អ្នកស្រាវជ្រាវពីការអភិវឌ្ឍន៍សង្គមលើកឡើងថា ធនធានមនុស្សចូលបម្រើការងារនៅតាមវិស័យនានា ដែលមិនមានសីលធម៌គឺមិនបានជួយឱ្យសង្គមរីកចម្រើនទេ ហើយផ្ទុយទៅវិញជាបន្ទុកបង្កគ្រោះថ្នាក់។
នៅក្នុងកិច្ចពិភាក្សាមួយរៀបចំដោយមជ្ឈមណ្ឌលសិទ្ធិមនុស្សកម្ពុជាកាលពីម្សិលមិញ លោក ប៉ា ចន្ទរឿន លើកឡើងថា សង្គមនឹងមានគ្រោះថ្នាក់កាន់តែធ្ងន់ធ្ងរនៅពេលសមាជិកនៃសង្គមនោះកាន់តែច្រើនមិនមានសីលធម៌។
លោក ប៉ា ចន្ទរឿន ស្នើឱ្យមានការពង្រឹងសីលធម៌នៅក្នុងកម្មវិធីអប់រំ ហើយថា បើសិស្សណាដែលប្រឡងធ្លាក់សីលធម៌មិនត្រូវអនុញ្ញាតឱ្យជាប់ទេ ទោះសិស្សនោះចេះមុខវិជ្ជាផ្សេងៗទៀតក៏ដោយ។
លោកប៉ា ចន្ទរឿន៖«មុននឹងឱ្យសិស្សចប់ឌីផ្លូម ចប់បាក់ឌុប គ្រឹះស្ថានមធ្យមសិក្សា បឋមភូមិ ឬទុតិយកភូមិហ្នឹង ត្រូវតម្រូវឱ្យប្រឡងមុខវិជ្ជាសីលធម៌។ បើពួកគាត់ធ្លាក់សីលធម៌មិនបាច់ឱ្យពូកគាត់ជាប់ទេ ព្រោះធនធានណាដែលបង្កើតឡើងដោយមិនមានសីលធម៌នឹងក្លាយជាបន្ទុកបន្ថែមសម្រាប់សង្គម។»
លោក ប៉ា ចន្ទរឿន ឱ្យដឹងទៀតថា ពេលនេះ លោកកំពុងតែសិក្សាស្រាវជ្រាវក្រមសិលធម៌លើអ្នកប្រើប្រាស់បណ្តាញសង្គមហ្វេសប៊ុក ហើយលទ្ធផលបឋមបង្ហាញថា ៧០ភាគរយសីលធម៌ធ្លាក់ចុះ។
