អ្នកនាំពាក្យសាលាខេត្តព្រះសីហនុ លោក ឃាង ភារម្យ ឲ្យដឹងថា ក្រោយពេលភ្លៀងធ្លាក់ខ្លាំងកាលពីថ្ងៃពុធម្សិលមិញ មានករណីបាក់សំណង់ការដ្ឋានឃ្លាំងមួយកន្លែងទៀតរបស់ជនជាតិចិនទើបសាងសង់បាន៦០ភាគរយ។
លោក ឃាង ភារម្យ ឲ្យ VOD ដឹងនៅថ្ងៃនេះថា កាលពីថ្ងៃម្សិលមិញ សំណង់ប្រភេទឃ្លាំងមួយកន្លែងដែលធ្វើឡើងពីដែក និងដំបូលប្រក់ស័ង្កសី ស្ថិតនៅភូមិថ្មី សង្កាត់លេខ៣ បានបាក់រលំ បន្ទាប់ពីមានភ្លៀងធ្លាក់ខ្លាំង ប៉ុន្ដែ លោកថា ការបាក់រលំលើកនេះ មិនបានបង្កគ្រោះថ្នាក់ដល់អាយុជីវិតមនុស្សនោះទេ។
យ៉ាងណាដ៏ដោយ លោកថា មន្ដ្រីជំនាញកំពុងសិក្សារកមូលហេតុ និងត្រួតពិនិត្យបច្ចេកទេស និងគុណភាពសំណង់ឃ្លាំងដែលបានបាក់រំលំនេះ។
លោកបន្ដថា៖ «សំណង់នេះជាមួយជាន់ទេ ផ្ទាល់ដី ហើយកំពុងសាងសង់បាន៦០ភាគរយ ការដែលបាក់នេះមិនបានបង្កគ្រោះថ្នាក់ដល់អាយុជីវិតប្រជាពលរដ្ឋទេ។ យើងអត់ទាន់កំណត់មូលហេតុបានទេ ព្រោះក្រុមការងារជំនាញកំពុងធ្វើការ សិក្សានៅលើទីតាំងនៅឡើយ»។
កាលពីថ្ងៃទី២២ ខែមិថុនាកន្លងទៅ សំណង់អគារចិនមួយកម្ពស់៧ជាន់ ស្ថិតនៅកណ្ដាលក្រុងព្រះសីហនុ បានបាក់រលំ និងសង្កត់កម្មករចំនួន ២៨នាក់ស្លាប់ និង២៦នាក់ទៀតរងរបួស។
អតីតអភិបាលខេត្តព្រះសីហនុ លោក យន្ត មីន បញ្ជាក់ថា អគារដែលបាក់នេះធ្វើឡើងដោយខុសច្បាប់ ហើយលោកបានហាមឃាត់ពីរលើកដែរ តែក្រុមហ៊ុនចិននេះមិនព្រមស្តាប់។
ក្រោយករណីបាក់អគារនេះ រដ្ឋាភិបាលបានបង្កើតគណៈកម្មការមួយ ដើម្បីឲ្យត្រួតពិនិត្យសំណង់អគារទាំងអស់នៅក្នុងខេត្តព្រះសីហនុ ដោយក្រុមការងារនេះមានសមាសភាពមន្ដ្រីចំនួន១៥នាក់ មកពីក្រសួងដែនដី ទីស្តីការគណៈរដ្ឋមន្ត្រី ក្រសួងបរិស្ថាន និងអាជ្ញាធរខេត្តព្រះសីហនុ។
ប៉ុន្ដែ ជាង១០ថ្ងៃមកហើយចាប់តាំងពីព្រឹត្តិការណ៍បាក់រលំអគារកម្ពស់៧ជាន់នេះ ក្រុមជំនាញនៅមិនទាន់បង្ហាញលទ្ធផលស៊ើបអង្កេតរបស់ខ្លួនអំពីករណីបាក់អគារ៧ជាន់នេះនោះទេ ក្រៅតែពីចំណាត់ការរបស់តុលាការខេត្តព្រះសីហនុ ដែលបានសម្រេចឃុំខ្លួនជនជាតិចិនប្រុសស្រី៤នាក់ ពីបទ «មនុស្សឃាតដោយអចេតនា» និងបទ «សមគំនិតក្នុងអំពើមនុស្សឃាតដោយអចេតនា»៕
