ក្រុមបរិស្ថាននិយម បង្ហាញក្ដីបារម្ភពីផលប៉ះពាល់លើជីវភាពប្រជាពលរដ្ឋ បន្ទាប់ពីទ្វារទឹកនៃទំនប់វារីអគ្គិសនីចំនួន ២ នៅក្នុងខេត្តកំពត និងកោះកុង ត្រូវបានបើកដោយពុំមានការជូនដំណឹងជាមុនឲ្យបានត្រឹមត្រូវសម្រាប់ប្រជាពលរដ្ឋនោះឡើយ ដែលបណ្ដាលឱ្យទឹកជន់លិចស្រុកមួយចំនួនក្នុងខេត្តទាំងពីរនេះចាប់ពីថ្ងៃម្សិលមិញនេះ។
ក្រុមហ៊ុនទំនប់វារីអគ្គិសនីកំចាយ ស្ថិតនៅខេត្តកំពត បានប្រកាសប្រាប់ពលរដ្ឋឱ្យប្រុងប្រយ័ត្នពីទឹកជំនន់នៅថ្ងៃទី១០ ខែសីហា គឺដំណាលគ្នានឹងពេលដែលក្រុមហ៊ុននេះ បើកទឹកទំនប់កំចាយដែរ។ ក្រុមហ៊ុនប្រាប់ពលរដ្ឋនៅកំពតថា ដោយសារតែភ្លៀងខ្លាំងពេក ទំនប់ទប់មិនជាប់។
មន្ទីររ៉ែ និងថាមពលខេត្តកោះកុង បានចេញសេចក្ដីប្រកាសព័ត៌មានស្ដីពីការសម្រេចបើកទ្វាទឹកទំនប់វារីអគ្គិសនីស្ទឹងតាតៃនៅថ្ងៃទី១១ ខែសីហានេះ ដោយបញ្ជាក់ថា នឹងបើកទ្វារទឹកចំនួន៣ ដែលមានកម្ពស់ទឹក ២ម៉ែត្រ ២តឹក។ លិខិតជូនដំណឹងនោះ ក៏ចុះហត្ថលេខាថ្ងៃទី១១សីហានោះដដែលដែរ។
ទ្វារទំនប់វារីអគ្គិសនីកំចាយនៅកំពត និងស្ទឹងតាតៃនៅកោះកុង ត្រូវបានសម្រេចបើក ដើម្បីរំដោះទឹកចេញអាងស្ទុក ជាហេតុនាំឱ្យលំនៅឋានផ្ទះសម្បែង ប្រជាពលរដ្ឋជាច្រើនគ្រួសារនៅខេត្តកំពត និងកោះកុង ត្រូវជន់លិច។ ក្រុមគ្រួសារអ្នកភូមិជាច្រើននាក់ និងសត្វចិញ្ចឹមរាប់ពាន់ក្បាល ត្រូវជម្លៀសចេញទៅកាន់ទីសុវត្ថិភាព។
អ្នកពិគ្រោះយោបល់ឯករាជ្យផ្នែកធនធានទន្លេ និងបរិស្ថាន លោក ហែម ឧត្តម មានប្រសាសន៍ថា អាជ្ញាធរខេត្ត ដែលមានទំនប់វារីអគ្គិសនីគួរណាស់តែពង្រឹងបន្ថែមលើប្រព័ន្ធផ្ដល់ព័ត៌មានពីគ្រោះអាសន្ន ទៅដល់ពលរដ្ឋដែលរស់នៅខាងក្រោមទំនប់វារីអគ្គិសនី។ លោកបន្តថា បើសិនជាយន្តការផ្ដល់ព័ត៌មានជូនពលរដ្ឋនៅតែទន់ខ្សោយនោះ នឹងពលរដ្ឋកាន់តែប្រឈមនឹងគ្រោះថ្នាក់ធ្ងន់ធ្ងរ។
