ក្រុមហ៊ុនផលិតរថយន្តម៉ាកតូយ៉ូតារបស់ជប៉ុន គ្រោងបង្កើតរោងចក្រនៅក្នុងប្រទេសមីយ៉ាន់ម៉ា។ នេះបើតាមការចុះផ្សាយរបស់សារព័ត៌មាន Straits Times របស់សឹង្ហបុរី។
ប្រភពពី Straits Times ឲ្យដឹងថា រោងចក្រនេះនឹងសាងសង់ឡើងនៅក្នុងតំបន់សេដ្ឋកិច្ចពិសេស Thilawa ជាយក្រុងយ៉ងហ្គុន។ រោងចក្រនេះ នឹងតម្លើងរថយន្តដឹកទំនិញ ដែលផ្នែកៗនានានៃរថយន្តត្រូវនាំចូលពីជប៉ុន និងប្រទេសដែលនៅជិតៗនឹងមីយ៉ាន់ម៉ា។
តំបន់សេដ្ឋកិច្ចពិសេស Thilawa ត្រូវបានបង្កើតឡើងនៅឆ្នាំ២០១៥។ តំបន់សេដ្ឋកិច្ចពិសេសនេះ ជាគម្រោងអភិវឌ្ឍន៍រួមគ្នារវាងវិស័យសាធារណៈ និងវិស័យឯកជន របស់ជប៉ុន និងមីយ៉ាន់ម៉ា។ តំបន់នេះ ត្រូវបានគេប្រសិទ្ធនាមថា ជានិមិត្តរូបនៃការអភិវឌ្ឍសេដ្ឋកិច្ច និងជាកន្លែងដែលទាក់ទាញអ្នកវិនិយោគទាំងអស់មកពីបរទេស។
ទោះបីជាចំនួនរថយន្តថ្មីតែ១៧៥០០ គ្រឿងប៉ុណ្ណោះត្រូវបានលក់នៅក្នុងប្រទេសមីយ៉ាន់ម៉ានៅឆ្នាំ២០១៨ តែនិន្នាការនៃការទិញរថយន្តថ្មីមានការកើនឡើងគួរឲ្យកត់សម្គាល់ ពោលគឺកើនឡើងទ្វេដងបើប្រៀបធៀបនឹងឆ្នាំ២០១៧។ ពេលថ្មីៗនេះ ក្រុមហ៊ុនតូយ៉ូតា បាននាំរថយន្តចំនួន២០០០គ្រឿងចូលប្រទេសមីយ៉ាន់ម៉ា។
គិតត្រឹមខែធ្នូ ឆ្នាំ២០១៨ ក្រុមហ៊ុនតូយ៉ូតាមានរោងចក្រផលិតគ្រឿងបង្គុំ និងតម្លើងរថយន្តនៅប្រទេសចំនួន២៧។
រដ្ឋាភិបាលមីយ៉ាន់ម៉ា បានបង្កើតគោលនយោបាយដែលលើកទឹកចិត្ត និងជួយសម្រួលពន្ធ ដើម្បីទាក់ទាញឲ្យក្រុមហ៊ុនផលិតរថយន្តមកបណ្ដាក់ទុនរកស៊ីនៅប្រទេសរបស់ខ្លួន។ ដោយសារតែកត្តានេះហើយ ទើបក្រុមហ៊ុនផលិតរថយន្តធំៗមួយចំនួនចាប់ផ្ដើមមករកស៊ីនៅប្រទេសនេះ។ ក្រុមហ៊ុនផលិតរថយន្តទាំងនោះមានដូចជា Suzuki, Nissan, Hyundai និង Ford កំពុងតែបើកដំណើរការនៅក្នុងប្រទេសមីយ៉ាន់ម៉ា។
ក្រុមហ៊ុនតូយ៉ូតា បានសម្រេចចិត្តបើករោងចក្រនៅក្នុងប្រទសមីយ៉ាន់ម៉ា ព្រោះតែក្រុមហ៊ុននេះសម្លឹងមើលឃើញថា ប្រទេសនេះនឹងមានកំណើនសេដ្ឋកិច្ចដ៏រឹងមាំនៅពេលខាងមុខ។ ក្រុមអ្នកវិភាគជឿជាក់ថា សក្តានុពលនៃទីផ្សារមីយ៉ាន់ម៉ា នឹងមានទំហប្រហាក់ប្រហែលនឹងថៃជាប្រទេសជិតខាង ដែលរថយន្តថ្មីប្រហែល១លានគ្រឿងត្រូវបានលក់ក្នុងប្រទេសនេះក្នុងមួយឆ្នាំ។
ការវិនិយោគក្នុងប្រទេសមីយ៉ាន់ម៉ា ត្រូវបានគេមើលឃើញថា មានកំណើននៅពេលដែលប្រទេសនេះបានផ្លាស់ប្តូរពីរបបយោធាទៅរដ្ឋាភិបាលបែបស៊ីវិលនៅឆ្នាំ២០១១។ នៅពេលនោះ សហរដ្ឋអាមេរិក និងសហភាពអឺរ៉ុប បានលើកលែងទណ្ឌកម្មទាំងអស់ប្រឆាំងនឹងប្រទេសមីយ៉ាន់ម៉ា៕
