សង្គមស៊ីវិលចាត់ទុកការសម្ញែងទ្រព្យសម្បត្តិរបស់អតីតមេប៉េអឹមខេត្តរតនគីរី ថាជា «រឿងចម្លែក» ក្រោយពី ACU រកមិនឃើញ​ថា ​ជាប់ពាក់ព័ន្ធ​នឹង​រឿង​ពុករលួយ

លោក​ឧត្ដមសេនីយ៍​ត្រី គឹម រស្មី (កណ្ដាល) មេ​បញ្ជាការ​កង​រាជ​អាវុធ​ហត្ថ​ខេត្ត​រតនគិរី។ រូបថត៖ ផ្ដល់​ឲ្យ

មន្ដ្រីអង្គការសង្គមស៊ីវិលហៅការសម្ញែងទ្រព្យសម្បត្តិរបស់អតីតមេប៉េអឹមខេត្ដរតនគិរី និងមន្ដ្រីនគរបាលម្នាក់ទៀតថា ជា «រឿងចម្លែក» បន្ទាប់ពីពួកគេរងការស៊ើបអង្កេតអំពីរឿងអាស្រូវពុករលួយ ប៉ុន្ដែ អង្គភាពប្រឆាំងអំពើពុករលួយរកមិនឃើញ ។​

ប្រធានអង្គភាពប្រឆាំងអំពើពុករលួយ លោក ឱម យិនទៀង បានថ្លែងក្នុងសន្និសីទសារព័ត៌មានមួយកាលពីចុងសប្ដាហ៍មុនថា ស្ថាប័នមួយនេះរកមិនឃើញថា អតីតមេប៉េអឹមខេត្តរតនគិរី លោក គឹម រស្មី និងស្នងការរងខេត្តកណ្ដាល លោក ស្រេង សុខា បានប្រព្រឹត្តអំពើពុករលួយនោះទេ។

បើតាមលោក ឱម យិនទៀង ចំណាត់ការទៅលើពួកគេទាំងពីរនាក់ គឺដោយសារតែការសម្ញែងទ្រព្យសម្បត្តិជាសាធារណៈតែប៉ុណ្ណោះ។

នាយកប្រតិបត្តិអង្គការតម្លាភាពកម្ពុជា លោក ព្រាប កុល យល់ថា ការសម្ញែងទ្រព្យសម្បត្តិរបស់លោក គឹម រស្មី គឺជារឿងចម្លែក ដោយថា លោកមិនសមអួតអាងពីទ្រព្យសម្បត្តិដែលលោកមិនមានពិតប្រាកដ ហើយប្រកាសចែកដល់កូនៗនៅក្នុងពិធីដ៏ធំមួយនោះទេ។

យ៉ាងណាក៏ដោយ លោក ព្រាប កុល សុំមិនធ្វើអត្ថាធិប្បាយណាមួយជុំវិញលទ្ធផលស៊ើបអង្កេតរបស់ ACU នោះទេ ដោយថា ទុកឲ្យមហាជនជាអ្នកវាយតម្លៃទៅចុះ។

លោកបន្ដថា៖ «វាជារឿងមួយដែលយើងយល់ថា ជារឿងចម្លែក។ ចម្លែកត្រង់ថា ឪពុកម្ដាយភូតកុហកកូនរបស់ខ្លួននៅក្នុងពិធីជប់លៀងដ៏ធំមួយ។ ប្រសិនបើជាគាត់អត់មានលុយនៅក្នុងកុងធនាគារទេ ឬអត់លុយសម្រាប់ចែកឲ្យកូន ហើយគាត់ប្រកាសក្ដែងៗចំពោះទឹកលុយ ចេញជាសែក ចេញជាអី នេះជារឿអគុណធម៌របស់ឪពុកម្ដាយ ដែលកុហកកូនជាសាធារណៈ»។

នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក​ សន ជ័យ យល់ឃើញដូចគ្នានេះ ដោយលោកថា រឿងនេះអាចមកពីការអនុវត្ដអភិក្រមទី៥ របស់លោកនាយករដ្ឋមន្ដ្រី ហ៊ុន សែន ដែលជាការវះកាត់ដកមន្ដ្រីខិលខូច ឬអសកម្មចេញពីរដ្ឋាភិបាលនោះ។

