ម៉ឺនករណីនៅក្នុងរយៈពេល ៤ខែដើមឆ្នាំនេះ ហើយភាគច្រើននៃជម្លោះដីធ្លីទាំងនោះ ត្រូវបានដោះស្រាយបញ្ចប់រួចរាល់ហើយ។
ក្នុងសេចក្ដីប្រកាសព័ត៌មានមួយកាលពីថ្ងៃទី២ ខែឧសភាកន្លងមកថ្មីៗនេះ ក្រសួងរៀបចំដែនដី បានប្រកាសថា ខ្លួនចុះបញ្ជីដីធ្លីបានដល់ទៅ ៣ភាគ ៤ នៃចំនួនក្បាលដីសរុប ៧លានក្បាលដីនៅទូទាំងប្រទេសចាប់ពីដើមខែមករារហូតដល់ដំណាច់ខែមេសាកន្លងមកនេះ។
ក្រៅពីការងារចុះបញ្ជីដីធ្លីហើយនោះ ក្រសួងដដែលនេះ ក៏បានឲ្យដឹងផងដែរថា បណ្ដឹងវិវាទដីធ្លីដល់ទៅ ១ម៉ឺន ៧៨ករណី ត្រូវបានដាក់ទៅក្រសួង ហើយក្រសួងក៏បានដោះស្រាយវិវាទដីធ្លីបានដល់ទៅជាង ៨ពាន់ករណីឯណោះ។
ប៉ុន្តែ ក្រសួងបានបញ្ជាក់ទៀតថា វិវាទដីធ្លីដល់ទៅជាង ២ពាន់ករណីទៀត កំពុងតែស្ថិតនៅក្នុងដំណើរការដោះស្រាយនៅឡើយ។
របាយការណ៍សង្ខេបមួយរបស់ក្រសួងរៀបចំដែនដីចេញផ្សាយឆ្នាំ២០១៨កន្លងមកនេះ ឲ្យដឹងថា បញ្ហាវិវាទដីធ្លីទូទាំងប្រទេសនៅសល់ជិត ១៥០០ករណីទៀត នៅមិនទាន់ត្រូវបានដោះស្រាយចប់នៅឡើយទេ គិតត្រឹមចុងឆ្នាំកន្លងមកនេះ៕
