មន្ត្រីជាន់ខ្ពស់រដ្ឋាភិបាលអះអាងថា សមត្ថកិច្ចមិនទាន់អាចចាប់ខ្លួនម្ចាស់អាជីវកម្មក្លឹបកម្សាន្ត លុច្សសារី ដែលជាប់ពាក់ព័ន្ធគ្រឿងញៀនមកផ្ដន្ទាទោសបានទេ ដោយថា ជនសង្ស័យរូបនោះ បានរត់គេចខ្លួនទៅក្រៅប្រទេស។
អគ្គស្នងការរងនគរបាលជាតិ លោក ម៉ក់ ជីតូ ប្រាប់ វី.អូ.ឌី នៅថ្ងៃនេះថា សមត្ថកិច្ចបានកំណត់មុខសញ្ញាម្ចាស់អាជីវកម្មក្លឹបកម្សាន្ត លុច្សសារី រួចហើយ ប៉ុន្តែ មិនទាន់អាចចាប់ខ្លួនមកផ្ដន្ទាទោសបាន ដោយសារ ម្ចាស់អាជីវកម្មរូបនោះបានរត់គេខ្លួន។
លោកថា៖ «ឥឡូវដឹងតែគេចខ្លួន មិនដឹងនៅក្នុង ឬនៅក្រៅទេ កំពុងស្រាវជ្រាវដែរហ្នឹង ឆ្លើយថា នៅក្រៅក៏ពុំបាន ព្រោះយើងមិនដឹងដែរ ព្រោះគេគេចខ្លួន។ ធម្មតាទេ កន្លែងមួយវាមានម្ចាស់ មានមេការ មានអីហ្នឹង។ យើងបែងចែកជាពី មួយម្ចាស់ទីតាំង ម្ចាស់សំណង់តែគាត់អត់បានធ្វើទេ ។ គាត់ជួលឱ្យគេ អ៊ីចឹងម្ចាស់អាជីវកម្ម[ទេ] អ្នកប្រព្រឹត្ត»។
ស្នងការរាជធានីភ្នំពេញ លោក ស ថេត មានប្រសាសន៍ថា បច្ចុប្បន្ននេះ សមត្ថកិច្ចកំពុងតែស្វែងរកម្ចាស់អាជីវកម្ម លុច្សសារី។
លោក ថា៖ «គេកំពុងតាមរក! បិទ[លិខិតឆ្លងដែន] បិទម៉េច? គាត់មិននៅហ្នឹងណា [ខ្មែរណា] ជាជនជាតិបរទេស គេកំពុងធ្វើការ កុំអាល[សួរ]»។
កាលពីថ្ងៃទី៨ ខែមិថុនា ឆ្នាំ២០១៩ សមត្ថកិច្ចរាជធានីភ្នំពេញចុះបង្ក្រាបក្លឹបកម្សាន្តឈ្មោះ លុច្សសារី ដោយឃាត់ខ្លួនអ្នកទៅកម្សាន្តប្រមាណ ៤០០នាក់ ដែលភាគច្រើនជាជនជាតិចិន និងវៀតណាម សង្ស័យពាក់ព័ន្ធករណីគ្រឿងញៀន។ ប៉ុន្តែ ក្នុងចំណោមមនុស្សប្រមាណ ៤០០នាក់ គឺមានតែ ១៧នាក់ដែលត្រូវសមត្ថកិច្ចបញ្ជូនទៅតុលាការ។
កាលពីថ្ងៃទី១៣ ខែមិថុនា ឆ្នាំ២០១៩ ព្រះរាអាជ្ញារងសាលាដំបូងរាជធានីភ្នំពេញ បានសម្រេចឃុំខ្លួនមនុស្ស ១៧នាក់ ដោយចោទប្រកាន់ចំនួន ៣បទល្មើសផ្សេងគ្នា។ ក្នុងនោះ អ្នកគ្រប់គ្រងមានពីរនាក់គឺជនជាតិខ្មែរ និងវៀតណាម ដោយព្រះរាជ្ញារងចោទប្រកាន់ពីបទ ផ្ដល់ទីតាំងឱ្យប្រព្រឹត្តបទល្មើសគ្រឿងញៀន។
