ក្រុមហ៊ុនចិន ញូញៀន និងក្រុមហ៊ុនណាហ្គា ឧបត្ថម្ភ១លានដុល្លារដូចគ្នា ដល់កាកបាទក្រហមកម្ពុជា ក្នុងឱកាសប្រារព្ធខួប ១៥៦ នៃកាកបាទក្រហមកម្ពុជា។
លោកនាយករដ្ឋមន្ត្រី និងភរិយា បានចូលរួមប្រារព្ធខួប១៥៦ នៃទិវាពិភពលោកកាកបាទក្រហមដែលធ្វើនៅរាជធានីភ្នំពេញនាថ្ងៃពុធម្សិលមិញ។
ក្នុងពិធីនេះ មានតំណាងក្រុមហ៊ុន មន្ត្រីជាន់ខ្ពស់របស់រដ្ឋាភិបាលបានបរិច្ចាគថវិកាដល់កាកបាទក្រហមកម្ពុជា ក្នុងនោះអ្នកដែលចូលចាប់ពី១០០ដុល្លារ ៥០ម៉ឺនដុល្លារ រហូតដល់ជាង១លានដុល្លារ។
តាមអ្នកធ្វើអត្ថាធិប្បាយក្នុងកម្មវិធី ក្រុមហ៊ុនចិន ញូញៀន ដែលទទួលបានដីសម្បទាននៅខេត្តកោះកុងឧបត្ថម្ភកាកបាទក្រហម១លានដុល្លារ។ បច្ចុប្បន្ន ពលរដ្ឋនៅកោះកុងដែលរងផលប៉ះពាល់ពីក្រុមហ៊ុន ញូញៀន នេះ កំពុងធ្វើសកម្មភាពតវ៉ាទាំងនៅកោះកុង និងភ្នំពេញ។
ដូចគ្នានេះដែរ ក្រុមហ៊ុន ណាហ្គា ជាកន្លែងបើកឲ្យលេងល្បែងនៅភ្នំពេញ បានឧបត្ថម្ភ១លានដុល្លារដូចគ្នា ដល់កាកបាទក្រហមកម្ពុជា។
ដោយឡែក ក្រុមដែលឧបត្ថម្ភប្រាក់ច្រើនជាងគេក្នុងចំណោមអ្នកបរិច្ចាគ គឺក្រុមហ៊ុនបុរីពិភពថ្មី គ្រឹះស្ថានមីក្រូហិរញ្ញវត្ថុពិភពថ្មី របស់លោកឧកញ៉ា ហុង ពីវ។
លោកនាយករដ្ឋមន្ត្រី ហ៊ុន សែន និងភរិយា បានឈរចាំទទួលថវិការបស់សប្បុរសជនដែលបានចូលរួមបរិច្ចាគនេះ ។
ថ្លែងមុនទទួលប្រាក់ឧបត្ថម្ភ នាយករដ្ឋមន្ត្រី ជំរុញឲ្យលើកកម្ពស់វប្បធម៌ចែករំលែកនេះ នូវអ្វីដែលលោកថា ដើម្បីជួយដល់ប្រជាពលរដ្ឋដែលក្រីក្រងាយរងគ្រោះ។
មេដឹកនាំរូបនេះក៏បានសរសេរលើហ្វេសប៊ុករបស់លោកថា ថវិកាសរុបបឋមដែលទទួលបានពីសប្បុរសជនបានចូលរួមវិភាគទានក្នុងវិស័យមនុស្សធម៌នៃកាកបាទក្រហមកម្ពុជាសម្រាប់ឆ្នាំ២០១៩ មានចំនួនជាង២០លានដុល្លារ (២០,៧៥៧,៥១០ )។
