សមត្ថកិច្ចកម្ពុជាបានសហការជាមួយសមត្ថកិច្ចចិនចាប់ខ្លួនជនជាតិចិនជាង១២០នាក់ ដែលជាប់ពាក់ព័ន្ធករណីចាប់ជំរិតប្រាក់តាមប្រព័ន្ធអ៊ីនធឺណិត កាលពីម្សិលមិញ នៅខេត្តព្រះសីហនុ។
នាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន នៃក្រសួងមហាផ្ទៃ កាលពីថ្ងៃទី១៤ ខែសីហា ឆ្នាំ២០១៩ បានសហការជាមួយសមត្ថកិច្ចចិន ដោយឃាត់ខ្លួនជនជាតិចិនចំនួន១២៧ ក្នុងនោះមានស្រី១០នាក់ ដោយសង្ស័យថាចាប់ជំរិតតាមប្រព័ន្ធអ៊ីនធឺណិត (VOIP) ។
ប្រធាននាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន លោក អ៊ី សុខឃី បានប្រាប់ VOD តាមទូរសព្ទថា ជនជាតិចិនដែលធ្វើការឃាត់ខ្លួននៅខេត្តព្រះសីហនុ ត្រូវបានបញ្ជូនមកឃុំខ្លួននៅអគ្គនាយកដ្ឋានអន្តោប្រវេសន៍ រាជធានីភ្នំពេញ ដោយរងចាំនីតិវិធីបន្ត និងបណ្តេញចេញទៅប្រទេសដើមរបស់ពួកគេវិញ។
លោក អ៊ី សុខឃី បានមានប្រសាសន៍ថា៖ « ឥលូវនេះ យើងបានបញ្ចូនមកឃុំខ្លួនបន្តនៅអគ្គនាយកដ្ឋានអន្តោប្រវេសន៍ នៅភ្នំពេញ ហើយមន្ត្រីជំនាញនឹងមាននីតិវិធីបន្ត ចុងក្រោយយើងនឹងបណ្តេញទៅប្រទេសចិន»។
ជុំវិញនឹងនីតិវិធីក្រោយពេលបណ្តេញជនជាតិចិនទៅប្រទេសដើមវិញនោះ លោក អ៊ី សុខឃី បញ្ជាក់ថា លោកមិនបានដឹងពីវិធានការណ៍ឬគោលការកាត់ទោសយ៉ាងណានោះទេ ដោយលោកមានសមត្ថកិច្ចត្រឹមតែនៅក្នុងប្រទេសកម្ពុជាតែប៉ុណ្ណោះ។
ទាក់ទងនឹងបញ្ហានេះអ្នកនាំពាក្យសមាគមការពារសិទ្ធិមនុស្សអាដហុក លោកស៊ឹង សែនករុណាមានប្រសាសន៍ថាសព្វថ្ងៃនេះទង្វើនិងអាកប្បករិយារបស់ជនជាតិចិនមួយចំនួនបានបង្កការភ័យខ្លាចនិងកង្វល់ដល់ប្រជាពលរដ្ឋកម្ពុជា។ លោកបញ្ជាក់ថា ជនជាតិចិនរកស៊ីគ្រប់ជំនាញនៅកម្ពុជា តាំងពីរបរលក់ដូរធម្មតា រហូតដល់ជំនួញធំៗ តែអ្វីគួរឱ្យបារម្ភខ្លាំងនោះគឺការបង្កឧក្រិដ្ឋកម្មដូចយ៉ាងពេស្យាចារឬចាប់ជំរិត គ្រឿងញៀននិងបើកបនល្បែងខុសច្បាប់ជាដើម ។
លោកស៊ឹងសែន ករុណា មានប្រសាសន៍ថា៖ «នៅពេលដែលមានការចូលមកដល់ក្នុងប្រទេសយើងហ្នឹង បានជាមានការថ្លោះធ្លោយធ្វើឱ្យជនទាំងអស់ហ្នឹងគាត់ឆ្លៀតឱកាសក្នុងការបង្កចលាចលឬធ្វើឱ្យអសន្តិសុខក្នុងសង្គម។ យើងគិតថាចំណុចទាំងអស់នេះគួរណាស់តែមានការត្រួតពិនិត្យទាំងការរកស៊ីទាំងសកម្មភាពផ្សេងៗរបស់ជនជាតិហ្នឹងអាចថាលក្ខណៈពិសេសជាងគេ។
របាយការណ៍របស់ក្រសួងមហាផ្ទៃចេញផ្សាយកាលពីខែកញ្ញា ឆ្នាំ២០១៨បង្ហាញថា ជនជាតិចិននៅ កម្ពុជាមានចំនួន ២១ម៉ឺននាក់ ក្នុងនោះ ជនជាតិចិនកំពុងរស់នៅខេត្តព្រះសីហនុមានច្រើនជាងគេរហូតដល់ទៅ ៧ម៉ឺន៨ពាន់នាក់ (៧៨ ០០០នាក់)។ របាយការណ៍របស់អគ្គនាយកដ្ឋានអន្តោប្រវេសន៍ក៏បង្ហាញថា គិតត្រឹមបំណាច់ឆ្នាំ២០១៨កម្ពុជាបានបញ្ជូនជនជាតិចិនដែលប្រព្រឹត្តខុសច្បាប់នៅកម្ពុជាមានជាង៧០០នាក់ ចេញពីកម្ពុជាហើយបទល្មើសដែលសមត្ថកិច្ចអះអាងថាមានច្រើនជាងគេនោះ គឺបទល្មើសគំរាមជំរិត និងឆបោកតាមប្រព័ន្ធទូរគមនាគមន៍ (VOIP)។
ទោះជាយ៉ាងណាអគ្គនាយកដ្ឋានអន្តោប្រវេសន៍នៃក្រសួងមហាផ្ទៃមិនទាន់បង្ហាញតួលេខបូកសរុបការចាប់បញ្ជូនជនជាតិចិនចេញពីកម្ពុជាក្នុងឆមាសទី១ឆ្នាំ២០១៩នេះនៅឡើយទេ។កាលពីខែមិនាឆ្នាំ២០១៩ជនជាតិចិន១៦៣នាក់ ត្រូវឃាត់ខ្លួននៅសៀមរាបពាក់ព័ន្ធការបើកល្បែងតាមអ៊ីនធឺណិតនិងបើកល្បែងខុសច្បាប់។
ចាប់តាំងពីឆ្នាំ ២០១៤ដល់ខែមករា ឆ្នាំ២០១៩ ជនបរទេស ១៤.៩០៩ នាក់មកពី ៩៣ ប្រទេសផ្សេងៗគ្នាត្រូវបាននិរទេសចេញពីប្រទេសកម្ពុជា។ក្នុងចំណោមនោះជនជាតិចិន១.៦៤៩នាក់ត្រូវបាននិរទេសពីបទប្រព្រឹត្តិបទល្មើសឧក្រិដ្ឋ៕