សមាគមផលិតអំបិលកំពត-កែប ឱ្យដឹងថា ក្នុងរដូវប្រាំងឆ្នាំ២០១៩នេះ សមាគមផលិតអំបិលបានតែជាង ៣ម៉ឺនតោនប៉ុណ្ណោះ ហើយត្រូវនាំចូលទំហំខ្ទង់ ៥ម៉ឺនតោនពីក្រៅប្រទេស ដើម្បីបំពេញតម្រូវការអំបិលនៅក្នុងស្រុក ទំហំប្រហែល ១០ម៉ឺនតោនក្នុងមួយឆ្នាំ។
ប្រធានសមាគមផលិតអំបិល លោក ប៊ុន បារាំង មានប្រសាសន៍ប្រាប់ VOD ថា ការផលិតអំបិលនៅឆ្នាំនេះ មានការកើនឡើងបើធៀបនឹងឆ្នាំមុន ប៉ុន្តែ លោកថា កម្ពុជានៅតែបន្តប្រឈមមុខនឹងកង្វះអំបិលដដែល ដែលលោកថា បណ្ដាលមកពីបញ្ហាអាកាសធាតុ និងកម្លាំងពលកម្ម។
បើតាមប្រធានសមាគមអំបិលរូបនេះ កម្ពុជានៅខ្វះអំបិលជាង ៧ម៉ឺនតោនទៀតសម្រាប់ចែកចាយ ហើយសមាគមគ្រោងនាំចូលអំបិលជាង ៥ម៉ឺនតោនពីក្រៅប្រទេស ដើម្បីយកមកផ្គត់ផ្គង់តម្រូវការក្នុងស្រុក។
លោក ប៊ុន បារាំង ប្រាប់ថា៖ «នៅពេលដែលយើងផលិតបានតិច បានតែប៉ុណ្ណេះតោន គឺយើងខ្វះហើយ។ អ៊ីចឹង យើងត្រូវសុំទៅក្រុមប្រឹក្សាភិបាល ដើម្បីឱ្យគាត់គិតថា ត្រូវនាំចូលប៉ុន្មានម៉ឺនតោន។ អាហ្នឹងស្រេចតែលើក្រុមប្រឹក្សាភិបាលជាអ្នកសម្រេច»។
បើតាមលោក ប៊ុន បារាំង ដើម្បីឆ្លើយតបទៅនឹងបញ្ហាកង្វះខាតអំបិលជាប់ៗគ្នានៅប៉ុន្មានឆ្នាំចុងក្រោយ លោកបានដាក់សំណើទៅក្រុមប្រឹក្សាភិបាលក្នុងការនាំចូលម៉ាស៊ីនផលិតអំបិលសម្រាប់ផលិតវិញ តែនៅមិនទាន់មានការឆ្លើយតបយ៉ាងណានោះទេ។
នាយកគ្រប់គ្រងគម្រោងកសិកម្មឈ្លាសវៃ លោក ប៊ុន សានីកា មានប្រសាសន៍គាំទ្រចំពោះការនាំចូលម៉ាស៊ីនផលិតអំបិលនេះ តែលោកបញ្ជាក់ថា បញ្ហានៃការផលិតអំបិលមិនបានគ្រប់គ្រាន់នៅកម្ពុជា មិនមែនបណ្ដាលមកពីបញ្ហាអាកាសធាតុនោះទេ គឺបញ្ហាខ្វះកម្លាំងពលកម្ម និងតម្លៃដែលធ្វើបានមានកម្រិតទាប។
លោកព្រមានថា ប្រសិនជាកម្ពុជានៅតែមានបញ្ហានេះបន្តទៀតនោះ វានឹងធ្វើឱ្យប៉ះពាល់ដល់អនាគតអំបិលកម្ពុជា ដែលធ្វើឱ្យមានការនាំចូលច្រើនជាងការផលិត ឬនាំចូលសុទ្ធ ដែលនៅពេលនោះហើយ ធ្វើឱ្យតម្លៃអំបិលនៅលើទីផ្សារ គឺត្រូវបានកំណត់តាមអ្នកនាំចូលវិញម្តង។
លោក សានីកា ប្រាប់ថា៖ «យ៉ាងយូរប្រាំឆ្នាំទៀត គឺអំបិលលែងមានហើយ។ យើងចាប់ផ្ដើមទិញអំបិលពីគេហើយ ហើយអំបិល គឺជាវត្ថុធាតុមួយដែលមនុស្សត្រូវការបំផុត ហើយគេអាចខ្ទប់ច្រមុះយើងយ៉ាងងាយ ព្រោះអំបិលអ្នកណាក៏ត្រូវការដែរ។ លោកសម្លឹងមើលប្រទេសឡាវអត់មានអំបិលនឹងគេទេ! ដូច្នេះ គេចង់ថា តម្លៃប៉ុន្មានក៏បានដែរ យើងត្រូវតែទិញដាច់ខាត។ ដូច្នេះ គួរតែរក្សាអំបិលរបស់យើងឱ្យមានបាន ព្រោះបើយើងមិនថែរក្សាទេ គេយកដីហ្នឹងទៅធ្វើផ្ទះល្វែង ទៅធ្វើជារមណីយដ្ឋានអីហើយ ហើយចុងក្រោយយើងគ្មានអីទេ»។
លោកជំរុញឱ្យរដ្ឋាភិបាលប្រមូលទិន្នន័យនៃផ្ទៃដីស្រែអំបិលដែលសល់ និងហាមឃាត់រាល់ការលក់ផ្ទៃដីស្រែអំបិលទាំងអស់នេះ ធ្វើការគាំទ្រជំរុញទីផ្សារអំបិល គាំទ្រដល់តម្លៃអំបិល និងតម្លៃពលកម្មផងដែរ។
VOD មិនទាន់អាចសុំការឆ្លើយបំភ្លឺពីអ្នកនាំពាក្យក្រសួងឧស្សាហកម្ម និងសិប្បកម្ម លោក អ៊ុំ សុថា និងអនុរដ្ឋលេខាធិការក្រសួង លោក សុន សេងហួត ដែលទទួលបន្ទុកផ្នែកអំបិលនេះបាននៅឡើយទេ ដោយលោកទាំងពីរប្រាប់ថា លោកជាប់ប្រជុំ។
កម្ពុជាជួបប្រទះបញ្ហាខ្វះខាតអំបិលចំនួន ៣ឆ្នាំហើយ ពោលគឺចាប់តាំងពីឆ្នាំ២០១៧មក ខណៈក្នុងឆ្នាំ២០១៨ សមាគមផលិតអំបិលកំពត-កែប បានដាក់លិខិតទៅក្រសួងឧស្សាហកម្ម ដើម្បីរំលាយចោលផងដែរ តែក្រសួងមិនអនុញ្ញាត។
បច្ចុប្បន្ន កម្ពុជាមានកសិដ្ឋានផលិតអំបិល ៧កន្លែងក្នុងខេត្តកែប និងកំពត ដោយមានផ្ទៃដីសរុបចំនួន ៤៦០០ហិកតា ក្នុងនោះមានក្រុមផលិតករជាង ២០០នាក់៕
