រដ្ឋមន្ត្រីក្រសួងកសិកម្មបញ្ជាទៅអគ្គនាយកដ្ឋានសុខភាពសត្វប្រមូលជ្រូកដែលឈឺនៅតំបន់កំពុងឆ្លងរាលដាលជំងឺប៉េស្តអាហ្វ្រិកនៅក្នុងខេត្តត្បូងឃ្មុំយកទៅសម្លាប់ចោល ចៀសវាងឆ្លងទៅកាន់តំបន់ផ្សេងៗទៀត។
សេចក្ដីប្រកាសរបស់ក្រសួងកសិកម្ម រុក្ខាប្រមាញ់ និងនេសាទ ចេញផ្សាយកាលពីម្សិលមិញឱ្យដឹងថា ជំងឺប៉េស្ដជ្រូកអាហ្រ្វិកកំពុងផ្ទុះនៅភូមិកំពង់សេរី និងភូមិសោយ ឃុំមាន ស្រុកអូរាំងឪ ខេត្តត្បូងឃ្មុំ។
ក្នុងសេចក្តីប្រកាសនោះ លោក វេង សាខុន ឱ្យមន្ត្រីជំនាញបំផ្លាញជ្រូកដែលឈឺ និងមានវិធានការការពារនៅតំបន់នោះ។
ក្រសួងបានបញ្ជាក់ថា ជំងឺប៉េស្ដជ្រូកអាហ្រ្វិកមិនឆ្លងប៉ះពាល់ដល់មនុស្សទេ ប៉ុន្ដែ ជំងឺនេះបណ្ដាលឲ្យជ្រូកឈឺ និងងាប់ក្នុងអត្រាខ្ពស់រហូតដល់ ១០០% ដែលបង្កឱ្យមានការខាតបង់ធ្ងន់ធ្ងរដល់អ្នកចិញ្ចឹមប៉ុណ្ណោះ។
អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោក ចាន់ ហេង មានប្រសាន៍ថា មន្ត្រីជំនាញកំពុងធ្វើការងារនេះ ចំណែករបាយការណ៍ជាក់លាក់ពីចំនួនសត្វជ្រូកដែលត្រូវសម្លាប់មិនទាន់ដឹងច្បាស់នៅឡើយ។
លោកថា៖ «គ្រាន់តែដឹងថា ពេទ្យឱ្យមន្ត្រីជំនាញពេទ្យចុះចាត់វិធានការបសុព្យាបាលហើយ ចុះទៅបាញ់ថ្នាំហើយ ពាក់ព័ន្ធជំងឺដែលផ្ទុះជំងឺ យើងកម្ទេចចោល ហើយហាមជ្រូកមិនឱ្យចេញចូលលក់ដូរនៅក្នុងហ្នឹង ចេញពីហ្នឹងក៏មិនឱ្យ ចូលមកក៏មិនឱ្យដែរ»។
ក្រៅពីខេត្តត្បូងឃ្មុំនោះ លោក ចាន់ ហេង ថា នៅស្រុកអង្គរបុរី ខេត្តតាកែវ ក៏មានជ្រូកងាប់ដែរ ។ករណីនេះ មន្ត្រីជំនាញបានចុះបូមឈាមសត្វយកទៅពិនិត្យនៅវិទ្យាស្ថានសុខភាពសត្វ និងផលិតកម្ម ប៉ុន្តែ មិនទាន់ទទួលបានលទ្ធផលនៅឡើយ។
ប្រធានសមាគមអ្នកចិញ្ចឹមសត្វ លោក ស្រ៊ុន ពៅ មានប្រសាសន៍ថា ជំងឺប៉េស្ដជ្រូកអាហ្រ្វិកនឹងរីករាលដាលទូទាំងប្រទេសកម្ពុជានាពេលខាងមុខ បើសិនជារដ្ឋាភិបាលមិនអាចទប់ស្កាត់ការលួចនាំជ្រូកពីប្រទេសវៀតណាមបាននោះ។
លោកថា៖ «នៅកម្ពុជាយើង ខ្ញុំជាក់លាក់ថា វានឹងរីករាយដាលបន្តទៀត មិនអាចទប់ស្កាត់បានទេ ព្រោះការនាំចូលជ្រូកសេរី ដូចខ្ញុំបានជម្រាបអ៊ីចឹង រហូតដល់លួចនាំសាច់ធ្វើហើយ ដែលងាប់ មិនដឹងឈឺពីអង្កាល់ទេ យកជាសាច់ដឹកមកមួយចំហៀងៗ ថាវាគ្រប់បែបគ្រប់សកម្មភាពទាំងអស់ ដែលគាត់ធ្វើបាន គាត់នឹងធ្វើហើយ និងតាមព្រំដែនកម្ពុជា-វៀតណាម»។
លោក ស្រ៊ុន ពៅ បន្តថា បើសិនជំងឺប៉េស្តជ្រូកអាហ្វ្រិករីករាលដាលទូទាំងប្រទេសនោះ លោកថា នឹងបង្កផលប៉ះពាល់ដល់សេដ្ឋកិច្ច និងសុខភាពរបស់ប្រជាពលរដ្ឋ។ លោកបន្តថា មូលហេតុដែលមានការលួចនាំចូលជ្រូកតាមច្រកព្រំដែនពីប្រទេសវៀតណាមមកកម្ពុជានៅតែបន្តកើតមាន ដោយសារ អាជ្ញាធរឃុបឃិតគ្នាជាមួយក្រុមឈ្មួញ។
កាលពីថ្ងៃទី៣០ ខែឧសភា រដ្ឋមន្ត្រីក្រសួងកសិកម្ម លោក វេង សាខុន បានចេញសារាចរណែនាំមួយប្រាប់ឱ្យមន្ទីរកសិកម្មជាប់ព្រំដែនវៀតណាមទាំងអស់បង្កើនការប្រុងប្រយ័ត្នចំពោះការនាំចូលជ្រូកពីវៀតណាម ជាពិសេសខេត្តរតនគិរី មណ្ឌលគិរី ព្រៃវែង កំពត និងខេត្តកណ្ដាល ។
ក្រោយពីជំងឺប៉េស្តជ្រូកអាហ្វ្រិកផ្ទុះឡើងក្នុងប្រទេសចិនកាលពីខែសីហា ឆ្នាំ២០១៨ ហើយបានរីករាលដាលដល់ប្រទេសវៀតណាមនៅដើមឆ្នាំនេះ។ រហូតដល់ខែមិថុនា អាជ្ញាធរវៀតណាមសម្លាប់សត្វជ្រូកជាង ២លាន ៥សែនក្បាល ខណៈជំងឺនេះឆ្លងស្ទើរទូទាំងប្រទេស។
អាជ្ញាធរកម្ពុជាបញ្ជាក់ថា នៅក្នុងខែមីនាឆ្នាំនេះ ជំងឺប៉េស្តជ្រូកឆ្លងចូលកម្ពុជាលើកដំបូងនៅក្នុងខេត្តរតនគិរី។
