អង្គការលីកាដូជំរុញទៅរដ្ឋាភិបាលឱ្យពង្រឹងការអនុវត្តច្បាប់ស្ដីពីពលកម្មកុមារឱ្យមានប្រសិទ្ធភាព ក្រោយពីអង្គការមួយនេះ រកឃើញថា សិប្បកម្មផលិតឥដ្ឋមួយដែលបានប្រើប្រាស់កម្លាំងពលកម្មកុមារនោះ នៅតែបន្តដំណើរការដដែល។
សិប្បកម្មឡឥដ្ឋ លាង ស៊្រុន ដែលស្ថិតនៅក្នុងស្រុកខ្សាច់កណ្ដាល ខេត្តកណ្ដាល ត្រូវបានអាជ្ញាធរសម្រេចបញ្ជាឲ្យបិទអាជីវកម្ម បន្ទាប់ពីកុមារីម្នាក់វ័យ ១០ឆ្នាំ បានរងគ្រោះថ្នាក់ដាច់ដៃម្ខាងអំឡុងពេលធ្វើការងារជាមួយម្ដាយរបស់នាងនៅក្នុងសិប្បកម្មមួយនេះ កាលពីខែមីនាកន្លងមក។
ប៉ុន្តែ អង្គការលីកាដូ បានលើកឡើងនូវសេចក្ដីថ្លែងការណ៍កាលពីម្សិលមិញនេះថា សិប្បកម្មឡឥដ្ឋមួយនេះ មិនបានផ្អាកដំណើរការទាំងស្រុងទេ បើទោះបីជាកន្លងមក ក្រសួងសម្រេចបិទសិប្បកម្មនោះហើយក៏ដោយ។
អង្គការលីកាដូ ជំរុញទៅអាជ្ញាធរ និងមន្រ្តីពាក់ព័ន្ធ ឲ្យពង្រឹងការអនុវត្តច្បាប់ ដោយចាត់វិធានការឱ្យហ្មត់ចត់ និងការធ្វើអធិការកិច្ចឱ្យបានតឹងរ៉ឹង និងទៀងទាត់ ដើម្បីបញ្ឈប់ពលកម្មកុមារ និងទាសភាពបំណុលនៅក្នុងសិប្បកម្មផលិតឥដ្ឋ។
ប្រធានគ្រប់គ្រងផ្នែកអង្កេតនៅអង្គការលីកាដូ លោក អំ សំអាត បានបញ្ជាក់ថា អង្គការរបស់លោកជំរុញទៅអាជ្ញាធរឲ្យអនុវត្តច្បាប់ឲ្យមានប្រសិទ្ធភាពបែបនេះ ដើម្បីទុកជាគំរូសម្រាប់សិប្បកម្មឡឥដ្ឋដទៃទៀត។
លោក អំ សំអាត មានប្រសាសន៍ថា៖ «ត្រូវតែអនុវត្តទៅតាមផ្លូវច្បាប់ អាចឱ្យក្លាយទៅជាបទល្មើសព្រហ្មទណ្ឌជាដើមអីចឹងទៅ។ អីចឹង បើសិនយើងអនុវត្តច្បាប់ឱ្យបានតឹងរ៉ឹង អាហ្នឹងវាអាចនឹងមានប្រសិទ្ធភាពទៅលើបញ្ហាទាំងអស់ហ្នឹង ពីព្រោះអានេះ វាជាគំរូមួយសម្រាប់សិប្បកម្មឡឥដ្ឋដទៃទៀត។ បើសិនជាឡឥដ្ឋណាដែលមានបញ្ហាអីចឹង ហើយយើងអនុវត្តឱ្យបានតឹងរ៉ឹងទៅ ឡឥដ្ឋដទៃនឹងខ្លាចរអា ហើយឡឥដ្ឋដទៃមិនធ្វើអ្វីខុសដូចឡឥដ្ឋមុនៗទេ»។
វី.អូ.ឌី មិនអាចសុំការអត្ថាធិប្បាយពីប្រធានមន្ទីរការងារខេត្តកណ្ដាល លោក ធុល នាង បានទេ ដោយទូរសព្ទចូលគ្មានទទួល។
អភិបាលខេត្តកណ្ដាល លោក ម៉ៅ ភិរុណ បានឲ្យដឹងថា លោកមិនទាន់ទទួលបានព័ត៌មាននេះនៅឡើយទេ ប៉ុន្តែ លោកថា ប្រសិនបើជាសិប្បកម្មផលិតនោះនៅតែបន្តដំណើរការនោះ អាជ្ញាធរនឹងចាត់វិធានការតាមផ្លូវច្បាប់។
លោក ម៉ៅ ភិរុណ មានប្រសាសន៍ថា៖ «ខ្ញុំអត់ទាន់បានទទូល ទើបលឺនិយាយ។ យើងមើលពីវិធានការកន្លងមក គេដាក់ម៉េច ក្រសួងគេឱ្យឈប់ ត្រូវតែឱ្យឈប់ តែបើបំពាន ត្រូវមានវិធានការតាមច្បាប់ វាអត់មានវិធានការអីក្រៅនេះទេ។ ចាំខ្ញុំត្រួតពិនិត្យរឿងហ្នឹង»។
កាលពីថ្ងៃទី៥ ខែមិថុនាកន្លងមក ក្រសួងការងារ និងបណ្ដុះបណ្ដាលវិជ្ជាជីវៈ បានព្រមានបិទអាជីវកម្មឡឥដ្ឋណាដែលពុំអនុវត្តតាមសេចក្ដីណែនាំថ្មី ដើម្បីទប់ស្កាត់រាល់ទម្រង់នៃពលកម្មកុមារនៅតាមសិប្បកម្មឡឥដ្ឋ រួមទាំងការបង្ខំឱ្យកុមារធ្វើការងារដើម្បីដោះបំណុលផងដែរ។
ក្រសួងការងារក៏បានតម្រូវឱ្យម្ចាស់សិប្បកម្មផលិតឥដ្ឋទាំងអស់ ត្រូវរៀបចំកន្លែងស្នាក់នៅឱ្យឆ្ងាយពីខ្សែសង្វាក់ផលិតកម្ម និងត្រូវមានរបងការពារដោយខណ្ឌចែកបរិវេណខ្សែសង្វាក់ផលិតកម្ម និងកន្លែងស្នាក់នៅឱ្យដាច់ពីគ្នា។
ប្រធាននាយកដ្ឋានការងារកុមារនៃក្រសួងការងារ លោក វ៉ែង ហៀង ត្រូវបានដកស្រង់សម្ដីដោយកាសែតភ្នំពេញប៉ុស្តិ៍ ចុះផ្សាយនៅថ្ងៃនេះ ដែលបានថ្លែងថា កុមារកម្ពុជាចំនួន ៣ម៉ឺន ត្រូវបានដកហូត និងទប់ស្កាត់ពីទម្រង់ធ្ងន់ធ្ងរបំផុតនៃពលកម្មកុមារ ហើយកុមារកម្ពុជាប្រមាណ ១៨ម៉ឺននាក់ទៀត ត្រូវបានទប់ស្កាត់ពីការប្រើប្រាស់ពលកម្មកុមារ ដើម្បីផ្តល់ឱកាសឱ្យពួកគេទទួលបានការអប់រំ បំណិនជីវិត និងបណ្តុះបណ្តាលជំនាញ នៅចន្លោះឆ្នាំ២០១៣ រហូតដល់ឆ្នាំ២០១៨៕
