ប្រទេសកូរ៉េខាងជើង នៅព្រឹកនេះ បានបាញ់បង្ហោះជាថ្មីនូវមីស៊ីលរយៈចម្ងាយខ្លីពីរគ្រាប់សំដៅទៅសមុទ្រជប៉ុន។
សារព័ត៌មាន KN News ដែលមានមូលដ្ឋាននៅកូរ៉េខាងត្បូង បានដកស្រង់សេចក្តីថ្លែងការណ៍របស់អគ្គសេនាធិការចម្រុះរបស់កូរ៉េខាងត្បូងមកចុះផ្សាយថា នៅព្រឹកព្រហាមថ្ងៃពុធនេះ ក្រុមយោធារបស់ខ្លួនបានរកឃើញថា មីស៊ីលរយៈចម្ងាយខ្លីចំនួនពីរគ្រាប់ត្រូវបានបាញ់បង្ហោះឡើងចេញពីឆ្នេររបស់កូរ៉េខាងជើង។
ប្រភពដដែលឲ្យដឹងថា មីស៊ីលទាំងពីរនេះត្រូវបានបាញ់ឡើងក្នុងកម្ពស់៣០គីឡូម៉ែត្រ និងរយៈចម្ងាយប្រហែល២៥០គីឡូម៉ែត្រ។ អគ្គសេនាធិការចម្រុះរបស់កូរ៉េខាងត្បូង បានលើកឡើងក្នុងសេចក្តីថ្លែងការណ៍នោះថា ការបាញ់បង្ហោះមីស៊ីលរបស់កូរ៉េខាងជើងនេះ បានបំផ្លាញកិច្ចខិតខំប្រឹងប្រែងក្នុងការបន្ធូរបន្ថយភាពតានតឹងផ្នែកយោធានៅឧបទ្វីបកូរ៉េ។ ជាមួយគ្នានេះ កូរ៉េខាងត្បូង បានអំពាវនាវឲ្យកូរ៉េខាងជើងបញ្ឈប់រាល់ការបាញ់បង្ហោះមីស៊ីលជាបន្ទាន់។
កាលពីថ្ងៃទី២៥ ខែកក្កដា កូរ៉េខាងជើង ក៏បានបាញ់បង្ហោះមីស៊ីលរយៈចម្ងាយខ្លីចំនួនពីរគ្រាប់ផងដែរ។
មន្រ្តីក្រសួងការពារជាតិកូរ៉េខាងត្បូង បានប្រាប់ទីភ្នាក់ងារសារព័ត៌មានរ៉យទ័រថា មីស៊ីលដែលបាញ់នៅថ្ងៃពុធនេះ អាចជាប្រភេទដូចគ្នានឹងមីស៊ីលដែលបាញ់បង្ហោះកាលពីសប្តាហ៍មុន។ ទោះយ៉ាងណា ក៏មន្រ្តីក្រសួងការពារជាតិកូរ៉េខាងត្បូងដដែលនេះ មិនទាន់អាចបញ្ជាក់លំអិតពីព័ត៌មានជុំវិញមីស៊ីលទាំងនោះទេ ដោយថា កំពុងធ្វើការលើបញ្ហានេះ។
នាយករដ្ឋមន្រ្តីជប៉ុន លោក Shinzo Abe បានអះអាងថា សកម្មភាពបាញ់បង្ហោះមីស៊ីលរបស់កូរ៉េខាងជើងនៅព្រឹកនេះ មិនបានប៉ះពាល់ដល់សន្តិសុខជាតិខ្លួនឡើយ។ លោកបន្តថា ជប៉ុននៅតែបន្តធ្វើកិច្ចសហប្រតិបត្តិការជិតស្និទ្ធជាមួយសហរដ្ឋអាមេរិក និងបណ្ដាប្រទេសផ្សេងៗទៀត។
ការបាញ់បង្ហោះមីស៊ីលពីសំណាក់កូរ៉េខាងជើង ធ្វើឡើងតែប៉ុន្មានថ្ងៃប៉ុណ្ណោះមុនពេលដែលប្រទេសកូរ៉េខាងត្បូង និងសហរដ្ឋអាមេរិកធ្វើសមយុទ្ធយោធាជាមួយគ្នា៕