លោក ហែម ឧត្តម ប្រាប់ថា៖ «ខ្ញុំគិតថា គ្មានអ្វីប្រសើរជាងការផ្ដល់ព័ត៌មានជូនពលរដ្ឋទេ នៅពេលដែលមានទំនប់វារីអគ្គិសនីរួចមកហើយនោះ។ កាលពីអំឡុងឆ្នាំ៩០ជាង ប្រជាពលរដ្ឋនៅខេត្តរតនគិរីរងគ្រោះធ្ងន់ធ្ងរម្ដងរួចហើយដោយសារបាក់ទំនប់វារីអគ្គិសនីនៅវៀតណាមហើយគ្មានអ្នកណាប្រាប់អ្នកនៅខាងក្រោម។ ឆ្នាំនេះ នៅកំពត កោះកុងសុទ្ធតែមានទឹកជន់ដោយសារបើកទំនប់ ព្រោះទំនប់ទប់ទឹកភ្លៀងមិនជាប់ បើមានការព្យាករណ៍មុន ហើយជូនព័ត៌មានទៅដល់អ្នកភូមិនោះ មិននាំឱ្យខូចខាតទ្រព្យសម្បត្តិធ្ងន់ធ្ងរ ឬប៉ះពាល់ដល់អាយុជីវិតពលរដ្ឋទេ»។
វីអូឌីមិនអាចទាក់ទងក្រុមហ៊ុនទំនប់វារីអគ្គិសនីតាតៃ និងកំចាយ ដើម្បីសាកសួរព័ត៌មានបន្ថែមពីបញ្ហានេះបានទេនៅថ្ងៃទី១១សីហានេះ។
ទាក់ទងនឹងបញ្ហានេះ អ្នកនាំពាក្យសាលាខេត្តកោះកុង លោក សុខ សុធី មានប្រសាសន៍ថា បច្ចុប្បន្នខេត្តកោះកុង មានយន្តការច្រើនរួចហើយដើម្បីផ្ដល់ព័ត៌មានពីគ្រោះទឹកជំនន់ទៅកាន់ប្រជាពលរដ្ឋ ប៉ុន្តែ លោកទទួលស្គាល់ថា ពលរដ្ឋនៅតាមចម្ការ ឬនៅតំបន់ដែលមិនមានសេវាទូរស័ព្ទពិតជាពិបាកទទួលព័ត៌មានមែន។
លោក សុខ សុធី ប្រាប់ថា៖ «មកដល់ពេលនេះ(៤និង៤០នាទី) ទឹកឡើងកំហុគដែរនៅតាមស្ទឹងតាតៃ ប៉ុន្តែ គ្រោះមហន្តរាយនេះ យើងបានត្រៀម និងគ្រប់គ្រងបាន គឺមិនមានពលរដ្ឋណាម្នាក់រងគ្រោះទេ។ សមត្ថកិច្ចបានជម្លៀសពួកគាត់មកកាន់ទួលសុវត្ថិភាពហើយ។ យើងមានWhatsApp តេឡេក្រាម និងហ្វេសប៊ុក មានការអីយើងមិនពិបាកទេ យើងបញ្ជូនទៅហើយអ្នកនៅក្នុងហ្នឹងទទួលខុសត្រូវរៀងៗខ្លួនបញ្ជូនព័ត៌មានបន្ត»។
ទោះជាយ៉ាងណាក្ដី យុវជនឃ្លាំមើលបរិស្ថាន លោក សាន់ ម៉ាឡា លើកឡើងថា អាជ្ញាធរគួរណាស់តែធ្វើការជាមួយក្រុមហ៊ុនវារីអគ្គិសនី ដោយបង្កើតប្រព័ន្ធប្រកាសអាសន្នប្រកាសព័ត៌មានឱ្យប្រជាពលរដ្ឋរស់នៅក្រោមទំនប់បានដឹង និងជៀសវាងគ្រោះថ្នាក់ផ្សេងៗមិនថា តែពេលទឹកឡើងខែវស្សារនោះទេ។ លោកបន្តថា នៅពេលភ្លៀងខ្លាំង ទំនប់វារីអគ្គិសនីតែងកើនកម្ពស់ទឹក ហើយទំនប់ទាំងនោះទប់មិនជាប់ ហើយចាំបាច់ត្រូវបើកបង្ហូរមកក្រោម។
លោក សាន់ ម៉ាឡា ប្រាប់ថា៖ «អាជ្ញាធរគួរណាស់ផ្ដល់ដំណឹងតាមសារ៉ែន ឬមីក្រូលឺៗជូនប្រជាពលរដ្ឋនៅតាមចុងកាត់មាត់ញក ឱ្យពួកគាត់បានដឹងផង។ ការប្រកាសតាមហ្វេសប៊ុកនេះ មិនគ្រប់គ្រាន់ទេ ពួកគាត់អត់មានហ្វេសប៊ុកប្រើឡើយ។ មែនទែនទៅ យើងធ្លាប់ឃើញវីដេអូតាមហ្វេសប៊ុក ប្រជាពលរដ្ឋដែលទៅលេងទឹក(ទឹកឈូរ) ហើយទឹកទំនប់បើមក នាំឱ្យពលរដ្ឋលង់ទឹកទៀតផង។ អាជ្ញាធររដ្ឋចាំបាច់ត្រូវធ្វើរឿងនេះ»។
