រដ្ឋមន្រ្តីក្រសួងកសិកម្មកម្ពុជា បានលើកឡើងថា ដោយសារកិច្ចអន្តរាគមន៍កន្លងមករបស់រដ្ឋាភិបាលវៀតណាម បានជួយឲ្យស្រូវនៅកម្ពុជារក្សាបាននូវតម្លៃសមរម្យមួយ។
តាមការចុះផ្សាយលើទំព័រហ្វេសប៊ុករបស់ក្រសួងកសិកម្ម រុក្ខាប្រមាញ់ និងនេសាទ រដ្ឋមន្រ្តីកសិកម្មកម្ពុជានៅថ្ងៃនេះ បានជួបជាមួយឯកអគ្គរដ្ឋទូតវៀតណាម និងប្រធានសមាគមកសិករវៀតណាមថ្នាក់មជ្ឈឹម លោកស្រី បុយ ធីធឿម។ ជំនួបនោះមានគោលបំណងពង្រីង និងពង្រីកកិច្ចសហប្រតិបត្តិការរវាងប្រទេសទាំងពីរលើវិស័យកសិកម្ម និងបញ្ហាមួយចំនួនទៀត។
ក្នុងជំនួបនោះ លោក វេង សាខុន បានថ្លែងអំណរគុណដល់ភាគីវៀតណាមជួយឧបត្ថម្ភគាំទ្រដល់ការអភិវឌ្ឍប្រទេសកម្ពុជាដែលក្នុងនោះក៏មានវិស័យកសិកម្ម និងកសិពាណិជ្ជកម្មផងដែរ។ លោក ថ្លែងថា កិច្ចសហប្រតិបត្តិការលើវិស័យកសិកម្មរវាងប្រទេសទាំងពីរបានចូលរួមចំណែកធ្វើឱ្យវិស័យនេះមានការរីកចម្រើនគួរឲ្យមោទនភាព ពិសេសលើផលិតកម្មស្រូវ ដំណាំកសិឧស្សាហកម្ម និងការធ្វើកសិពាណិជ្ជកម្ម។
លោក វេង សាខុន ត្រូវបានដកស្រង់សម្តីថា៖ «ដោយសារកិច្ចសហប្រតិបត្តការ និងជាពិសេសកិច្ចអន្តរាគមន៍បានទាន់ពេលវេលាពីរដ្ឋាភិបាលវៀតណាមកន្លងមក បានធ្វើឲ្យស្រូវរក្សាតម្លៃបានសមរម្យ ម៉្យាងទៀត ការនាំចេញកសិផលកម្ពុជា ដូចជា ស្វាយ ដំឡូង ស្វាយចន្ទី ទៅកាន់ទីផ្សារវៀតណាមមានការកើនឡើងគួរឲ្យចាប់អារម្មណ៍។»
រដ្ឋមន្ត្រីកសិកម្មកម្ពុជា ក៏ជឿជាក់ថា ចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរកាន់តែត្រូវបានពង្រឹង និងពង្រីកទ្វេឡើងបន្ថែមទៀត ដើម្បីស្ថិរភាព សន្តិសុខ សេដ្ឋកិច្ច និងការអភិវឌ្ឍរបស់ប្រទេសទាំងពីរ៕
