ក្រសួងការបរទេសកម្ពុជា បានចេញសេចក្តីថ្លែងការណ៍គាំទ្រចំណាត់ការនានារបស់រដ្ឋាភិបាលចិនក្នុងការរក្សាសន្តិភាពនៅក្រុងហុងកុង។
ក្នុងសេចក្តីថ្លែងការណ៍ដែលចេញផ្សាយនៅថ្ងៃនេះ ក្រសួងការបរទេសកម្ពុជា ចាត់ទុកស្ថានការណ៍ដែលកំពុងកើតឡើងនៅក្រុងហុងកុងជាបញ្ហាផ្ទៃក្នុងរបស់ចិន។ ជាមួយគ្នានេះ កម្ពុជា ក៏បានប្រកាសគាំទ្រចំពោះសកម្មភាពរបស់រដ្ឋាភិបាលក្រុងប៉េកាំង និងតំបន់រដ្ឋបាលពិសេសហុងកុងក្នុងការរក្សាសន្តិសុខសណ្ដាប់ធ្នាប់។
ក្រសួងការបរទេសកម្ពជា បានលើកឡើងក្នុងសេចក្តីថ្លែងការណ៍នោះថា៖«ប្រទេសកម្ពុជាគាំទ្រនូវរាល់ចំណាត់ការចាំបាច់នានា របស់រដ្ឋាភិបាលនៃសាធារណរដ្ឋប្រជាមានិតចិន និងតំបន់រដ្ឋបាលពិសេសទីក្រុងហុងកុង ដើម្បីរក្សាសន្តិភាព សណ្តាប់ធ្នាប់សាធារណៈ សន្តិសុខជាតិ និងការរួមរស់នៅជាមួយគ្នាប្រកបដោយភាពសុខដុមរមនាក្នុងសង្គម ដោយអនុលោមទៅតាមច្បាប់ និងបទប្បញ្ញត្តិទាំងឡាយរបស់ប្រទេស និងការប្រតិបត្តិជាអន្តរជាតិ។»
ពលរដ្ឋហុងកុង ជាច្រើនម៉ឺននាក់បានចេញធ្វើបាតុកម្មអស់រយៈពេលជាង១១សប្តាហ៍មកហើយ ដែលចុងក្រោយនេះឈានរហូតដល់បិទព្រលានយន្តហោះតំបន់ស្វយ័តនេះទៀតផង។ បាតុកម្មនេះ ផ្តើមចេញពីការទាមទារឲ្យទម្លាក់ចោលសេចក្តីស្នើច្បាប់បត្យាប័នដែលអាចឲ្យរដ្ឋាភិបាលក្រុងប៉េកាំងស្នើបញ្ជូនអ្នកទោសពីហុងកុងទៅកាត់ក្តីនៅចិនដីគោក។ ទោះបីជាប្រមុខក្រុងហុងកុង លោកស្រី ខារី ឡាំ បានប្រកាសថាសេចក្តីស្នើច្បាប់នោះបានស្លាប់បាត់ហើយយ៉ាងណាក្តី តែក្រុមបាតុករនៅតែមិនជឿ។ ពួកគេ បានទាមទារឲ្យប្រមុខក្រុងហុងកុងរូបនេះ ចុះចេញពីតំណែង ហើយស្នើឲ្យដោះលែងបាតុករដែលត្រូវចាប់ខ្លួនកន្លងមក ក៏ដូចជាស៊ើបអង្កេតឲ្យបានម៉ត់ចត់ករណីសមត្ថកិច្ចប្រើប្រាស់ហិង្សាលើបាតុករ។
បាតុកម្មរយៈពេលជាង១១សប្តាហ៍នេះ ក្រុមបាតុករនិងប៉ូលីសតែងតែប៉ះទង្គិចគ្នា ហើយរងរបួសទាំងសងខាង។ សមត្ថកិច្ចហុងកុង បានអះអាងថាពួកគេធ្វើការបង្រ្កាបគឺដើម្បីរក្សាសណ្ដាប់ធ្នាប់ ការរីកចម្រើន និងស្ថិរភាពក្នុងក្រុងនេះតែប៉ុណ្ណោះ។
រដ្ឋាភិបាលក្រុងប៉េកាំង បានហៅបាតុកម្មរបស់ក្រុមអ្នកតវ៉ាទាំងនោះថាជាសញ្ញានៃអំពើភេរវកម្ម។
នៅសប្តាហ៍នេះ សារព័ត៌មានរដ្ឋចិនមួយចំនួន បានបង្ហោះវីដេអូឃ្លីបលើបណ្តាញTwitter របស់គេ ពីសម្មភាពរថក្រោះ និងរថយន្តរបស់កងទ័ពរំដោះប្រជាជនចិនជាច្រើន ធ្វើដំណើរទៅកាន់ក្រុងស៊ិនជិនដែលមានព្រំប្រទល់ជាប់នឹងក្រុងហុងកុង។ តាមការចុះផ្សាយរបស់សារព័ត៌មានBusiness Insider កងទ័ពទាំងនោះឈរជើងនៅចម្ងាយប្រមាណតែ៥គីឡូម៉ែត្រប៉ុណ្ណោះពីស្ពានឆ្នេរសមុទ្រស៊ិនជិនទៅក្រុងហុងកុង។
កាលពីចុងខែកក្កដាកន្លងទៅ ក្នុងបទសម្ភាសន៍ជាមួយសារព័ត៌មានBloomberg រដ្ឋមន្រ្តីក្រសួងការបរទេសអាមេរិក លោក Mike Pompeo បានស្នើឲ្យចិនដំណោះស្រាយបញ្ហាហុងកុងឲ្យបានត្រឹមត្រូវ។ លោក បាននិយាយថាការធ្វើបាតុកម្មរបស់ពលរដ្ឋហុងកុងជារឿងត្រឹមត្រូវ ដូចអ្វីដែលបានអនុវត្តន៍នៅអាមេរិក។ លោក សង្ឃឹមថាប្រទេសចិននឹងគោរពលើកិច្ចព្រមព្រៀងដែលប្រទេសនេះ បានផ្ដល់ឲ្យពលរដ្ឋហុងកុង។
នៅថ្ងៃទី១៧ ខែសីហានេះ សហភាពអឺរ៉ុប ក៏បានចេញសេចក្តីថ្លែងការណ៍មួយផងដែរទាក់ទងនឹងស្ថានការណ៍ក្នុងក្រុុងហុងកុង។ តាមសេចក្តីថ្លែងការណ៍នោះ អនុប្រធានស្នងការអឺរ៉ុបទទួលបន្ទុកកិច្ចការបរទេស និងគោលនយោបាយសន្តិសុខ លោកស្រី Federica Mogherini បានលើកឡើងថាក្នុងរយៈពេលជាង២ខែមកនេះ ពលរដ្ឋហុងកុងជាច្រើនបានប្រើប្រាស់សិទ្ធិជាមូលដ្ឋានរបស់ពួកគេក្នុងការប្រមូលផ្តុំ ប៉ុន្តែសហភាពអឺរ៉ុបសង្កេតឃើញថាមានអំពើហិង្សាដែលមិនអាចទទួលយកជាច្រើនបានកើតឡើង។ លោកស្រី បានស្នើឲ្យភាគីពាក់ព័ន្ធទាំងអស់ជជែកគ្នាដើម្បីបញ្ចប់បញ្ហា៕
