កូនប្រុសពៅលោក កែម ឡី កើតជំងឺអូទីស្សឹម​

កូនប្រុសពៅលោក កែម ឡី ដែលកើតក្រោយពេលឪពុករងការបាញ់សម្លាប់នោះ កើតជំងឺអូទីស្សឹម គឺជាប្រភេទជំងឺធ្វើឱ្យកុមារលូតលាស់ខួរក្បាលយឺត មានអាការៈមិននិយាយស្តី និងមានការភ័យខ្លាចច្រើន។

នៅក្នុងវេទិកាវិទ្យុអាស៊ីសេរីកាលពីយប់មិញអ្នកស្រី បូ រចនា ​ភរិយាលោក កែម ឡី ដែលកំពុងរស់នៅប្រទេសអូស្ត្រាលី លើកឡើងថា កូនប្រុសរបស់អ្នកស្រី ឈ្មោះ កែមឡី វីរបុត្រ មានអាការៈប្លែកដោយមិនសូវនិយាយស្តីទើបអ្នកស្រីនាំទៅពិគ្រោះយោបល់ជាមួយពេទ្យជំនាញ។ អ្នកស្រី បញ្ជាក់ថា ពេទ្យប្រាប់ថាកូនគាត់មានជំងឺអូទីស្សឹម ហើយពេលនេះ កំពុងព្យាបាល។​

លោក កែម ឡី មានកូនប្រុស៤នាក់ កាលពីឆ្នាំ២០១៦ ហើយពេលនោះភរិយាលោកពរពោះកូនម្នាក់ទៀត ជាពេលដែលលោកត្រូវឃាតករបាញ់សម្លាប់នៅថ្ងៃទី១០ខែកក្កដាឆ្នាំ២០១៦។ ក្រោយ​មក​ភរិយាលោក កែម ឡី ភៀសខ្លួនទៅប្រទេសថៃ ហើយសម្រាលបានកូនប្រុសម្នាក់ទៀតនៅទីនោះឈ្មោះ កែមឡី វីរបុត្រ។​

ក្រោយពេលពិគ្រោះជាមួយគ្រូពេទ្យមានការសង្ស័យថា មកពីអ្នកស្រីប៉ះពាល់ផ្លូវចិត្តខ្លាំងពេលពរពោះ ដោយសារហេតុការណ៍គេបាញ់សម្លាប់ស្វាមី៕​