ប្រទេសកម្ពុជា ប្រកាសរក្សាជំហរក្នុងការគាំទ្រសាធារណរដ្ឋទីម័រខាងកើតចូលជាសមាជិកអាស៊ាន ដោយថា ដើម្បីឲ្យប្រទេសដែលនៅក្នុងតំបន់អាស៊ីអាគ្នេយ៍ទាំងអស់អាចរួមគ្នាតែមួយ។
ប្រទេសទីម័រខាងកើតបានព្យាយាមម្ដងហើយម្ដងទៀត ដើម្បីទទួលតំណែងជាសមាជិកអាស៊ាន ចាប់តាំងពីឆ្នាំ២០១១មក ទោះជាយ៉ាងណា មានតែប្រទេសកម្ពុជា ថៃ ឥណ្ឌូណេស៊ី និងហ្វីលីពីន ប៉ុណ្ណោះដែលគាំទ្រដល់ប្រទេសនេះ។
អ្នកនាំពាក្យក្រសួងការបរទេសកម្ពុជា លោក កេត សោផាន់ មានប្រសាសន៍ប្រាប់ VOD ថា ប្រទេសកម្ពុជានៅតែរក្សាជំហរដដែលក្នុងការគាំទ្រសាធារណរដ្ឋទីម័រខាងកើតជាសមាជិកអាស៊ាន ដោយថា ដើម្បីឆ្លើយតបទៅនឹងគោលគំនិតរបស់អាស៊ាន និងឃើញពីស្ថានភាពប្រទេសនេះដូចទៅនឹងអតីតកាលរបស់កម្ពុជាមុនចូលអាស៊ាន។
លោកថា៖ «សុំរម្លឹកផងដែរថា នៅឆ្នាំ២០១៦ សម្ដេចតេជោនាយករដ្ឋមន្ត្រី លោកបានអញ្ជើញទៅទីម័រឡេស្តេ ហើយថ្នាក់ដឹកនាំ លោកបានកត់សម្គាល់ទីម័រឡេស្តេ គឺដូចទៅនឹងពេលដែលកម្ពុជាដាក់ពាក្យចូលជាសមាជិកអាស៊ានដំបូងផងដែរ។ អ៊ីចឹង ទើបបានជាថ្នាក់ដឹកនាំកម្ពុជា លោកឃើញថា អាស៊ានគួរតែគាំទ្របេក្ខភាពទីម័រឡេស្តេចូលជាសមាជិកអាស៊ានផងដែរ »។
ការលើកឡើងរបស់ក្រសួងការបរទេសនេះនៅពេលនេះ គឺបន្ទាប់ពីរដ្ឋមន្ត្រីការបរទេសទីម័រខាងកើតលោក Dionisio Babo Soares បានជួបជាមួយនាយករដ្ឋមន្ត្រីកម្ពុជា និងរដ្ឋមន្ត្រីការបរទេសកម្ពុជាកាលពីម្សិលមិញ។
លើទំព័រហ្វេសប៊ុករបស់លោកនាយករដ្ឋមន្ត្រី ហ៊ុន សែន កាលពីម្សិលមិញ ក៏បានលើកឡើងផងដែរថា លោកនាយករដ្ឋមន្ត្រីបានគាំទ្រចំពោះប្រទេសទីម័រខាងកើត នឹងបានលើកឡើងថា ប្រទេសនេះបានត្រៀមខ្លួនសម្រាប់ការចូលជាសមាជិកអាស៊ានរួចរាល់ហើយ។
ក្នុងហ្វេសប៊ុក លោក ហ៊ុន សែន សរសេរថា៖ «សម្ដេចតេជោបានកត់សម្គាល់ថា ប្រទេសទីម័រលេសបានត្រៀមខ្លួនបានយ៉ាងល្អសម្រាប់ការចូលខ្លួនជាសមាជិកអាស៊ាន ទាំងការរៀបចំឲ្យមានស្ថានទូតនៅគ្រប់ប្រទេសទាំងអស់នៅក្នុងបណ្ដាប្រទេសអាស៊ាន ក៏ដូចជា សមត្ថភាពរបស់មន្ត្រីរាជការ រួមទាំងផ្នែកសេដ្ឋកិច្ច និងហិរញ្ញវត្ថុរបស់ប្រទេសទីម័រលេសផងដែរ»។
អ្នកវិភាគនយោបាយ លោក ឯម សុវណ្ណារ៉ា គាំទ្រចំពោះនយោបាយការទូតរបស់កម្ពុជាបែបនេះដោយថា វានឹងផ្ដល់ប្រយោជន៍ដល់ប្រទេសកម្ពុជាវិញនៅលើឆាកអន្តរជាតិ។
លោក មានប្រសាសន៍ថា៖ «កាលណាយើងមានគោលនយោបាយការបរទេសគាំទ្ររដ្ឋមួយ រដ្ឋមួយទៀតក៏មានកាតព្វកិច្ច និងទំនាក់ទំនងការទូត តបស្នង ឬក៏រក្សានូវមិត្តភាពដូចដែលកម្ពុជាធ្វើចំពោះទីម័រខាងកើតដែរ។ ដូច្នេះ បើគិតត្រឹមក្របខណ្ឌតំបន់ អាស៊ានត្រូវការការគាំទ្រទាំង១០ប្រទេស អនុម័តឯកច្ឆន្ទតែក្នុងក្របខណ្ឌអន្តរជាតិ កម្ពុជាអាចបានផលចំណេញច្រើនពាក់ព័ន្ធទៅនឹងនយោបាយការបរទេស។ ថ្វីត្បិតតែរដ្ឋតូច តែក្នុងអង្គការសហប្រជាជាតិមានមួយសំឡេងដូចគ្នា»។
ចាប់តាំងពីទទួលឯករាជ្យពីប្រទេសឥណ្ឌូណេស៊ីនៅឆ្នាំ២០០២មក សាធារណរដ្ឋទីម័រខាងកើតបានបង្ហាញពីបំណងជាបន្តបន្ទាប់ក្នុងការចូលជាសមាជិកអាស៊ាន។
ក្នុងឆ្នាំ២០១១ ប្រទេសនេះបានដាក់ឯកសារជាផ្លូវការ ដើម្បីសុំចូលជាសមាជិកអាស៊ាន តែទោះជាយ៉ាងណា បំណងនេះមិនត្រូវបានស្វាគមន៍ដោយសមាជិកភាគច្រើននោះទេ។ បច្ចុប្បន្នសាធារណរដ្ឋទីម័រខាងកើតមានឋានៈជាអ្នកសង្កេតការណ៍អាស៊ាន ខណៈក្រុមការងារអាស៊ានកំពុងពិនិត្យទៅលើស្ថានភាពនយោបាយ សេដ្ឋកិច្ច និងវប្បធម៌របស់ប្រទេសនេះ មុននឹងសម្រេចថាអនុញ្ញាត ឬមិនអនុញ្ញាតឲ្យចូលជាសមាជិក៕
