តំណាងប្រជាពលរដ្ឋមានជម្លោះដីធ្លីមកពីខេត្តកោះកុង អះអាងថា ស្ថានទូតចិនបដិសេធមិនជួយអន្តរាគមន៍ដោះស្រាយបញ្ហាដីធ្លីឱ្យពួកគេ ដោយថា ករណីនេះ ហួសពីសមត្ថកិច្ចរបស់ស្ថានទូត។
ការបដិសេធនេះ ធ្វើឡើងបន្ទាប់តំណាងពលរដ្ឋ ២ នាក់មកពីស្រុកគិរីសាគរ និងបទុមសាគរ ដែលកំពុងមានជម្លោះដីធ្លីជាមួយក្រុមហ៊ុន ញូញៀន របស់ចិន បានប្រមូលផ្តុំគ្នាមុខស្ថានទូតចិនជាថ្មីទៀតនៅថ្ងៃនេះ ដើម្បីជំរុញទៅស្ថានទូតឱ្យដាក់សម្ពាធលើក្រុមហ៊ុនឱ្យដោះស្រាយវិវាទដីធ្លីដល់ពួកគេ ខណៈជម្លោះដីធ្លីបានអូសបន្លាយអស់រយៈពេល១១ ឆ្នាំមកហើយ។
អ្នកស្រី សាំង ពុយ អះអាងថា ជាតំណាងពលរដ្ឋនៅឃុំកោះស្តេច ប្រាប់អ្នកសាព័ត៌មានបន្ទាប់ពីជួបជាមួយតំណាងស្ថានទូតចិនថា ស្ថានទូតមិនអាចដោះស្រាយបញ្ហាវិវាទដីធ្លីនេះបានទេ ដោយពួកគាត់ឱ្យទៅរកកិច្ចអន្តរាគមន៍ពីរដ្ឋាភិបាលវិញ។
អ្នកស្រី មានប្រសាសន៍ថា៖«គាត់ច្រានចោលស្ថាប័នរដ្ឋដែលពាក់ព័ន្ធ ប៉ុន្តែអ្វីដែលយើងលើកហ្នឹង គាត់នឹងជូនដំណឹងទៅក្រុមហ៊ុន ហើយជូនដំណឹងទៅស្ថាប័នរដ្ឋ គាត់និយាយអ៊ីចឹង[ឱ្យស្ថាប័នរដ្ឋ]ជាអ្នកដោះស្រាយ ព្រោះគាត់មិនមែនកិច្ចការរបស់គាត់!គាត់និយាយអ៊ីចឹង»។
អ្នកស្រី សាំង ពុយ បន្តថា ពួកគាត់នឹងនាំគ្នាស្វែងរកកិច្ចអន្តរាគមន៍ពីក្រសួងដែនដី និងស្ថាប័នពាក់ព័ន្ធផ្សេងទៀត ដើម្បីស្ថាប័នទាំងនោះ ជួយរកដំណោះស្រាយបញ្ហាដីធ្លីជូនពួកគាត់។
ពលរដ្ឋម្នាក់ទៀតអ្នកស្រី ផា ភួង លើកឡើងថា ចាប់ពីឆ្នាំពី២០០៨ រហូតដល់បច្ចុប្បន្ន ក្រុមហ៊ុននេះ មិនបានដោះស្រាយសំណង ហើយ ថែមទាំងមិនឱ្យពួកគាត់ចូលបង្កបង្កើនផល និងសាងសង់ផ្ទះលើដីរបស់ខ្លួនដែរ។
អ្នកស្រីមានប្រសាសន៍ថា៖«ពួកខ្ញុំរងគ្រោះមកចូល១១ ឆ្នាំហើយ ពួកខ្ញុំកាន់តែដុនដាបទៅៗពី១ ឆ្នាំទៅ ១ ឆ្នាំ ទី១ មានកូន ទី២ កូនមួយទៀតទុកនៅម៉ែ ទី៣ ខ្ញុំអត់សូវដែលបានរក[ស៊ី]អីបាន ច្រើនទេ អ៊ីចឹង ខ្វះខាតលុយចងការគេ។ បើពីមុនមក ក្រុមហ៊ុន មិនទាន់ចូលពី១ ឆ្នាំទៅ ១ ឆ្នាំ ខ្ញុំទៅប៉ះដំណាំដំាដុះលក់បានរហូត តែឥឡូវអត់បានទេ ហើយជំពាក់គេទៀត»។
អភិបាលរងខេត្តកោះកុង លោក សុខ សុធី អះអាងថា ពលរដ្ឋដែលឡើងមកតវ៉ានេះ មួយចំនួនរស់ក្នុងតំបន់ការពារ និងមួយចំនួនទៀតជាពលរដ្ឋក្រៅមូលដ្ឋាន ដែលអាជ្ញាធរខេត្តពិបាកក្នុង ផ្តល់ដំណោះស្រាយ។
