អតីតបុគ្គលិកវិទ្យុអាស៊ីសេរីពីររូប ថាការលើកពេលប្រកាសសាលក្រមជារនាំងដល់ការប្រកបវិជ្ជាជីវៈជាអ្នកសារព័ត៌មានរបស់ខ្លួនឡើងវិញ។
សាលាដំបូងរាជធានីភ្នំពេញកាលថ្ងៃទី ០៩ សីហា ឆ្នាំ២០១៩ បានកំណត់យកថ្ងៃទី៣០ ខែសីហា ឆ្នាំ២០១៩ ជាថ្ងៃប្រកាសសាលក្រមអតីតបុគ្គលិកអាស៊ីសេរីពីររូបក្នុងសំណុំ«ផ្តល់ឱ្យរដ្ឋបរទេសនូវព័ត៌មានជាអាទិ៍ដែលនាំឱ្យអន្តរាយដល់ការការពារជាតិ»។
ទោះយ៉ាងណាក៏ដោយ ការប្រកាសសាលក្រមដែលត្រូវធ្វើឡើងនៅព្រឹកថ្ងៃសុក្រនេះ ត្រូវបានពន្យាពេលវិញដោយពុំទាន់កំណត់ពេលវេលាជាក់លាក់នោះឡើយ។ ក្រឡាបញ្ជីនៃសាលាដំបូងរាជធានីភ្នំពេញលោក វុន សុជាតិ បានប្រកាសនៅក្នុងបន្ទប់សវនាការថាការសម្រេចពន្យាពេលប្រកាសសាលក្រម ដោយសារតែចៅក្រមទទួលបន្ទុករឿងក្តីនេះជាប់រវល់ចូលរួមសិក្ខាសាលានៅក្រសួងយុត្តិធម៌។
អតីតបុគ្គលិកអាស៊ីសេរីលោក យាង សុធារិន្ទ បង្ហាញការខកចិត្តចំពោះការសម្រេចរបស់តុលាការដែលបានពន្យាពេលប្រកាសសាលក្រម។ លោកចាត់ទុកការពន្យាពេលនេះ ថាជាឧបសគ្គមួយសម្រាប់លោកក្នុងការបន្តការងារលើវិស័យសារព័ត៌មានដែលជាមុខរបរលោកស្រលាញ់ពេញចិត្តឡើងវិញ។
លោក មានប្រសាសន៍ថា៖«កន្លងទៅ សូម្បីតែយើងឈប់ធ្វើទៅហើយ គេនៅតែចោទប្រកាន់យើង ថា បានបញ្ជូនព័ត៌មានរហូតធ្វើឱ្យអន្តរាយដល់ការពារជាតិ។ ចុះល្មមដល់រឿងយើងស្ថិតនៅក្រោមការចោទប្រកាន់ ហើយស្ថិតនៅក្នុងដៃរបស់តុលាការ ហើយស្ថិតនៅក្នុងបញ្ជីខ្មៅរបស់តុលាការបន្ថែមទៀតហ្នឹង។[បើយើងធ្វើ]វាអាចឈានដល់ការចាប់កំហុសយើង ថាយើងនៅតែបន្តធ្វើការផ្នែកហ្នឹង នៅតែបញ្ជូន ហើយនៅតែមានការសង្ស័យ។
អ៊ីចឹងវាពិបាកបើសិនជារឿងរ៉ាវហ្នឹង វាអត់មានភាពជ្រះស្រឡះ ទម្លាក់បទចោទយើង១០០ភាគរយ។ អ៊ីចឹងវាពិបាកធ្វើឱ្យយើងបំពេញការងារ ហើយរឿងមួយទៀត ស្ថាប័នព័ត៌មានផ្សេងៗមិនថាគាត់ហ៊ានឱ្យយើងធ្វើបែបណាដែរ»។
លោកបន្តថា មូលហេតុដែលនាំឱ្យលោកចង់បន្តការងារសារព័ត៌មានវិញ ដោយសារការងារនេះ អាចជួយច្រើនដល់សង្គមជាតិ។
ចំណែកអតីតបុគ្គលិកអាស៊ីសេរីម្នាក់ទៀតគឺលោក អ៊ួន ឈិន លើកឡើងថា ការពន្យាពេលនេះ បង្ហាញថាសេរីភាពរបស់គាត់នៅតែបន្តរឹតត្បិត និងជារនាំងដែលធ្វើឲ្យលោកមិនអាចចូលធ្វើជាអ្នកសារព័ត៌មានឡើងវិញបាន។
លោក មានប្រសាសន៍ថា៖«វាធ្វើឱ្យមានភាពមន្ទិលសៅហ្មងរបស់យើង។ វានៅជាប់នឹងទៅ យើងមិនដឹងថាទៅមុខទៀតយ៉ាងណា? ហើយយើងពិបាកខ្វះសេរីភាព ក្នុងការធ្វើនេះ ធ្វើនោះ ដើរទៅនេះ ទៅនោះ ស្វែងរកការងារ ជាពិសេសការចង់វិលចូលអាជីពជាអ្នកសារព័ត៌មានវិញហ្នឹង ដល់ពេលយើងមិនទាន់ដឹង [លទ្ធផល]យ៉ាងណាៗអ៊ីចឹង យើងពិបាកក្នុងការដើរទៅមុខណាស់»។
អ្នកនាំពាក្យសាលាដំបូងរាជធានីភ្នំពេញលោក សួស វិទ្យារ៉ាឌី សុំមិនធ្វើអត្ថាធិប្បាយចំពោះរឿងនេះ ដោយលោកសុំពេលសួរថ្នាក់លើសិន។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា សម្ដែងការគាំទ្រ ចំពោះការលើកឡើងរបស់អតីតបុគ្គលិកអាស៊ីសេរី ដោយថាការពន្យានេះ នឹងធ្វើឱ្យពួកគាត់ទាំងពីរពិបាកក្នុងការប្រកបរបរអ្នកសារព័ត៌មានវិញ។
លោក និយាយថា៖«តើលទ្ធផលហ្នឹង វាជាលទ្ធផលយ៉ាងម៉េច ដែលអាចផ្ដល់ឱកាសដល់ពួកគាត់ បានទៅធ្វើកិច្ចការងាររបស់ពួកគាត់បានទៀតឬអត់ ឬលទ្ធផលហ្នឹង បានផ្ដល់ភាពអយុត្តិធម៌ឬក៏យ៉ាងម៉េច? អ៊ីចឹងទាំងអស់ហ្នឹង គឺជាការទទ្ទឹងរង់ចាំទាំងខាងអ្នកដែលតាមដាន នៅក្នុងរឿងហ្នឹង ក៏ចង់ដឹងអំពីបញ្ហាហ្នឹង រួមទាំងសង្គមស៊ីវិល អ្នកសារព័ត៌មាន ឬក៏ស្ថានទូតនានា ដែលគេបានទៅឃ្លាំមើល ដំណើរការសវនាការកន្លងមក។ »។
អតីតបុគ្គលិកអាស៊ីសេរី លោក អ៊ួន ឈិន និងលោក យាង សុធារិន្ទ ត្រូវបានសមត្ថកិច្ចចាប់ខ្លួនកាលពីពាក់កណ្ដាលខែវិច្ឆិកា ឆ្នាំ២០១៧។ ទោះយ៉ាងណាក៏ដោយ អ្នកសារព័ត៌មានទាំងពីររូបនេះ ត្រូវបានតុលាការសម្រេចដោះលែងឲ្យនៅក្រៅឃុំវិញកាលពីថ្ងៃទី២១ ខែសីហា ឆ្នាំ២០១៨៕
