ប្រជាពលរដ្ឋរស់នៅស្រុកស្ទឹងហាវ ខេត្តព្រះសីហនុ ស្នើទៅតុលាការខេត្តនេះ ពន្លឿននីតិវិធីបើកសវនាការលើសំណុំរឿងដីធ្លីរបស់ពួកគេ រួមទាំងដីវត្តចំនួន៥ហិកតា ដែលពួកគេអះអាងថា អូសបន្លាយអស់រយៈពេលជិត៥ឆ្នាំមកហើយ។
លោក ម៉ន ស៊ីណា អះអាងជាតំណាងឱ្យប្រជាពលរដ្ឋចំនួន ១៤៩ គ្រួសារ រស់នៅភូមិឃុំអូរត្រេះ ប្រាប់ វី.អូ.ឌី នៅថ្ងៃនេះថា កាលពីឆ្នាំ២០១៥ ឈ្មោះ ហ៊ឹម សុវណ្ណារី បានទៅរំលោភយកដីរបស់ពួកគាត់ជាប្រជាពលរដ្ឋចំនួន ១៣០ ហិកតា និងដីវត្ត ៥ ហិកតា ដោយមិនបានផ្ដល់សំណងអ្វីទាំងអស់ដល់ពួកគេ។
លោក ថា៖ «ប្ដឹងសូមឱ្យតុលាការប្ដឹងលុបប័ណ្ណហ្នឹងចោល ព្រោះប័ណ្ណនៅសង្កាត់ផ្សេង ហើយមកយកដីពួកខ្ញុំវិញ។ បណ្ណកាន់កាប់ [ដីធ្លី] របស់គាត់នៅសង្កាត់លេខ ១ ប៉ុន្តែគាត់មកយកប្រើប្រាស់នៅស្ទឹងហាវ ។ អ៊ីចឹង សូមឱ្យតុលាការមោឃភាពបណ្ណ [កាន់កាប់ដីធ្លី] និងសកម្មភាពដែលគាត់ធ្វើហ្នឹង»។
លោកបន្តថា នៅឆ្នាំ២០១៦ ពួកគាត់បានដាក់ពាក្យបណ្ដឹងតុលាការ ដើម្បីទាមទារដីពីឈ្មោះ ហ៊ឹម សុវណ្ណារី ប៉ុន្តែ រហូតមកដល់ថ្ងៃនេះ តុលាការមិនទាន់បើកសវនាការដោយកោះហៅឈ្មោះ ហ៊ឹម សុវណ្ណារី មកឆ្លើយបំភ្លឺនៅឡើយ។
លោកថា៖ «ខ្ញុំសូមឱ្យតុលាការកោះហៅឈ្មោះ [ហ៊ឹម សុវណ្ណារី] ដើម្បីកាត់សេចក្ដី ដើម្បីឱ្យដឹងស ដឹងខ្មៅ ឱ្យលោកស្រី ហ៊ឹម សុវណ្ណារី គាត់ចូលខ្លួន មកតតាំងជាមួយគ្នាតាមផ្លូវច្បាប់ បើគាត់ឈ្នះ គាត់យកទៅ បើគាត់ចាញ់ គាត់សងប្រជាជនខ្ញុំទៅ»។
វី.អូ.ឌី មិនអាចសុំការបំភ្លឺពីអ្នកស្រី ហ៊ឹម សុវណ្ណារី ជុំវិញករណីនេះបានទេ ដោយទូរសព្ទមិនអាចទាក់ទងបាន។
ព្រះរាជអាជ្ញារងនៃសាលាដំបូងខេត្តព្រះសីហនុ លោក លឹម ប៊ុនហេង មានប្រសាសន៍ថា ករណីនេះ មិនស្ថិតនៅក្រោមសមត្ថកិច្ចរបស់លោកនោះទេ ដោយសារសំណុំរឿងនេះ ជារឿងរដ្ឋប្បវេណី ឱ្យទៅសួរអ្នកនាំពាក្យសាលាដំបូងវិញ។
លោកថា៖ «អាហ្នឹងរដ្ឋប្បវេណីទេ តេទៅអ្នកនាំពាក្យសាលាដំបូងទៅ»។
ចំណែកអ្នកនាំពាក្យសាលាដំបូងព្រះសីហនុ លោក យឹម ប៊ុណ្ណារ៉េត សុំមិនធ្វើអត្ថាធិប្បាយចំពោះរឿងនេះ ដោយរុញឱ្យទៅសួរព្រះរាជអាជ្ញារងវិញ។
មន្ត្រីសម្របសម្រួលសមាគមអាដហុកប្រចាំខេត្តព្រះសីហនុអ្នកស្រី ជៀប សុធារី មានប្រសាសន៍ថា ប្រជាពលរដ្ឋបានដាក់ពាក្យបណ្ដឹង ដើម្បីទាមទារដីពីឈ្មោះ ហ៊ឹម សុវណ្ណារី យូរហើយ ប៉ុន្តែ តុលាការមិនបើកសវនាការ ដោយថា ករណីនេះអាចជាប់ពាក់ព័ន្ធអ្នកមានអំណាច។ អ្នកស្រី បន្តថា ប្រជាពលរដ្ឋ១៤៩ គ្រួសារបានរស់នៅលើដីតាំងពីមុនច្បាប់ភូមិបាលចូលជាធរមានមកម៉្លេះ ហើយពួកគាត់សុទ្ធតែមានឯកសារកាន់កាប់ដីធ្លីត្រឹមត្រូវ។
អ្នកស្រីបន្តថា វិវាទដីធ្លីនេះ មានតែអាជ្ញាធរខេត្ត និងស្រុកទេ ទើបអាចដោះស្រាយបាន ដោយសារ ស្ថាប័នទាំងអស់នោះ ជាអ្នកចេញលិខិតកាន់កាប់ដីធ្លីឱ្យប្រជាពលរដ្ឋ១៤៩ គ្រួសាររស់នៅទីនោះផងដែរ។
អ្នកស្រីថា៖ «ប៉ុន្តែ យកឯកសារពីជំនាន់ចេញប្លង់ ហើយនិងឯកសារពីជំនាន់ដែលអាជ្ញាធរចេញលិខិតបញ្ជាក់ការកាន់កាប់ប្រើប្រាស់ដីធ្លីទៅប្រជាពរលរដ្ឋ ទទួលស្គាល់ការកាន់កាប់របស់ប្រជាពលរដ្ឋ ហើយនិងឯកសារបណ្ណភោគៈរបស់ភាគីម្ខាងទៀត។ អាហ្នឹង ងាយស្រួលជាទីបំផុត ប៉ុន្តែ ខ្ញុំមិនដឹងថា ម៉េចទេបានជាគេ [អាជ្ញាធរ] មិនព្រមធ្វើ»។
បើតាមលោក ម៉ន ស៊ីណា អះអាងថា ប្រជាពលរដ្ឋ ១៤៩ គ្រួសារបានទៅរស់នៅ និងកាន់កាប់ដី១៣៥ ហិកតា ស្ថិតនៅក្រុង៥ ភូមិ៤ ឃុំអូរត្រេះ ស្រុកស្ទឹងហាវ តាំងពីឆ្នាំ១៩៨៩មកម្លេះ៕
