អាជ្ញាធរជាតិអប្សរាឈប់ឱ្យលក់ដូរនៅក្បែរប្រាសាទ

សកម្មភាពក្រាលកន្ទេល និងដាក់អង្រឹង បរិភោគអាហារនៅក្បែរប្រាសាទ កាលពីពេលកន្លងទៅ (ប្រភពរូបពីអាជ្ញាធរជាតិអប្សរា)

អាជ្ញាធរជាតិអប្សរាណែនាំដល់អាជីវករឱ្យបញ្ឈប់ការលក់ដូរដោយប្រើប្រាស់កន្ទេល និងដាក់អង្រឹងសម្រាប់ឱ្យភ្ញៀវអង្គុយ និងបរិភោគអាហារនៅជុំវិញបរិវេណប្រាសាទមួយចំនួននៅក្នុងខេត្តសៀមរាបដោយថា កុំឱ្យប៉ះពាល់ដល់គុណតម្លៃនៃបេតិកភណ្ឌវប្បធម៌។

សេចក្តីប្រកាសរបស់អាជ្ញាធរជាតិអប្សរាចេញផ្សាយនៅថ្ងៃទី ១៣ ខែសីហា ឆ្នាំ២០១៩ បានលើកឡើងថា មានសកម្មភាពក្រាលកន្ទេល ដាក់អង្រឹង និងសម្ភារផ្សេងទៀតនៅលើវាលស្មៅជុំវិញកសិន្ទុប្រាសាទអង្គរវត្ត ប្រាសាទត្រពាំងសេស និងនៅមុខប្រាសាទព្រហ្មកិលជាដើម។

អាជ្ញាធរជាតិអប្សរាបានទុកពេល៤៥ថ្ងៃចាប់ពីថ្ងៃជូនដំណឹង សម្រាប់អាជីវករក្នុងការរុះរើនិងរៀបចំសណ្តាប់ធ្នាប់ ដោយបញ្ឈប់ការក្រាលកន្ទេល ដាក់អង្រឹង និងសម្ភារផ្សេងៗទៀត។ ករណីនៅតែបន្តសកម្មភាពទាំងនេះទៀត ខាងអាជ្ញាធរនឹងមិនទទួលខុសត្រូវរាល់ការខូតខាតណាមួយឡើយ ពេលមានវិធានការរឹបអូស។​

អាជ្ញាធរជាតិអប្សរាសរសេរថា៖ « ករណីបងប្អូនអាជីវករនិងភ្ញៀវទេសចរ នៅតែបន្តសកម្មភាពទាំងនេះទៀត គណៈកម្មការដឹកនាំ និងសម្របសម្រួលរៀបចំសណ្តាប់ធ្នាប់អ្នកលក់ដូរនៅក្នុងរមណីយដ្ឋានអង្គរ នឹងអនុវត្តវិធានការរដ្ឋបាល រឹបអូសសម្ភារទាំងនោះ »។

ជុំវិញនឹងសេចក្តីជូនដំណឹងរបស់អាជ្ញាធរជាតិអប្សរានេះដែរ លោក សួន ចយ ដែលជាអាជីវករលក់ដូរ និងជួលកន្ទេល អង្រឹងបានប្រាប់ VOD តាមរយៈទូរស័ព្ទថា លោកមិនបានដឹងច្បាស់ពី  ដំណឹងនេះឡើយ ពោលគឺគ្រាន់តែឮគេនិយាយតៗគ្នា ប៉ុន្តែមិនទាន់ប្រាកដថាខាងអាជ្ញាធរនឹងមានចំណាត់ការបែបណាបន្តនោះទេសម្រាប់ពួកគាត់។

លោក សួន ចយ បានបញ្ជាក់ប្រាប់ថា មានអាជីវករជាច្រើនដែលកំពុងប្រកបមុខរបរនេះ ជាពិសេសគឺនៅមុខប្រាសាទត្រពាំងសេស។ ដូច្នេះលោក យល់ឃើញថា អាជីវករនឹងមានការលំបាកក្នុងការរកស៊ី បើសិនជាអាជ្ញាធរជាតិអប្សរាហាមលែងឱ្យលក់បន្តទៀត។

លោក សួន ចយ៖ « បើគេបញ្ឍប់អត់ឱ្យក្រាលអន្ទេល និងដាក់អង្រឹងនៅកន្លែងនេះ[ប្រាសាទត្រពាំងសេះ] អត់ដឹងថានឹងរកស៊ីអីទៀតទេ ព្រោះតាំងពីយូររាប់ឆ្នាំមកហើយតែងតែរកស៊ីប៉ុណ្នេះឯង។»

យោងតាមសេចក្តីជូនដំណឹងរបស់អាជ្ញាធរជាតិអប្សរា បានសរសេរថា កន្លងមកក្រុមការងារបានសហការជាមួយអង្គភាពនគរបាលការពារបេតិកភណ្ឌ និងអាជ្ញាធរមូលដ្ឋាន ធ្វើការណែនាំ         បញ្ឈប់សកម្មភាពទាំងនេះរួចមកហើយ ប៉ុន្តែអាជីវករនិង ភ្ញៀវទេសចរមួយចំនួនមិនព្រមបញ្ឈប់តាមការណែនាំ។

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