លោក ប៉ា ចន្ទរឿន៖បទចម្រៀងមួយចំនួនធ្វើឱ្យយុវជនមានគំនិតហិង្សា និងបាក់ទឹកចិត្ត

ប្រធាន​មជ្ឈមណ្ឌល​ទស្សនវិជ្ជា​អនុវត្ដន៍​ និង​សីលធម៌​កម្ពុជា កត់សម្គាល់ឃើញថា ការសម្តែង និងខ្លឹមសារបទចម្រៀងមួយចំនួននៅពេលបច្ចុប្បន្ននេះ មិនមែនជាការកំដរអារម្មណ៍ទេគឺធ្វើឱ្យយុវជនកើតគំនិតហិង្សា និងមានជំងឺបាក់ទឹកចិត្តទៅវិញ។​

លោក ប៉ា ចន្ទរឿនសរសេរនៅលើបណ្តាញសង្គមហ្វេសប៊ុករបស់លោកថា ខ្លឹមសារចម្រៀងទាំងនេះ ក៏ជាមូលហេតុមួយដែលធ្វើឱ្យយុវជនបាក់ទឹកចិត្ត ហើយអាចឈានដល់ការសម្លាប់ខ្លួន។​

លោក ប៉ា ចន្ទរឿន៖«ចម្រៀងបែប​កំសត់មួយចំនួនសម្រាប់យុវជននៅសម័យនេះ​រៀបរាប់ដូចបោកក្បាលនឹងជញ្ជាំង។ វាហាក់ដូចជាបណ្តុះចរឹតហឹង្សានិងភាពអស់សង្ឃឹម ជាជាងសិល្បៈបែបតន្ត្រីដើម្បីកំដរអារម្មណ៍។ ចម្រៀងប្រភេទនេះ​មាន​តែ​ធ្វើ​ឱ្យ​អ្ន​កមាន​បញ្ហា/បាក់ផ្លូវចិត្តកាន់តែមាន​បញ្ហាថែម។ នេះប្រហែលជាមូលហេតុមួយ​ដែល​ជំរុញឱ្យ​យុវជន​មួយ​ចំនួន​សម្លាប់ខ្លួន។ »

លោក ប៉ា ចន្ទរឿង ក៏បានអំពាវនាវឱ្យអ្នកនិពន្ធ និងអ្នកសិល្បៈ ពិនិត្យករណីឥទ្ធិពលទាំងនេះ ចំពោះសុខុមាលភាពសង្គម។​

របាយការណ៍អង្គការសុខភាពពិភពលោកចេញផ្សាយកាលពីឆ្នាំ២០១៤ បង្ហាញថា ពលរដ្ឋកម្ពុជាយ៉ាងហោចណាស់៤នាក់ក្នុងចំណោម១០០នាក់មានជំងឺធ្លាក់ទឹកចិត្តឬ ហៅថា Depression។​