រដ្ឋមន្ត្រីក្រសួងមហាផ្ទៃ លោក ស ខេង រំឭកថា កាកបាទក្រហមជាអង្គការអព្យាក្រឹត មិនមែនជាអង្គការនយោបាយទេ លោកថា ដូចនេះ ការងារជួយជនងាយរងគ្រោះ ត្រូវធ្វើឡើងជាទូទៅ មិនត្រូវរើសអើងគណបក្សនយោបាយណាមួយឡើយ។
ក្នុងពិធីអបអរទិវាពិភពលោកកាកបាទក្រហម នៅខេត្តព្រៃវែង នាថ្ងៃព្រហស្បតិ៍នេះ លោក ស ខេង ថ្លែងថា កម្ពុជាជាប្រទេសប្រកាន់ប្រជាធិបតេយ្យ សេរីពហុបក្ស ដូចនេះ ការជួយសង្គ្រោះពលរដ្ឋដែលងាយរងគ្រោះមិនត្រូវប្រកាន់និន្នាការនយោយនោះទេ។
លោកថា៖ «កាកបាទក្រហម គឺជាអង្គការអព្យាក្រឹត្យមួយ មិនមែនជាអង្គការនយោបាយទេ។ ជាយន្តការសាធារណមួយ។ អ៊ីចឹង ប្រជាពលរដ្ឋយើងមិនត្រូវរើសអើងទេ នេះពណ៌ខៀវ នេះពណ៌ស នេះពណ៌ក្រហមទេ។ អានេះ បក្សនេះ អានេះ បក្សនោះទេ។ គឺប្រជាពលរដ្ឋ គឺប្រជាពលរដ្ឋ បានន័យថា ប្រជាពលរដ្ឋទាំងអស់ជាមុខសញ្ញាដែលយើងត្រូវជួយទាំងអស់ ដែលកន្លងទៅយើងធ្វើបែបនេះ។ អ៊ីចឹងហើយ! សុំឲ្យធ្វើបែបនេះតទៅទៀត»។
ក្រៅពីនេះ លោក ស ខេង ក៏បានក្រើនរំឭកកាកបាទក្រហមនៅខេត្តព្រៃវែង ឲ្យពង្រឹងប្រសិទ្ធិភាពនៃការប្រើប្រាស់ថវិកាសប្បុរសជននេះ ឲ្យមានតម្លាភាព និងគណនេយ្យភាពផងដែរ ដោយថា ដើម្បីផ្តល់ទំនុកចិត្តដល់អ្នកដែលបានស្ម័គ្រចិត្តបរិច្ចាគ។
កាលពីថ្ងៃពុធម្សិលមិញ លោកនាយករដ្ឋមន្ត្រី ហ៊ុន សែន និងភរិយា ក៏បានចូលរួមប្រារព្ធទិវាកាកបាទក្រហមនេះដូចគ្នានៅរាជធានីភ្នំពេញ។ ពិធីនេះ ប្រមូលថវិកាបានពីសប្បុរសជនជាង២០លានដុល្លារ ដែលក្នុងនោះក្រុមហ៊ុនឯកជនខ្លះឧបត្ថម្ភប្រាក់ ដល់ទៅជាង១លានដុល្លារ ។