អ្នកគ្រប់គ្រងភោជនីយដ្ឋានមួយនៅរមណីយដ្ឋានតាតៃ លោក សាត់ ពិសិដ្ឋ មានប្រសាសន៍ថា កាលពីឆ្នាំ២០១៧ ហាងរបស់លោកត្រូវទឹកហូរបោកខូចខាតបង់ថវិកាជាច្រើនពាន់ដុល្លារ។កាលនោះ ក្រុមហ៊ុនចិនបើកទឹកទំនប់វារីអគ្គិសនីដោយមិនបានប្រាប់អ្នកភូមិរស់នៅតាមមាត់ទឹក។ លោកបន្តថា កាលពីម្សិលមិញ មេភូមិថា ទូរសព្ទប្រាប់លោកពីករណីទឹកឡើងនៅតំបន់អាងទំនប់វារីអគ្គិសនីទើបធ្វើឱ្យលោកចាត់វិធានការបន្ទាន់ដើម្បីការពារគ្រោះថ្នាក់។
លោក សាត់ ពិសិដ្ឋ ប្រាប់ថា៖ «យប់មិញ មេភូមិតេប្រាប់ខ្ញុំ ទើបខ្ញុំរៀបចំរួចរាល់។ ខ្ញុំអត់ហ៊ានដាក់ភ្ញៀវនៅជាន់ក្រោមទេ ខ្លាចទឹកឡើងដោយប្រការណាមួយ ។ បើសិនជាគ្មានអ្នកប្រាប់ទេ នឹងលំបាកហើយ។ ខ្ញុំគិតថា ការផ្ដល់ព័ត៌មានដល់អ្នករស់នៅក្រោមទំនប់នេះសំខាន់ណាស់ ព្រោះទឹកធំណាស់ បើយើងមិនដឹង អាចស្លាប់បាន»។
គណៈកម្មាធិការជាតិគ្រប់គ្រងគ្រោះមហន្តរាយ បញ្ជាក់ថា ក្នុងខែសីហាឆ្នាំ២០១៨នេះ ពលរដ្ឋរាប់ពាន់គ្រួសាររងគ្រោះដោយទឹកជំនន់ភ្លៀង ក្នុងនោះរួមមាន ខេត្តកោះកុង កំពត រតនគីរី ក្រុងព្រះសីហនុ។ ពលរដ្ឋរាប់ពាន់គ្រួសារត្រូវជម្លៀសទៅកាន់ទីសុវត្ថិភាពហើយទំហំខូចខាតទ្រព្យសម្បត្តិមិនទាន់បង្ហាញជាតួរលេខនៅឡើយ។ គណៈកម្មការនេះ ធ្វើការផ្តល់ព័ត៌មានចែកចាយបន្តតាមរដ្ឋបាលខេត្ត ស្រុក ឃុំ ហើយឃុំសង្កាត់បញ្ជូនព័ត៌មានទៅមេភូមិនិមួយៗ។
បច្ចុប្បន្ន កម្ពុជាមានទំនប់វារីអគ្គិសនីនៅកម្ពុជាសាងសង់រួចចំនួន ៧ ដែលមានប្រជាពលរដ្ឋរាប់ម៉ឺនគ្រួសាររស់នៅខាងក្រោមទំនប់។ ទំនប់ទាំងនោះរួមមានផ្ទុកធាទឹករាប់លានម៉ែត្រត្រីគុណ។ ទំនប់ទាំងនោះរួមមាន ទំនប់វារីអគ្គិសនីសេសានក្រោម២ ទំនប់វារីអគ្គិសនី គិរីរម្យ ១, ទំនប់វារីអគ្គិសនី គិរីរម្យ ៣, ទំនប់វារីអគ្គិសនី ទំនប់កំចាយ, ទំនប់វារីអគ្គិសនី ទំនប់អាតៃ, ទំនប់វារីអគ្គិសនីតាតៃ និងទំនប់វារីអគ្គិសនីឫស្សីជ្រុំក្រោម៕