លោកមានប្រសាសន៍ថា៖«វាជាដីឧទ្យាន ហើយប្រជាពលរដ្ឋដែលគាត់នៅទីនោះគឺនៅក្នុងដីឧទ្យាន ហើយរដ្ឋាភិបាកវិនិយោគទៅឱ្យក្រុមហ៊ុន។ រីឯការប៉ះពាល់កន្លងមក យើងមានគោលនយោបាយដោះស្រាយសម្រាប់តែអ្នកនៅក្នុងមូលដ្ឋាន ហើយសម្រាប់ពួកគាត់តវ៉ានោះ គឺជាអ្នកនៅក្រៅមូលដ្ឋាន គោលនយោបាយអត់មានដោះស្រាយជូនទេ ប៉ុន្តែថ្នាក់ក៏មិនប្រងើយកន្តើយដែរ ក៏បានធ្វើរបាយការណ៍ជូនទៅគ្រប់ថ្នាក់ដឹកនាំពាក់ព័ន្ធទាំងអស់ ដើម្បីគិតយ៉ាងដូចម្ដេចសម្រេចយ៉ាងដូចម្ដេចអាស្រ័យទៅលើថ្នាក់ដឹកនាំថ្នាក់ជាតិ»។
អ្នកនាំពាក្យក្រសួងដែនដីលោក សេង ឡូត មានប្រសាសន៍ថា លោកជាប់រវល់ប្រជុំ។
អ្នកនាំពាក្យសមាគមអាដហុកលោក ស៊ឹង សែនករុណា ជំរុញឱ្យរដ្ឋាភិបាលនិងស្ថានទូតចិនត្រូវទទួលខុសត្រូវនិងដោះស្រាយសំណងជូនប្រជាពលរដ្ឋ ដើម្បីកុំឱ្យពលរដ្ឋក្លាយជាជនរងគ្រោះ ដោយសារការវិនិយោគក្រុមហ៊ុនចិន។
លោកមានប្រសាសន៍ថា៖«ពិតជាមានពលរដ្ឋរបស់ខ្លួនត្រូវបានរំលោភបំពានឬប៉ះពាល់ទៅលើដីធ្លីពួកគាត់នៅក្នុងការអភិវឌ្ឍគម្រោងក្រុមហ៊ុនចិននៅតំបន់ហ្នឹង។ អ៊ីចឹងបើយើងមានការទទួលស្គាល់ថាពួកគាត់មានការប៉ះពាល់ ឬមានបណ្ដឹងកើតឡើងយើងមិនទាន់អាចសន្និដ្ឋានប៉ះឬមិនប៉ះគួរតែមានការសិក្សាបញ្ហាពួកគាត់ឱ្យបានដិតដល់ហើយរកដំណោះស្រាយដើម្បីបញ្ចប់រឿងជៀសវាងការចេះតែអូសបន្លាយឱ្យពួកគាត់ដើរទាមទារតវ៉ាអ៊ីចឹងរហូត។ អ៊ីចឹងហើយ ក្នុងនាមការទទួលខុសត្រូវរបស់អាជ្ញាធរពាក់ព័ន្ធទាំងអស់ហ្នឹង ហាក់មិនបានយកចិត្តទុកដាក់ក្នុងការបំពេញតួនាទីនិងការងាររបស់ខ្លួន»។
កាលពីឆ្នាំ ២០០៨ រដ្ឋាភិបាលបានសម្រេចផ្តល់ដីសម្បទានសេដ្ឋកិច្ចទំហំ ៣ម៉ឺន ៦ពាន់ហិកតា ស្ថិតនៅក្នុងស្រុកបទុមសាគរ និងស្រុកគិរីសាគរ ខេត្តកោះកុង ទៅដល់ក្រុមហ៊ុនចិន ញូញៀន ឌឹវើលុបមែន គ្រុប (Union Development Group) ដើម្បីធ្វើការអភិវឌ្ឍពាណិជ្ជកម្ម និងរមណីយដ្ឋានទេសចរណ៍ស្របតាមស្តង់ដារអន្តរជាតិ។
របាយការណ៍ និងការវិភាគផ្លូវច្បាប់របស់មជ្ឈមណ្ឌលអប់រំច្បាប់សម្រាប់សហគមន៍ (CLEC) ឆ្នាំ២០១២ បានរកឃើញថា គម្រោងផ្តល់ដីសម្បទានសេដ្ឋកិច្ចទៅឱ្យក្រុមហ៊ុនចិន ញូញៀន (UDG) បានធ្វើឱ្យប្រជាពលរដ្ឋ ១,១៤៣គ្រួសារ ត្រូវបង្ខំឱ្យបោះបង់ចោលដីធ្លីប្រមាណជាង ១០០០០ហិកតា និងផ្ទះ ១៥០០ខ្នង ត្រូវបង្ខំឱ្យរុះរើ និងឈូសឆាយ៕
