គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប ឲ្យដឹងថា មានគណបក្សចំនួន៣ បានដាក់ភ្នាក់ងារសង្កេតការណ៍របស់ខ្លួន សម្រាប់ការបោះឆ្នោតក្រុមប្រឹក្សារាជធានី-ខេត្ត ក្រុង-ស្រុក-ខណ្ឌ អាណត្តិទី៣ ដែលនឹងប្រព្រឹត្តទៅនៅចុងសប្ដាហ៍នេះ។
ក្នុងសេចក្ដីប្រកាសព័ត៌មានកាលពីថ្ងៃម្សិលមិញ គ.ជ.ប បញ្ជាក់ថា គណបក្សដែលបានដាក់ភ្នាក់ងារសង្កេតការណ៍របស់ខ្លួនទាំងពេញសិទ្ធិ និងបម្រុង មានគណបក្ស៣ គឺគណបក្សប្រជាជនកម្ពុជា មានភ្នាក់ងារចំនួន ១ ០៨៤នាក់ គណបក្សហ្វ៊ុនស៊ិនប៉ិច ចំនួន ៣០នាក់ និងគណបក្សខ្មែររួបរួមជាតិ ចំនួន ៣៨នាក់។
គណបក្ស ៤ទៀត ដែលមិនបានដាក់ភ្នាក់ងារគណបក្សរបស់ខ្លួន មានគណបក្សខ្មែរសាធារណៈរដ្ឋ គណបក្សយុវជនកម្ពុជា គណបក្សឆន្ទៈខ្មែរ និងគណបក្សសញ្ជាតិកម្ពុជា។
បើតាមសេចក្ដីប្រកាសព័ត៌មានដដែល គ.ជ.ប អះអាងថា ស្ថាប័ននេះក៏បានទទួលពាក្យសុំចុះឈ្មោះដាក់អ្នកសង្កេតការណ៍ពីអង្គការ សមាគម ចំនួន១៩។ ប៉ុន្ដែ សម្រាប់អ្នកសង្កេតការណ៍អន្ដរជាតិវិញ គ.ជ.ប អះអាងថា ខ្លួនមិនទាន់ទទួលបានពាក្យស្នើសុំចុះឈ្មោះចូលរួមឃ្លាំមើលការបោះឆ្នោតនោះទេ គិតត្រឹមថ្ងៃទី២១ ខែឧសភា។
បើតាមសេចក្ដីប្រកាសព័ត៌មានរបស់ គ.ជ.ប ការបោះឆ្នោតក្រុមប្រឹក្សារាជធានី-ខេត្ត ក្រុង-ស្រុក-ខណ្ឌ អាណត្តិទី៣នេះ នឹងប្រព្រឹត្តទៅនៅថ្ងៃអាទិត្យ ទី២៦ ខែឧសភានេះ ហើយធ្វើឡើងជាអសកល ដែលបោះឆ្នោតដោយអង្គបោះឆ្នោតចំនួន ១១ ៥៧២នាក់នៅទូទាំងប្រទេស ប៉ុន្ដែ ភាគច្រើនគឺជាសមាជិកក្រុមប្រឹក្សាឃុំ-សង្កាត់មកពីគណបក្សប្រជាជនកម្ពុជា៕
