ប្រធានអង្គភាពប្រឆាំងអំពើពុករលួយ អះអាងថា អតីតមេបេអឹមខេត្តរតនគិរី និង ស្នងការរងខេត្តកណ្ដាល មិនជាប់ពាក់ព័ន្ធនឹងអំពើពុករលួយទេ។
ក្នុងសន្នីសីទសារព័ត៌មាន នៅថ្ងៃនេះ ប្រធានអង្គភាពប្រឆាំងអំពើពុករលួយ លោក ឱម យិនទៀង លើកឡើងថា ចំពោះករណីអតីតមេប៉េអឹមខេត្តរតនគិរីលោក លោក គឹម រស្មី អង្គភាពនេះ បានបង្កើតក្រុមការងារស៊ើបអង្គេត ៦ក្រុម ប៉ុន្តែរកមិនឃើញថា លោក គឹម រស្មីជាប់ពាក់ព័ន្ធនឹងបទល្មើសអំពើពុករលួយនោះទេ។
លោកបន្តថា ទោះបីជាអតីតមេប៉េអឹមរូបនេះ មិនជាប់ព័ន្ធនឹងអំពើពុករលួយក៏ដោយ ប៉ុន្តែរដ្ឋាភិបាលបានបណ្តេញ លោក គឹម រស្មី ចេញពីក្របខ័ណ្ឌ ដោយសារ លោកបានសំញ៉ែងទ្រព្យសម្បត្តិចែកសែក ៥សន្លឹក ស្មើនឹង ៥០ម៉ឺនដុល្លារដល់កូនៗចំនួន ៥នាក់ ក្នុងថ្ងៃខួបកំណើត កាលពីខែកុម្ភៈ ឆ្នាំ២០១៩។
លោកថា៖«សែកដែលលោក គឹម រស្មី ចែកឲ្យលុយ ១០ម៉ឺនដុល្លារ ៥សន្លឹកឱ្យកូន៥នាក់នោះ អត់បានទៅបើកទេ ហើយសែក២សន្លឹក ដូចជាហែកចោលទៀតផង។ សែកទាំងប៉ុន្មានយើងខ្ញុំ រឹបអូសយកបានមកធ្វើជាភស្តុតាង។ កូនដែលហែកសែកចោល និយាយថា សែកនោះចង្រៃអត់លុយហើយ ឪវាអស់បុណ្យទៀត។ យើងបានហៅគាត់មកសួរចម្លើយ មើលទ្រព្យសម្បត្តិរបស់គាត់ ទាំងផ្ទះ ទាំងឡាន និងលុយដាក់នៅធនាគារទាំងអស់»
«យើងមើលទ្រព្យសម្បត្តិរបស់លោក គឹម រស្មី គឺមិនទាន់មានអ្វីដែលអាចជាបញ្ហាទេ ហើយយើងឃើញថា ៥០ម៉ឺនដុល្លារ អត់មានទេ ព្រោះលុយក្នុងធនាគាររបស់គាត់ មានមិនគ្រប់៥០ម៉ឺនដុល្លារផង បានអីបើកសែក! គឺសែកហ្នឹង អត់មានលុយទេ គឺអួតសំញ៉ែងទ្រព្យទេ ដែលបញ្ហាគាត់ខុស គឺការសំញ៉ែងទ្រព្យ។ អ៊ឹចឹងយើងខ្ញុំជម្រាបថា រាជរដ្ឋាភិបាលដកគាត់ សូជម្រាបថា នៅហុងកុង នៅប្រទេសមួយចំនួនទៀតច្បាប់ប្រឆាំងអំពើពុករលួយដាក់ទោសមន្ត្រីរាជការដែលសំញ៉ែងទ្រព្យជាប់គុក ប៉ុន្តែស្រុកខ្មែរអត់ជាប់គុកទេ គ្រាន់តែរាជរដ្ឋាភិបាលបណ្ដេញចេញ ..នៅកម្ពុជាអត់មានច្បាប់ដាក់គុកករណីសំញ៉ែងទ្រព្យនោះទេ »។
កាលពីថ្ងៃទី៩ ខែកុម្ភៈ ព្រះមហាក្សត្រចេញព្រះរាជក្រឹត្យលុបឈ្មោះអតីតមេបញ្ជាការកងរាជអាវុធហត្ថខេត្តរតនគិរី ឧត្តមសេនីយត្រី (ផ្កាយ១) លោក គឹម រស្មី ចេញពីក្របខណ្ឌកងយោធពលខេមរភូមិន្ទ បន្ទាប់ពីមានការស្នើសុំរបស់លោកនាយករដ្ឋមន្ត្រី ហ៊ុន សែន។
ការស្នើសុំលុបលោក គឹម រស្មី ចេញពីក្របខណ្ឌរដ្ឋនេះ ធ្វើឡើងក្រោយពីមានវីដេអូបង្ហោះលើបណ្តាញសង្គម ថា លោក គឹម រស្មី បានចែកលុយ ១០ម៉ឺនដុល្លារ ឱ្យកូន ៥នាក់ និងទ្រព្យសម្បត្តិជាច្រើនទៀត ក្នុងពិធីខួបកំណើតរបស់ខ្លួន។
ចំណែកស្នងការរងខេត្តកណ្ដាលលោក ស្រេង សុខា វិញ លោក ឱម យ៉ិនទៀង ថា ក៏មិនជាប់ពាក់ព័ន្ធនឹងបទល្មើសពុករលួយដែរ
លោកថា៖«ឯស្នងការនេះ ដូចគ្នា អាលុយបង្អួតនោះជាលុយរបស់ខាងស្រី ទោសសំញ៉ែកដូចគ្នាហ្នឹង»។
ដោយឡែក កាលពីថ្ងៃទី២៨ ខែកុម្ភៈ អង្គភាពប្រឆាំងអំពើពុករលួយ បានប្រកាសបើកការស៊ើបអង្កេតទៅលើទ្រព្យសម្បត្តិរបស់ស្នងការរងខេត្តកណ្ដាល ក្រោយពីមានការចែករំលែកតាមបណ្ដាញសង្គមហ្វេសប៊ុក ស្នងការរងរូបនេះបានភ្ជាប់ពាក្យជាមួយស្ត្រីម្នាក់ និងបានជូនថ្លៃបណ្ណាការជូនបណ្ណាការតម្លៃរាប់សិបម៉ឺនដុល្លារដល់គូដណ្ដឹង។
