មេធាវីការពារក្ដីអ្នកបកប្រែភាសាឱ្យទូរទស្សន៍រុស្ស៊ី RT ស្នើទៅចៅក្រមឱ្យកោះហៅស្ត្រីជាដើមបណ្ដឹង៥រូប មកចូលរួមសវនាការសួរដេញដោល ដោយលោកសង្ស័យថា មានភាពមិនប្រក្រតីព្រោះឯកសារអះអាងរបស់ដើមបណ្ដឹងនៅចៅក្រមស៊ើបសួរមានខ្លឹមសារដូចគ្នាទាំងអស់។
សាលាដំបូងរាជធានីភ្នំពេញ នៅថ្ងៃម្សិលមិញ បានបើកសវនាការលើសំណុំរឿងអ្នកបកប្រែភាសាឱ្យទូរទស្សន៍រុស្ស៊ី គឺលោក រ៉ាត់ រត្នមុនី ពាក់ព័ន្ធភាពយន្តឯកសារ «ម្ដាយខ្ញុំលក់ខ្ញុំ»។ ប៉ុន្តែ នៅក្នុងសវនាការសួរដេញដោលនេះ មិនមានដើមបណ្ដឹងចូលរួមនោះទេ។
ក្នុងបន្ទប់សវនាការ មេធាវីការពារក្ដីឱ្យលោក រ៉ាត់ រត្នមុនី គឺលោក ឡោ ជុនធី លើកឡើងថា ការដែលតុលាការបើកសវនាការដោយគ្មានដើមបណ្ដឹងចូលរួមនេះ មិនបានបង្ហាញពីតម្លាភាព។ លោកស្នើទៅចៅក្រមឱ្យកោះហៅដើមបណ្ដឹងដែលប្ដឹងកូនក្ដីរបស់លោកមកចូលរួមសវនាការ ដើម្បីសួរដេញដោល ដោយលោកមានមន្ទិលសង្ស័យថា ឯកសារអះអាងរបស់ដើមបណ្ដឹងទាំង៥ នាក់ ដែលចៅក្រមបានអាននៅក្នុងសវនាការ គឺមានលក្ខណៈដូចៗគ្នា។
ក្រោយពីមានការស្នើសុំនេះ ចៅក្រមជំនុំជម្រះនៃសាលាដំបូងរាជធានីភ្នំពេញ លោក កូយ សៅ បានសម្រេចយល់ព្រមទៅតាមសំណើរបស់មេធាវីការពារក្ដីឱ្យលោក រ៉ាត់ រត្នមុនី ដោយថា តុលាការនឹងកោះហៅដើមបណ្ដឹងឱ្យមកចូលសវនាការនៅថ្ងៃទី១២ ខែមិថុនា ខាងមុខនេះ។
លោក រ៉ាត់ រត្នមុនី ត្រូវបានតុលាការចោទប្រកាន់ពីបទញុះញង់ធ្វើឲ្យមានការរើសអើង និងបញ្ជូនទៅដាក់ឃុំនៅពន្ធនាគារព្រៃស បន្ទាប់ពីត្រូវបានចាប់ខ្លួននៅឯប្រទេសថៃ កាលពីខែធ្នូ ឆ្នាំមុន ពាក់ព័ន្ធនឹងការផលិតភាពយន្តឯកសារ «ម្ដាយខ្ញុំលក់ខ្ញុំ» របស់សារព័ត៌មានរុស្ស៊ី RT។
