មន្ត្រីក្រសួងមហាផ្ទៃបានថ្លែងកាលពីថ្ងៃព្រហស្បតិ៍ថា ស្ត្រីពរពោះជំនួស១១នាក់ ដែលត្រូវឃុំខ្លួននៅពន្ធនាគារទាំងពេលកំពុងមានផ្ទៃពោះកាលពីខែវិច្ឆិកានោះ ត្រូវបានដោះលែងឲ្យនៅក្រៅឃុំបណ្តោះអាសន្ន។
លោក នុត សាវណា អ្នកនាំពាក្យអគ្គនាយកដ្ឋានពន្ធនាគារ ក្រសួងមហាផ្ទៃបានប្រាប់ VOD ថា ស្ត្រីពរពោះទាំង ១១នាក់នេះ ត្រូវបានដោះលែងហើយ បន្ទាប់ពីយល់ព្រមទុក និងចិញ្ចឹមកូនៗដោយខ្លួនឯង។
លោក សាវណា បាននិយយាថា៖ «ពួកគាត់សន្យា ថានឹងចិញ្ចឹមទារកទាំងនេះ ដូច្នេះនៅពេលនេះ ពួកគាត់មិនស្ថិតក្នុងពន្ធនាគារទៀតទេ។ ខ្ញុំមិនដឹងព័ត៌មានលម្អិតបន្ថែមទៀតទេ»។
លោក ខ្លូត តារា ប្រធានមណ្ឌលអប់រំកែប្រែ«ម២» បានមានប្រសាសន៍ថា ស្ត្រីទាំង១១នាក់នេះ ត្រូវបានដោះលែងនៅមុនចូលឆ្នាំខ្មែរកាលពីខែមេសា។
លោក តារា មានប្រសាសន៍ថា ស្ត្រីបីនាក់ក្នុងចំណោមនោះ បានសម្រាលកូននៅមជ្ឈមណ្ឌលជាតិគាំពារមាតា និងទារក អំឡុងពេលឃុំខ្លួន។
សមត្ថកិច្ចបានឃាត់ខ្លួនស្ត្រីទាំងនេះកាលពីខែវិច្ឆិកា នៅខណ្ឌសែន សុខ ក្រុងភ្នំពេញ ជាផ្នែកនៃការបន្តបង្ក្រាបលើករណីពរពោះជំនួសដោយខុសច្បាប់ក្នុងប្រទេសកម្ពុជា។
កាលពីប្រាំខែមុនករណីនេះ ស្រ្តីពរពោះជាង៣០នាក់ត្រូវបានឃាត់ខ្លួន និងចោទប្រកាន់ពីបទជួញដូរមនុស្សជុំវិញការពរពោះបង្កើតកូនឲ្យជនជាតិចិន។ ពួកគេប្រឈមនឹងការជាប់ពន្ធនាគាររហូតដល់២០ឆ្នាំ ប៉ុន្តែ ត្រូវបានដោះលែងវិញកាលពីខែធ្នូ បន្ទាប់ពីយល់ព្រមរក្សាទុកទារកទាំងនេះ។
គេនៅមិនទាន់ច្បាស់ថា តើឪពុកម្តាយដែលឲ្យគេពរពោះជំនួសមកពីប្រទេសប្រទេសណាទេ នៅក្នុងករណីស្ត្រីពរពោះទាំង១១នាក់នាពេលថ្មីៗនេះ។
រដ្ឋាភិបាលបានហាមឃាត់ការពរពោះជំនួសកាលពីឆ្នាំ២០១៦ រយៈពេលមួយឆ្នាំបន្ទាប់ពីប្រទេសថៃបានចាត់ទុកទង្វើបែបនេះថា ជារឿងខុសច្បាប់ ហើយបានធ្វើឲ្យជំនួញដ៏ចម្រូងចម្រាស និងរីករាលដាលយ៉ាងឆាប់រហ័សនេះ ងាកមករកប្រទេសកម្ពុជាវិញ។
មកទល់ពេលនេះ ករណីពរពោះជំនួសដែលត្រូវជម្រះក្តីនៅតុលាការត្រូវបានអនុវត្តតាមច្បាប់ប្រឆាំងការជួញដូរមនុស្ស ហើយថា វាគឺជាករណីដំបូងដែលពាក់ព័ន្ធនឹងអន្តរការីជនជាតិអូស្ត្រាលី ឈ្មោះ ថាមមី ដេវីស ឆាល (Tammy Davis Charles) កាលពីឆ្នាំ២០១៦។ ទោះបីជាយ៉ាងណា ដើម្បីគ្រប់គ្រងការអនុវត្តនេះឲ្យចំគោលដៅ ក្រសួងកិច្ចការនារីបាន និងកំពុងធ្វើការងារ ដើម្បីបង្កើតច្បាប់ពរពោះជំនួស។
លោក ផុន ពុទ្ធបុរី អ្នកនាំពាក្យក្រសួងកិច្ចការនារី បានមានប្រាសាសន៍ថា ករណីពរពោះជំនួសដោយខុសច្បាប់នាពេលថ្មីៗនេះ បានបង្កជាឧបសគ្គដល់ការរៀបចំបង្កើតច្បាប់នេះ។
លោក ពុទ្ធបុរី មានប្រសាសន៍ថា៖ «តាមពិត យើងបានបញ្ចប់សេចក្តីព្រាងច្បាប់ពរពោះជំនួសដំបូងរបស់យើងហើយកាលពីឆ្នាំមុន អំឡុងខែកក្កដា ប៉ុន្តែ បន្ទាប់ពីមានពីរករណីថ្មីនេះកើតឡើង យើងមិនសប្បាយចិត្តនឹងរឿងនេះ។ យើងត្រូវថយក្រោយមួយជំហាន ដើម្បីពិនិត្យមើលឡើងវិញថា តើយើងបានបញ្ចូលគ្រប់ចំណុចហើយឬនៅ»។
លោកបន្តថា៖ «និយាយតាមត្រង់ទៅ ខ្ញុំមិនប្រាកដថា ច្បាប់ពរពោះជំនួសនេះនឹងបញ្ចប់នៅពេលណាទេ។ យើងមិនចង់ឲ្យស្ត្រីរបស់យើងក្លាយជាអ្នកផលិតកូននោះទេ»។
លោក ពុទ្ធបុរី បានបន្ថែមថា លោកមិនបានដឹងព័ត៌មានលម្អិតជាក់លាក់អំពីករណីថ្មីបំផុតទាក់ទិននឹងស្ត្រីពរពោះជំនួស១១នាក់នេះទេ។
លោកស្រី ជូ ប៊ុនអេង ជាអនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស មិនអាចទាក់ទងសុំការអត្ថាធិប្បាយបានទេ៕
