អាមេរិកគ្រោងលក់យន្តហោះស៊ើបការណ៍សម្ងាត់គ្មានមនុស្សបើក ទៅឲ្យប្រទេសសម្ព័ន្ធមិត្តចំនួន ៤ នៅតំបន់សមុទ្រចិនខាងត្បូង។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃនេះ។
ទីភ្នាក់ងារព័ត៌មានមួយនេះ បានចុះផ្សាយបែបនេះដោយបានដកស្រង់សម្ដីរដ្ឋមន្ត្រីការពារជាតិស្ដីទីអាមេរិក លោក Patrick Shanahan ដែលបានថ្លែងថា អាមេរិកនឹងមិនដើរតាមដានជើងចិននៅតំបន់អាស៊ីនោះឡើយ។
Reuters បានដកស្រង់សម្ដីមន្ទីរបញ្ចកោណអាមេរិក ដែលបានប្រកាសកាលពីថ្ងៃសុក្រសប្ដាហ៍មុនថា ខ្លួននឹងលក់យន្តហោះស៊ើបការណ៍សម្ងាត់ឈ្មោះថា ScanEagle ចំនួន ៣៤គ្រឿង ទៅឲ្យរដ្ឋាភិបាលម៉ាឡេស៊ី ឥណ្ឌូនេស៊ី ហ្វីលីពីន និងវៀតណាម។
បើតាម Reuters យន្តហោះស៊ើបការណ៍សម្ងាត់គ្មានមនុស្សបើកបរទាំង ៣៤គ្រឿងនោះ ត្រូវបានផលិតឡើងដោយក្រុមហ៊ុន Boeing មានតម្លៃសរុបដល់ទៅ ៤៧លានដុល្លារ ហើយគ្រោងបញ្ចប់រួចរាល់នៅឆ្នាំ២០២២។
Reuters បានរាយការណ៍ថា យន្តហោះស៊ើបការណ៍សម្ងាត់ប្រភេទនេះ មានសមត្ថភាពអាចប្រមូលព័ត៌មានសម្ងាត់បានយ៉ាងធំធេង អាចទប់ស្កាត់សកម្មភាពចិននៅក្នុងតំបន់បាន។
ចិនបានអះអាងជាម្ចាស់លើដែនទឹកស្ទើតែទាំងអស់នៅសមុទ្រចិនខាងត្បូង ហើយតែងតែថ្កោលទោសចំពោះប្រតិបត្តិការកងទ័ពជើងទឹករបស់អាមេរិក និងសម្ព័ន្ធមិត្តរបស់អាមេរិក នៅជិតបណ្ដាកោះកាន់កាប់ដោយចិន។ ទោះជាយ៉ាងណា ប្រ៊ុយណេ ឥណ្ឌូនេស៊ី ម៉ាឡេស៊ី ហ្វីលីពីន តៃវ៉ាន់ និងវៀតណាម សុទ្ធតែអះអាងជាម្ចាស់ផងដែរ៕
