ក្រុមគ្រូពេទ្យជំនាញណែនាំឱ្យនាយករដ្ឋមន្ត្រីផ្អាកហាត់ប្រាណតាមទម្រង់ផ្សេងៗមួយរយៈ ដោយសារតែបញ្ហាជំងឺគ្រេចស្មារបស់លោកមិនទាន់ជាសះស្បើយ។
តាមសារដែលសរសេរនៅលើហ្វេសប៊ុករបស់លោកកាលពីម្សិលមិញ លោកនាយករដ្ឋមន្ត្រី ហ៊ុន សែន បញ្ជាក់ថា ពេលនេះ លោកមិនអាចហាត់ប្រាណបានដូចពេលមុនៗទៀតនោះទេ។
លោកហ៊ុនសែន៖ «តើទៅណាទៀតខ្ញុំ? ពេលមុន បន្ទាប់ពីធ្វើការរួចហើយមានកម្មវិធីហាត់ប្រាណតាមរបៀបជាច្រើន ដូចជា រត់លើម៉ាស៊ីនជិះកង់ ដើរតាមធម្មជាតិលើស១មុឺនជំហាន។ ថ្ងៃសៅរិ៍អាទិត្យមានកម្មវិធីវាយកូនគោលគួរឱ្យសប្បាយខ្លាំងណាស់។ ពេលនេះអ្វីៗត្រូវបញ្ចប់មួយរយ:តាមបញ្ជារបស់គ្រូពេទ្យ។ គិតរៀនច្រៀងដែលពេទ្យមិនហាមតែសំឡេងយើងមិន
ពីរោះ សល់ម្យ៉ាងគត់គឺថតរូបបង្ហោះ Facebook ។»
កាលពីចុងសប្តាហ៍មុន លោកនាយករដ្ឋមន្ត្រី ហ៊ុន សែន បានប្រកាសលុបការណាត់ជួបមួយចំនួនដោយសារលោកត្រូវទៅព្យាបាលជំងឺគ្រេចស្មានៅក្នុងប្រទេសសិង្ហបុរី។
