នាយករដ្ឋមន្រ្តីវៀតណាម បានបង្ហាញការមិនពេញចិត្តចំពោះមុខនាយករដ្ឋមន្រ្តីសឹង្ហបុរីដែលលើកឡើងថាវៀតណាមបានឈ្លានពានកម្ពុជានៅឆ្នាំ១៩៧៩។
សារព័ត៌មានVN Express របស់វៀតណាម បានចុះផ្សាយថា លោក ង្វៀន សួនហ្វុក នាយករដ្ឋមន្រ្តីវៀតណាម បានប្រាប់ដោយផ្ទាល់នៅពេលជួបនាយករដ្ឋមន្រ្តីសឹង្ហបុរីលោក លី សៀនឡុងនៅជំនួបកំពូលអាស៊ាននាក្រុងបាងកកកាលពីថ្ងៃសៅរ៍កន្លងទៅ។
ប្រភពពីសារព័ត៌មានVN Express ដដែលបានឲ្យដឹងទៀតថា លោក ង្វៀន សួនហ្វុក បានបញ្ជាក់ប្រាប់ទៅលី សៀនឡុង ថាការលើកឡើងរបស់មេដឹកសឹង្ហបុរីមិនត្រឹមត្រូវនោះទេ។ នាយករដ្ឋមន្រ្តីវៀតណាម បន្ថែមថាការនិយាយបែបនេះបានប៉ះពាល់ជាអវិជ្ជមានដល់កម្ពុជា និងវៀតណាម ជាពិសេសក្រុមគ្រួសារទាហានស្ម័គ្រចិត្តវៀតណាមដែលបានបូជាជីវិតដើម្បីជួយរំដោះប្រជាជនកម្ពុជាចេញពីរបបខ្មែរក្រហម។
នាយករដ្ឋមន្រ្តីសឹង្ហបុរី លោក លី សៀនឡុង បានសរសេរសាររំលែកទុក្ខនៃការស្លាប់របស់អតីតនាយករដ្ឋមន្រ្តីថៃ លោក Prem Tinsulanonda លើទំព័រហ្វេសប៊ុករបស់លោកកាលពីថ្ងៃទី៣១ ខែឧសភា កន្លងទៅ។ ក្នុងសារនោះ លោក Lee Hsien Loong បានរម្លឹកដល់វីរភាពរបស់លោក Prem Tinsulanonda ដែលថា ហ៊ានប្រឈមនឹងវៀតណាម នៅពេលដែលវៀតណាមធ្វើសង្គ្រាមឈ្លានពានកម្ពុជា និងបានរក្សាសន្តិសុខតំបន់ចាប់ពីពេលនោះមក។
នាយករដ្ឋមន្រ្តីកម្ពុជា លោក ហ៊ុន សែន រដ្ឋមន្រ្តីក្រសួងការពារជាតិកម្ពុជា លោក ទៀ បាញ់ និងមន្រ្តីជាន់ខ្ពស់កម្ពុជាមួយចំនួនទៀត បានប្រតិកម្មជាបន្តបន្ទាប់ចំពោះការលើកឡើងរបស់នាយករដ្ឋមន្រ្តីសឹង្ហបុរី លោក លី សៀនឡុង ដែលថា វៀតណាមបានឈ្លានពានកម្ពុជានៅឆ្នាំ១៩៧៩។ ទោះយ៉ាងណាក៏ដោយ ការឆ្លើយឆ្លងរវាងមេដឹកកម្ពុជា និងសឹង្ហបុរី បានបញ្ចប់ក្រោយរដ្ឋមន្រ្តីក្រសួងការបរទេសប្រទេសទាំងពីរបានជជែកគ្នាតាមទូរសព្ទកាលពីថ្ងៃទី៧ ខែមិថុនា។
លោក លី ស៊ានឡុង ត្រូវបានសារព័ត៌មាន Straits Times របស់សឹង្ហបុរី ដកស្រង់សម្តីក្រោយជំនួបជាមួយនាយករដ្ឋមន្រ្តីវៀតណាមថា លោក បានបញ្ជាក់ប្រាប់ពីមូលហេតុទាក់ទងនឹងការឡើងរបស់លោកជុំវិញបញ្ហាសង្រ្គាមនៅកម្ពុជា និងជំហររបស់សឹង្ហបុរីពាក់ព័ន្ធនឹងប្រវត្តិសាស្រ្តមួយនេះទៅកាន់ភាគីវៀតណាមផងដែរ។ លោក ថាដូចដែលគេដឹងជាទូទៅប្រទេសទាំងពីរយល់ឃើញផ្សេងគ្នាពីបញ្ហានេះ។
លោក លី ស៊ានឡុង បន្ថែមថាភាគីទាំងពីរនូវតែរក្សាជំហបន្តបង្កើនមិត្តភាពនឹងគ្នា។ ទោះយ៉ាងណាក៏ដោយ នាយករដ្ឋមន្រ្តីរូបនេះបញ្ជាក់ថាតាមការយល់ឃើញរបស់សឹង្ហបុរី មូលដ្ឋាននៃការបន្តដំណើរទៅមុខរួមគ្នាគឺភាពស្មោះត្រង់ក្នុងការទទួលស្គាល់ពីអ្វីដែលបានកើតឡើងនៅក្នុងអតីតកាល ដើម្បីកសាងទំនុកចិត្ត និងអាចធ្វើការឲ្យកាន់តែជិតស្និតជាមួយគ្នា។
ទាក់ទងនឹងបញ្ហាវត្តមានរបស់វៀតណាមនៅកម្ពុជានាឆ្នាំ១៩៧៩នេះ លោក លី សៀនឡុងក៏បានជួបគ្នាដាច់ដោយឡែកជាមួយលោកនាយករដ្ឋមន្រ្តីហ៊ុន សែន ផងដែរ កាលពីថ្ងៃសៅរ៍កន្លងទៅ៕