លោកបន្ដថា៖ «ពីដើមទីមក យើងដូចជាមិនបានដឹងថា ពួកគាត់ត្រូវបានចោទប្រកាន់ពីបទពុករលួយអីផងហ្នឹង។ គ្រាន់តែថា ការសម្ញែងទ្រព្យសម្បត្តិហ្នឹងប្រឈមមុខនឹងការអនុវត្តអភិក្រមរបស់រដ្ឋាភិបាលទេ។ រឿងដែលវាចម្លែកនោះត្រង់ថា មានសែកហើយ តែទៅជាសែកអត់លុយ។​ នៅក្នុងពិធីខួបកំណើត ក្នុងពិធីអាពាហ៍ពិពាហ៍ ឬភ្ជាប់ពាក្យអីនេះ ដូចជាមិនមែនពិធីត្រូវលេងសើចយករបស់ក្លែងក្លាយយកមកលេងទេ»។

VOD បានទាក់ទងអ្នកនាំពាក្យក្រសួងការពារជាតិ លោក ឈុំ សុជាតិ ប៉ុន្ដែ លោកសុំមិនធ្វើអត្ថាធិប្បាយនោះទេ ដោយថា លោកមិនសូវដឹងរឿងនេះ។

លោកបន្ដថា៖ «ទាក់ទងទៅ អេង ហ៊ី ទៅ! គាត់ដឹងរឿងច្រើន អ្នកនាំពាក្យអាវុធហត្ថ គាត់ដឹងរឿងច្រើនជាងបង»។

អ្នកនាំពាក្យកងរាជអាវុធហត្ថលើផ្ទៃប្រទេស លោក​ អេង ហ៊ី ប្រាប់ VOD ថា លោក គឹម រស្មី បានក្លាយជាពលរដ្ឋសាមញ្ញធម្មតាហើយ និងមិនស្ថិតក្នុងក្របខណ្ឌកងរាជអាវុធហត្ថនៃក្រសួងការពារជាតិនោះទេ។

លោកបន្ដថា៖ «លោក គឹម រស្មី គាត់ជាអតីតជាមេបញ្ជាការកងរាជអាវុធហត្ថខេត្តរតនៈគិរី ដែលត្រូវបានដកចេញពីតំណែងហើយ អញ្ចឹងគាត់ជាប្រជាពលរដ្ឋ ហើយខ្ញុំមិនមែនជាអ្នកនាំពាក្យឲ្យទៅគាត់ទៀតទេ បាទ!»។

កាលពីថ្ងៃទី៩ ខែកុម្ភៈ ព្រះមហាក្សត្រ​បានចេញព្រះ​រាជក្រឹត្យ​លុបឈ្មោះ​អតីតមេបញ្ជាការកងរាជអាវុធហត្ថ​ខេត្ត​រតនគិរី ឧត្តមសេនីយត្រី (ផ្កាយ១) លោក គឹម រស្មី ចេញពី​ក្របខណ្ឌ​កងយោធពល​ខេមរភូមិន្ទ បន្ទាប់​ពី​មាន​ការ​​ស្នើសុំរបស់លោ​ក​នា​យ​ករ​ដ្ឋ​ម​ន្ត្រី ​ហ៊ុន សែន។

ការ​ស្នើសុំលុបលោក គឹម រស្មី ចេញពី​ក្របខណ្ឌរដ្ឋនេះ ធ្វើឡើងក្រោយពី​​​មានវីដេអូ​បង្ហោះ​លើ​បណ្តាញ​សង្គម ថា លោក គឹម រស្មី បាន​ចែក​លុយ ឱ្យកូន ៥នាក់ ក្នុង​ម្នាក់​១០ម៉ឺនដុល្លារ ​និង​ទ្រព្យ​សម្បត្តិ​ជា​ច្រើន​ទៀត​ ក្នុង​ពិធី​ខួបកំណើ​ត​របស់ខ្លួន​។

ចំណែកស្នងការរងខេត្តកណ្ដាល លោក ស្រេង សុខា វិញ លោក ឱម យ៉ិនទៀង ថា ក៏មិនជាប់ពាក់ព័ន្ធនឹងបទល្មើសពុករលួយដែរ។ ស្នងការរងខេត្តកណ្ដាល លោក​ ស្រេង សុខា បានបង្ហោះលើ​បណ្តាញសង្គមហ្វេសប៊ុក ដោយ​បង្ហាញទ្រព្យសម្បត្តិដែលលោកផ្ដល់ជូនគូដណ្ដឹងកាលពីអំឡុងខែកុម្ភៈកន្លងទៅ។ តាម​រយៈ​ការ​បង្ហោះនោះ លោក ស្រេង សុខា បាន​ផ្តល់ថ្លៃបណ្ណាការចំនួន១០ម៉ឺនដុល្លារ ចិញ្ចៀនពេជ្រ និងរថយន្ដលុច្សស៊ីស ៥៧០មួយគ្រឿង ដែលមានតម្លៃ ២២ម៉ឺនដុល្លារអាមេរិក៕​

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