លោកនាយករដ្ឋមន្រ្តី ហ៊ុន សែន នៅព្រឹកថ្ងៃច័ន្ទនេះ បានជម្រុញបន្ថែមទៀតទៅមន្រ្តីរបស់លោក ឲ្យតានដាន និងជួយតម្រង់ទិសដល់កុមារកំព្រា ដែលឱពុកម្តាយរបស់ពួកគេបានស្លាប់នៅក្នុងការបាក់រលំអគារ៧ជាន់នៅខេត្តព្រះសីហនុកាលពីចុងខែមិថុនានេះ។
ថ្លែងក្នុងកម្មវិធីផ្ទេរការគ្រប់គ្រងសាលាកុមារពិការភ្នែក គរ និងថ្លង់ ក្នុងរាជធានីភ្នំពេញ នៅព្រឹកថ្ងៃច័ន្ទ ទី១ ខែកក្កដានេះ លោកនាយករដ្ឋមន្រ្តី ហ៊ុន សែន បានលើកឡើងថា ការផ្តល់ថវិកាជូនគ្រួសារអ្នកស្លាប់ មានករណីខ្លះមានភាពងាយស្រួល ប៉ុន្តែ ករណីខ្លះទៀតមិនងាយស្រួលនោះឡើយ។ លោកស្នើអាជ្ញាធរពាក់ព័ន្ធទាំងអស់បន្តតាមដានលើករណីទាំងនេះបន្ថែមទៀត ដើម្បីធានាថា ថវិកាផ្តល់ជូននោះប្រើប្រាស់ចំគោលដៅ។
ដោយថ្លែងសំដៅដល់កុមារកំព្រាទាំងឱពុក និងម្តាយ ដែលបានទទួលប្រាក់ឧបត្ថម្ភពីរាជរដ្ឋាភិបាល លោក ហ៊ុន សែន លើកឡើងថា កុមារកំព្រាទាំងនោះមិនអាចប្រើប្រាស់លុយចំគោលដៅ ហើយទទូចទៅមន្រ្តីរបស់លោកឲ្យជួយតម្រង់ទិស។
លោកមានប្រសាសន៍ថា៖ «ប៉ុន្តែរឿង ដូចជាកើតឡើងនៅកំពង់ឆ្នាំងមួយករណី កើតឡើងនៅបាត់ដំបងមួយករណី ឪពុកម្តាយស្លាប់ទាំងអស់ នៅសល់កូនជាអនីតិជន។ អីចឹង យើងត្រូវទទួលខុសត្រូវតាមមើលរឿងនេះតទៅទៀត។ ដោយមិនត្រូវទុកឱ្យកូនក្មេងនេះ គ្នាមិនបានទទួលការអប់រំរៀនសូត្រនោះទេ។ អីចឹង អាជ្ញាធរគ្រប់ទីកន្លែងទាំងអស់ត្រូវតាមមើលអាបញ្ហាអស់ទាំងហ្នឹង។ ឪពុកម្តាយរបស់ពួកគាត់បានស្លាប់អស់ទៅហើយ ជួនកាលពួកគេមិនអាចប្រើលុយហ្នឹងចំគោលដៅ យើងត្រូវជួយតម្រង់ទិស»។
កាលពីថ្ងៃទី ២២ ខែមិថុនា អគារកម្ពស់៧ជាន់ ដែលជាការវិនិយោគរបស់ជនជាតិចិននៅសង្កាត់លេខ៤ ក្រុងព្រះសីហនុ បានបាក់រលំទាំងស្រុង បណ្តាលឱ្យកម្មករខ្មែរដែលស្នាក់នៅក្នុងអគារចំនួន ២៨នាក់បានស្លាប់ និង ២៦នាក់ផ្សេងទៀតរងរបួសធ្ងន់ និងស្រាល។
យោងតាមលោកនាយករដ្ឋមន្រ្តី ហ៊ុន សែន មានករណីចំនួន៣ដែលឱពុកម្តាយរបស់ពួកគេបានស្លាប់នៅក្នុងហេតុការណ៍បាក់រលំអគារនោះ។ ករណីមួយនៅខេត្តក្រចេះ គឺកូនៗរបស់ជនរងគ្រោះជានីតិជនដែលរដ្ឋាភិបាលអាចប្រគល់ប្រាក់ជូន ចំណែកករណីនៅខេត្តកំពង់ឆ្នាំង និងខេត្តបាត់ដំបង គឺកូនៗរបស់ជូនរងគ្រោះនៅជាអនីតិជន ដែលរដ្ឋាភិបាលមិនអាចប្រគល់ប្រាក់ឲ្យកុមារទាំងនោះដោយផ្ទាល់បាន។
ក្រោយហេតុការណ៍នេះ តុលាការខេត្តព្រះសីហនុ សម្រេចឃុំខ្លួន និង ចោទប្រកាន់ជនជាតិចិនចំនួន៤នាក់ ពីបទមនុស្សឃាតដោយអចេតនា បង្កឲ្យមានរបួសដោយអចេតនា និងធ្វើឲ្យខូចខាតដោយចេតនា មានស្ថានទម្ងន់ទោស ព្រមទាំងបទសមគំនិតក្នុងអំពើមនុស្សឃាតដោយអចេតនា សមគំនិតក្នុងអំពើបង្កឱ្យមានរបួសដោយអចេតនា និងសមគំនិតក្នុងអំពើធ្វើឱ្យខូចដោយចេតនា៕