ការិយាល័យហិរញ្ញវត្ថុកម្ពុជា ឲ្យដឹងថា ក្នុងរយៈ៣ខែដើមឆ្នាំ២០១៩នេះ ពលរដ្ឋកម្ពុជាខ្ចីប្រាក់ជាង៦ពាន់លានដុល្លារអាមេរិក ក្នុងនោះជាងពាក់កណ្ដាលយកទៅទិញសម្ភារផ្ទាល់ខ្លួន និងបើកអាជីវកម្ម។
ក្នុងរបាយការណ៍ប្រចាំត្រីមាសទី១ ឆ្នាំ២០១៩ ការិយាល័យឥណទានកម្ពុជា ហៅកាត់ថា CBC ឲ្យដឹងថា គិតត្រឹមខែមីនា ឆ្នាំ២០១៩ ពលរដ្ឋកម្ពុជាប្រមាណ ១លាន ៥សែននាក់ បានខ្ចីលុយពីធនាគារ និងស្ថាប័នមីក្រូហិរញ្ញវត្ថុ ដែលមានទំហំសាច់ប្រាក់ប្រមាណ ៦ពាន់ ៧រយលានដុល្លារអាមេរិក កើនឡើងប្រមាណ ៧,៥ភាគរយបើធៀបនឹងត្រីមាសមុន។
CBC ក៏បានឲ្យដឹងផងដែរថា ក្នុងទំហំកម្ចីជាង ៦ពាន់លានដុល្លារនេះ មាន ៥១,២៦% ជាកម្ចីយកទៅទិញចលនវត្ថុ និងបើកអាជីវកម្ម ខណៈ ៤៧,៦២% ជាកម្ចីយកទៅទិញអចលនវត្ថុ។
ប្រាប់ VOD តាមសារអេឡិចត្រូនិក Email នៅថ្ងៃនេះ ប្រធាននាយកប្រតិបត្តិនៃការិយាល័យឥណទានកម្ពុជា លោក អឿ សុធារ័ត្ន បានឲ្យដឹងថា ទំហំកម្ចីយកទៅទិញចលនវត្ថុច្រើននៅក្នុងកម្រិតនេះ វាជាសញ្ញាណមួយនៃការប្រុងប្រយ័ត្នមួយផងដែរ។
លោកសរសេរថា៖ «ទំហំកម្ចីក្នុងកម្រិតនេះ គឺមិនបង្កជាការព្រួយបារម្ភនោះទេ ប៉ុន្តែ ទោះបីជាយ៉ាងណាក៏ដោយ ដោយសារតែកម្ចីប្រភេទនេះចាត់ទុកជាកម្ចីដែលមិនបង្កើតប្រាក់ចំណូល យើងក៏ត្រូវតែយកចិត្តទុកដាក់ និងប្រុងប្រយ័ត្នផងដែរនៅពេលដែលកម្ចីលក្ខណៈបុគ្គលនេះបន្តមានកំណើនខ្លាំង»។
អ្នកវិភាគសេដ្ឋកិច្ច លោក យ៉ង ប៉ាក់ មានប្រសាសន៍ថា នៅពេលដែលប្រាក់កម្ចីយកទៅទិញសម្ភារប្រើប្រាស់មានការកើន មានន័យថា ប្រតិបត្តិការសេដ្ឋកិច្ចនឹងថយ តែលោកថា ប្រសិនជាប្រាក់កម្ចីយកទៅទិញសម្ភារប្រើប្រាស់តិចជាង ២០ភាគរយនៃកម្ចីសរុប នោះមិនទាន់ចោទជាបញ្ហាទេ។
លោកថា៖ «តែខ្ញុំគិតថា ខាងធនាគារគាត់គិតគូរបានច្បាស់លាស់ណាស់! មុននឹងឲ្យនរណាម្នាក់ខ្ចីទិញទូរស័ព្ទ បង់គេសុទ្ធតែមាន Income stable របស់គេ ហើយតែគ្រាន់តែថាប្រសិនជាវិស័យហ្នឹងវាកើនលើសពី ២០ភាគរយនៃទំហំកម្ចីសរុប អាហ្នឹងវាមានន័យថា យើងបាត់បង់ចំណូល ២០ភាគរយបាត់ទៅហើយ »។
បើតាមលោក យ៉ង ប៉ាក់ រដ្ឋាភិបាលគួរតែមានគោលនយោបាយកំណត់ប្រាក់កម្ចីទិញចលនទ្រព្យច្រើនបំផុតត្រឹម ២០ភាគរយនៃកម្ចីសរុប ខណៈធនាគារគួរមានការប្រុងប្រយ័ត្នពីហានិភ័យនៃកម្ចីរបៀបនេះឲ្យបានច្រើនផងដែរ។
គិតត្រឹមឆ្នាំ២០១៨ ធនាគារជាតិឲ្យដឹងថា មានពលរដ្ឋកម្ពុជាជាង ៤លាននាក់ជាប់បំណុលធនាគារ និងមីក្រូហិរញ្ញវត្ថុ ដែលមានទំហំទឹកប្រាក់ជិត ៣ម៉ឺនលានដុល្លារ ខណៈអ្នកវិភាគសង្គមលើកឡើងពីក្ដីបារម្ភនៃឥទ្ធិពលបំណុលទៅលើសន្តិសុខសង្គម៕
