អគ្គនាយកដ្ឋានពន្ធដារព្រមានចាត់វិធានការផ្លូវច្បាប់លើអ្នកខកខានបង់ពន្ធអចលនទ្រព្យឆ្នាំ២០១៩ ខណៈដែលការបង់ពន្ធអចលនទ្រព្យនឹងបិទបញ្ចប់នៅត្រឹមចុងខែក្រោយនេះ។
ក្នុងសេចក្តីជូនដំណឹងកាលពីថ្ងៃម្សិលមិញនេះ អគ្គនាយកដ្ឋានពន្ធដារថា រហូតមកដល់ពេលនេះ ខ្លួនសង្កេតឃើញថា ម្ចាស់អចលនទ្រព្យមួយចំនួននៅមិនទាន់បំពេញកាតព្វកិច្ចពន្ធនៅឡើយ ដោយរំឮកឱ្យពលរដ្ឋដែលពុំទាន់បង់ទាំងអស់ឱ្យចូលរួមបង់ពន្ធឱ្យបានគ្រប់គ្នាមុនថ្ងៃ៣០ កញ្ញាខាងមុខ។
អគ្គនាយកដ្ឋានពន្ធដារ លើកឡើងថា៖ «ចំពោះការខកខានមិនបានដាក់លិខិតប្រកាសបង់ពន្ធទាន់ពេលវេលាកំណត់ខាងលើ ម្ចាស់អចលនទ្រព្យនឹងត្រូវរងនូវទោសទណ្ឌតាមច្បាប់ជាធរមាន»។
យោងតាមក្រសួងសេដ្ឋកិច្ចជារៀងរាល់ឆ្នាំថ្ងៃទី១ តុលា រដ្ឋបាលសារពើពន្ធមានសិទ្ធិត្រួតពិនិត្យលើការបង់ពន្ធរបស់អ្នកជាប់ពន្ធនិងពិន័យទៅលើអ្នកគេចវេស ឬមិនបានបង់តាមច្បាប់សារពើពន្ធ ឬអាចឈានដល់ការប្ដឹងទៅដល់តុលាការផងដែរ។
មាត្រា៩ នៃប្រកាសស្ដីពីការប្រមូលពន្ធលើអចលនទ្រព្យ ឱ្យដឹងថា អ្នកជាប់ពន្ធដែលមានអចលនទ្រព្យដែលមានតម្លៃលើសពី ១០០លានរៀល (ប្រហែល ២ម៉ឺន ៥ពាន់ដុល្លារ) ត្រូវមានកាតព្វកិច្ចចុះបញ្ជីនៅរដ្ឋបាលសារពើពន្ធក្នុងភូមិសាស្ត្រដែលអចលនទ្រព្យនោះស្ថិតនៅយ៉ាងយឺតបំផុតត្រឹមថ្ងៃទី៣០ ខែកញ្ញានៃឆ្នាំជាប់ពន្ធ៕
