សមត្ថកិច្ច រារាំងអ្នកមានជម្លោះដីធ្លីមកពីខេត្តកោះកុងមិនឱ្យទៅឈរនៅក្បែររបងស្ថានទូតចិន ដោយសមត្ថកិច្ចថា ដើម្បីការពារសុវត្ថិភាពស្ថានទូត។
នៅព្រឹកនេះ អ្នកមានជម្លោះដីធ្លីមកពីស្រុកគិរីសាគរ និងបទុមសាគរ ខេត្តកោះកុង ដែលកំពុងមានជម្លោះដីធ្លីបាននាំគ្នាទៅតវ៉ានៅមុខស្ថានចិនជាថ្មីទៀត ដើម្បីឱ្យស្ថានទូតហៅម្ចាស់ក្រុមហ៊ុន ញូញៀន ឌឹវើលុបមែន គ្រុប មកបំភ្លឺ ករណីដែលក្រុមហ៊ុនចោទពួកគេថា បានទទួលសំណងរួចហើយ។ ប៉ុន្តែ ការតវ៉ានេះ ត្រូវក្រុមសមត្ថកិច្ចរារាំងដោយមិនអនុញ្ញាតឱ្យពួកគេទៅឈរនៅក្បែររបងស្ថានទូតឡើយ។
ក្រុមសន្តិសុខដែលចុះទៅរារាំងសកម្មជនដីធ្លីបានប្រាប់អ្នកសារព័ត៌មាន វី.អូ.ឌី ថា ការដែលពួកគាត់រារាំងមិនឱ្យអ្នកតវ៉ាឈរជាប់របងស្ថានទូត លោកថា ធ្វើទៅតាមបញ្ជាថ្នាក់លើ។
តំណាងពលរដ្ឋនៅឃុំកោះស្តេច ស្រុកគិរីសាគរ អ្នកស្រី សាំង ពុយ បង្ហាញការខកចិត្តចំពោះអាជ្ញាធរដែលរុញច្រាន និងចាប់ពួកគាត់មិនឱ្យឈរនៅក្បែររបងស្ថានទូតចិន។
អ្នកស្រី ថា៖ «យើងរស់នៅតាំងពីដូនតាមក សុខៗក្រុមហ៊ុនមកយក យុត្តិធម៌អត់? ពេលយើងមកទាមទារ ត្រូវអារសាច់ឈាមគ្នាឯង ពូជសាសន៍គ្នាជាន់ឈ្លីទៀត»។
ពលរដ្ឋម្នាក់ទៀត អ្នកស្រី ព្រាប រដ្ឋា លើកឡើងថា ពួកគាត់មកតវ៉ាជាថ្មីនេះ ដោយសារ រដ្ឋាភិបាល និងស្ថានទូតចិនមិនព្រមដោះស្រាយឱ្យពួកគាត់ ខណៈដែលជម្លោះដីធ្លីនេះ មានរយៈពេលជាង១០ ឆ្នាំមកហើយ។
អ្នកស្រីមានប្រសាសន៍៖ «គាត់ដេញពួកយើងតាំងពីមុខស្ថានទូតមកដល់កន្លែងហ្នឹង ហើយយើងឈរនៅមុខស្ថានទូត អត់មានបង្កបញ្ហាអ្វីដល់ចរាចរណ៍ផង។ យើងគ្រាន់តែឈរកៀនជញ្ជាំងស្ថានទូតដេញពួកយើង រុញពួកយើង ចាប់បោះដូចសត្វដូចធាតុ។ សួរថា យុត្តិធម៌នៅកន្លែងណា ការប៉ះពាល់ដីធ្លីពេលដែលពួកយើងឡើងមកតវ៉ាម្ដងៗ រុញផង ច្រានផង ស្មានតែពួកយើងចង់មក អត់មកទេ ប៉ុន្តែ វាអត់ជម្រើស។ វាអត់មានដំណោះស្រាយសម្រាប់ពួកខ្ញុំ កុហកពួកយើងម្ដងហើយម្ដងទៀតគ្មានថ្ងៃណាបានស្បើយទេ ពួកខ្ញុំឈឺចាប់ បានពួកខ្ញុំមកនេះ»។
