លោកនាយករដ្ឋមន្ត្រីលើកឡើងពីកង្វល់ក្នុងវិស័យកសិកម្មប្រាប់ទៅអង្គការមូលនិធិអន្តរជាតិសម្រាប់ការអភិវឌ្ឍន៍កសិកម្ម(IFAD) ហើយស្នើអង្គការនេះ ជួយចែករំលែកបទពិសោធន៍ដើម្បីដោះស្រាយឱ្យប្រជាជនកម្ពុជា។
នៅក្នុងជំនួបជាមួយប្រធានអង្គការIFADកាលពីម្សិលមិញ លោកនាយករដ្ឋមន្ត្រីហ៊ុន សែន លើកឡើងថា កម្ពុជាមានក្តីកង្វល់ក្នុងវិស័យកសិកម្មពីរចំណុចគឺ ផលិតកម្ម និង បរិមាណនាំចេញទៅកាន់គោលដៅ។ លោកលើកឡើងថា កម្ពុជាធ្លាប់មានគម្រោងនាំចេញអង្ករ១លានតោន ប៉ុន្តែថា សម្រេចបានតែ៥០ភាគរយប៉ុណ្ណោះ។
ក្រៅពីក្តីកង្វល់ធំនេះ លោកនាយករដ្ឋមន្ត្រីក៏បានលើកឡើងក្តីកង្វល់ដទៃទៀតដូចជា ពលរដ្ឋកើនឡើងខ្វះដីដាំដុះ និង បញ្ហាប្រែប្រួលអាកាសធាតុ ដោយកម្តៅឡើងរហូតដល់៤២អង្សារអាចបំផ្លាញដល់ដំណាំកសិកម្ម។
របាយការណ៍ក្រសួងកសិកម្មបង្ហាញថា គិតត្រឹមចុងខែកក្កដានេះ ខេត្តដែលរាំងស្ងួតជាងគេមានផ្នែកខ្លះនៃខេត្តពោធិ៍សាត់ បាត់ដំបង បន្ទាយមានជ័យ ឧត្តរមានជ័យ សៀមរាប កំពង់ធំ កំពង់ចាម ត្បូងឃុំ ស្វាយរៀង និងព្រៃវែង ដែលរងផលប៉ះពាល់ស្រូវប្រហែល១៥ម៉ឺនហិកតា៕
