សាធារណរដ្ឋប្រជាមានិតចិនបានផ្ដល់ជំនួយជាសម្ភារៈបច្ចេកទេសដោះមីនមួយចំនួនដល់រដ្ឋាភិបាល តបតាមការស្នើសុំរបស់កម្ពុជាកាលពីកន្លងទៅ។
ក្នុងសេចក្ដីប្រកាសព័ត៌មានចុះថ្ងៃទី២៤ មិថុនា អាជ្ញាធរមីនឲ្យដឹងថាប្រទេសចិនតាមរយៈឯកអគ្គរដ្ឋទូតរបស់ខ្លួនបានផ្ដល់សម្ភារៈដើម្បីបម្រើដល់ការដោះមីននៅកម្ពុជាដែលរួមមាន រថយន្ត៤គ្រឿង ម៉ូតូ១០ គ្រឿង ម៉ាស៊ីនរាវមីន៤០គ្រឿង ប្រអប់សម្ភារៈ១១០ឈុត សំលៀកបំពាក់ការពារ ៤០កំប្លេ មួកការពារ៤០មួក ដ្រូន៥គ្រឿង ម៉ាស៊ីនបំផ្ទុះ ១១៥គ្រឿង ឯកសណ្ឋាន ១០០០កំប្លេ និងទឹកថ្នាំម៉ាស៊ីនព្រីន៦៩ប្រអប់ផងដែរ។
អនុប្រធានទី១ នៃអាជ្ញាធរមីនលោក លី ធុជ បានលើកឡើងក្នុងសន្ទរកថារបស់លោកថាគិតមកត្រឹមឆ្នាំ២០១៩ នេះជាឆ្នាំទី៤ហើយដែល ប្រទេសចិនបានផ្ដល់ជំនួយដោះមីនដល់កម្ពុជា ដែលបានចូលរួមយ៉ាងច្រើនក្នុងយុទ្ធនាការបោសសម្អាតមីន។
លោកថា៖ «ទោះជាយ៉ាងនេះក្ដីអាជ្ញាធរមីន បាននឹងកំពុងខិតខំស្វែងរកការគាំទ្របន្ថែមទៀត សម្រាប់មធ្យោបាយធ្វើដំណើរជារថយន្តនៅតាមបណ្ដាខេត្តចាំបាច់ និងអាទិភាពមួយចំនួន ហើយអាជ្ញាធរមីន ក៏កំពុងស្វែងការគាំទ្រ និងជំនួយពីមហាមិត្តចិន ក្នុងការសាងសង់អគារទីស្នាក់ការថ្មី ឲ្យសមជាស្ថាប័នមួយសម្រាប់បម្រើការងារមនុស្សធម៌នៅកម្ពុជា»។
រដ្ឋាភិបាលកម្ពុជាកំណត់យកឆ្នាំ២០២៥ ជាឆ្នាំដែលបោសសម្អាតមីនឲ្យអស់ពីកម្ពុជា ដោយត្រូវការថវិការសម្រាប់បោសសម្អាតប្រមាណជាង៣៥៤លានដុល្លារអាមេរិក។
គិតត្រឹមខែ ឧសភា ឆ្នាំ២០១៩ កម្ពុជាបានបោសសម្អាតមីន និងសំណល់ជាតិផ្ទុះពីសង្គ្រាមបានជិត២០០០គីឡូមែត្រការ៉េ ក្នុងនោះយកបានគ្រាប់មីន និងសំណល់ជាតិផ្ទុះពីសង្គ្រាមបានជិត៤លានគ្រាប់ ខណៈនៅសល់ផ្ទៃដីជាង២ពាន់គីឡូម៉ែត្រការ៉េនៅមិនទាន់រំដោះអស់៕