អ្នកស្រី អះអាងថា ពួកគាត់មិនដែលទទួលបានសំណងពីក្រុមហ៊ុន ញូញៀន នោះទេ ចាប់តាំងពីជម្លោះរហូតដល់បច្ចុប្បន្ននេះ។
មន្រ្តីសម្របសម្រួលអង្គការលីកាដូប្រចាំខេត្តកោះកុង លោក ហ៊ួរ អ៊ីន ជំរុញទៅស្ថានទូតចិន និងរដ្ឋាភិបាល ត្រូវទទួលខុសត្រូវ និងដោះស្រាយសំណងជូនប្រជាពលរដ្ឋ ដើម្បីកុំឱ្យពលរដ្ឋដើរតវ៉ាដោយសារបញ្ហាដីធ្លីបន្តទៀត។
លោកថា៖ «[រដ្ឋាភិបាល]មានឆន្ទៈពិតប្រាកដក្នុងការដោះស្រាយ ក៏ដូចបង្ហាញឱ្យប្រជាជនទូទាំងប្រទេស ជារដ្ឋមន្ត្រីដែលមានចិត្តចង់ជួយប្រជាពលរដ្ឋ អាហ្នឹងគួរតែពន្លឿនក្នុងការដោះស្រាយទៅ មិនគួរឱ្យប្រជាពលរដ្ឋឡើងមកតវ៉ា ២ ខែឬ៣ ខែម្ដង នៅភ្នំពេញអ៊ីចឹងទេ។ ហើយចំពោះស្ថានទូតចិន គួរតែធ្វើការសិក្សាស្រាវជ្រាវឱ្យច្បាស់ដែរ តើពលរដ្ឋពិតជាបានទទួលសំណង ឬមិនមែន? បើសិនជាប្រជាពលរដ្ឋទទួលបានសំណង ពិតជាមានឯកសារហើយ ក្នុងការប្រគល់ និងទទួលលុយ។ អ៊ីចឹង ដោយសារ ប្រជាពលរដ្ឋមិនបានទទួលសំណង ហើយអ៊ីចឹងគាត់នៅតែបន្តតវ៉ាទៀត»។
កាលពីឆ្នាំ២០០៨ រដ្ឋាភិបាលបានសម្រេចផ្តល់ដីសម្បទានសេដ្ឋកិច្ចទំហំ ៣ម៉ឺន ៦ពាន់ហិកតា ស្ថិតនៅក្នុងស្រុកបទុមសាគរ និងស្រុកគិរីសាគរ ខេត្តកោះកុង ទៅដល់ក្រុមហ៊ុនចិន ញូញៀន ឌឹវើលុបមែន គ្រុប (Union Development Group) ដើម្បីធ្វើការអភិវឌ្ឍពាណិជ្ជកម្ម និងរមណីយដ្ឋានទេសចរណ៍ស្របតាមស្តង់ដារអន្តរជាតិ។
របាយការណ៍ និងការវិភាគផ្លូវច្បាប់របស់មជ្ឈមណ្ឌលអប់រំច្បាប់សម្រាប់សហគមន៍ (CLEC) ឆ្នាំ២០១២ បានរកឃើញថា គម្រោងផ្តល់ដីសម្បទានសេដ្ឋកិច្ចទៅឱ្យក្រុមហ៊ុនចិន ញូញៀន (UDG) បានធ្វើឱ្យប្រជាពលរដ្ឋ ១,១៤៣គ្រួសារ ត្រូវបង្ខំឱ្យបោះបង់ចោលដីធ្លីប្រមាណជាង ១០០០០ហិកតា និងផ្ទះ ១៥០០ខ្នង ត្រូវបង្ខំឱ្យរុះរើ និងឈូសឆាយ៕