ចំពោះសន្ដិសុខ ត្រូវបានចោទពីបទ សម្របសម្រួលបង្កលក្ខណៈឱ្យប្រព្រឹត្តបទល្មើសគ្រឿងញៀន និងអ្នកបម្រើសេវាក្នុងក្លឹបពីបទ ផ្សំគំនិតឲ្យប្រព្រឹត្តបទល្មើសគ្រឿងញៀន។
ប្រធានគ្រប់គ្រងផ្នែកអង្កេតនៅអង្គការលីកាដូ លោក អំ សំអាត ស្វាគមន៍ចំពោះការបង្រ្កាប គ្រឿងញៀន ប៉ុន្តែ លោកថា សមត្ថកិច្ចហាក់មានភាពយឺតយ៉ាវក្នុងការចាប់ខ្លួនអ្នកនៅពីក្រោយករណីនេះ ដែលធ្វើឱ្យម្ចាស់អាជីវកម្ម ឬអ្នកនៅពីក្រោយខ្នងរត់គេចខ្លួនបាត់នោះ។
លោក មានប្រសាសន៍ថា៖ «ខ្ញុំគាំទ្រទាំងអស់ហ្នឹង។ ប៉ុន្តែ ការបង្រ្កាបហ្នឹង សូមឱ្យអនុវត្តតាមផ្លូវច្បាប់ដោយមានប្រសិទ្ធិភាព បានន័យថា អ្នកដែលពាក់ព័ន្ធ មុខសញ្ញាដែលពាក់ព័ន្ធទាំងអស់ហ្នឹង ត្រូវកំណត់ ហើយនិងអនុវត្តឱ្យបានភ្លាមៗ ចៀសវាងការទុកពេលគឺជាការអូសបន្លាយសម្រាប់ពួកហ្នឹងមានឱកាសច្រើនហើយ។ ក៏កុំបាច់រង់ចាំ បទបញ្ជាថ្នាក់លើអី។ យើងអនុវត្តច្បាប់ អ្នកដែលពាក់ព័ន្ធត្រូវតែហ៊ានពុះពារក្នុងការអនុវត្ត»។
លុច្សសារី គឺជាក្លឹបកម្សាន្តទី៣ នៅក្នុងរាជធានីភ្នំពេញ ដែលត្រូវបានសមត្ថកិច្ចបង្ក្រាប ចាប់ខ្លួនមនុស្ស និងរឹបអូសបានគ្រឿងញៀន បន្ទាប់ពីមជ្ឈមណ្ឌលកម្សាន្ត រ៉ក់ របស់ឧកញ៉ា គិត ធាង កាលពីខែកុម្ភៈ និងក្លឹបកម្សាន្ត ម៉ៃ អាមី កាលពីខែមេសាកន្លងមក។
កាលពីថ្ងៃទី២៨ ខែកុម្ភៈ នគរបាលរាជធានីភ្នំពេញ បានបង្ហាញរបាយការណ៍មួយ ដោយបានរកឃើញក្លឹបកម្សាន្ត និងបារបារាំងជិត ១៣០០កន្លែង ងាយរងគ្រោះនឹងការប្រើប្រាស់គ្រឿងញៀន ក្នុងនោះក្លឹបជាង ១ពាន់កន្លែង បានធ្វើកិច្ចសន្យាមិនឲ្យមានការប្រើប្រាស់ និងចែកចាយគ្រឿងញៀនរួចហើយ។
កាលពីថ្ងៃទី១២ ខែមីនា រដ្ឋមន្ត្រីក្រសួងមហាផ្ទៃ លោក ស ខេង រំឭកមន្ត្រីក្រោមឱវាទបន្តពង្រឹងប្រសិទ្ធភាពបង្ក្រាបគ្រឿងញៀន ដោយថា មិនត្រូវមានការយោគយល់ណាមួយនោះឡើយ។ បើតាមលោក ស ខេង យុទ្ធនាការបង្ក្រាបគ្រឿងញៀនជិត ២ឆ្នាំមកនេះ សមត្ថកិច្ចរឹបអូសបានគ្រឿងញៀនជិត ៥០០គីឡូក្រាម៕
