ប្រជាជនឥណ្ឌូនេស៊ីពិសេសក្រុមនិស្សិតជាយុវជនបាននាំគ្នាតវ៉ាទូទាំងប្រទេសនៅសប្តាហ៍នេះ ប្រឆាំងខ្លឹមសារសេចក្តីព្រាងក្រមព្រហ្មទណ្ឌថ្មី ពាក់ព័ន្ធការហាមរួមភេទក្រៅពីប្តីប្រពន្ធ ឬ ការរួមភេទមុនរៀបការ។
នៅក្នុងខ្លឹមសារច្បាប់នោះបានកំណត់ថា គូស្នេហ៍មានទំនាក់ទំនងផ្លូវភេទក្រៅពីប្តីឬប្រពន្ធត្រូវជាប់ពន្ធនាគាររយៈពេល១ឆ្នាំ ហើយចំពោះគូស្នេហ៍ដែលរួមរស់ជាមួយគ្នាមុនរៀបការត្រូវជាប់ពន្ធនាគាររយៈពេល៦ខែ។ ករណីដាក់ទោសនេះ ត្រូវស្រាវជ្រាវតាមរយៈបណ្តឹងរបស់ប្រធានភូមិ ចំពោះបណ្តឹងដែលធ្វើឡើងដោយឪពុកម្តាយ ឬ កូនៗមិនទទួលយកទៅចាត់ការនោះទេ។
ក្រៅពីការដាក់ពិន័យចំពោះអ្នករួមភេទក្រៅចំណងផ្លូវច្បាប់នេះ ប្រជាជនឥណ្ឌូនេស៊ីក៏ព្រួយបារម្ភលើចំណុចផ្សេងៗទៀតដែរដូចជា ដាក់ទោសលើអ្នកប្រមាថប្រធានាធិបតី រិគន់គ្រូបង្រៀនមនោគមវិទ្យាម៉ាក លេនីន ហើយក៏ដាក់ទោសដល់ស្ត្រីដែលរំលូតកូនធ្វើឡើងដោយមិនត្រឹមត្រូវតាមបច្ចេកទេសពេទ្យ។
នៅប៉ុន្មានថ្ងៃនេះប្រជាជនឥណ្ឌូនេស៊ីរាប់ម៉ឺននាក់ចេញមុខតវ៉ាប្រឆាំងសេចក្តីព្រាងច្បាប់នេះ។ ការតវ៉ាក្លាយជាហិង្សា បាតុករចោលដុំថ្ម លើសមត្ថកិច្ច ចំណែកសមត្ថកិច្ចបាញ់គ្រាប់បែកផ្សែង និងបាញ់ទឹកលើបាតុករ។ សេចក្តីព្រាងច្បាប់នេះត្រូវបានផ្អាកដំណើរការបណ្តោះអាសន្នដោយសារការតវ៉ា។
អាជ្ញាធរមូលដ្ឋានបានផ្សព្វផ្សាយប្រាប់ប្រជាជនថា នោះគឺជាច្បាប់នៃការស់នៅ មិនស្ថិតនៅក្នុងក្រមព្រហ្មទណ្ឌ ដែលរួមបញ្ជូលទាំងច្បាប់សាសនាទេ។
នៅក្នុងប្រទេសឥណ្ឌូនេស៊ីបច្ចុប្បន្នកំពុងតែប្រើប្រាស់ក្រមព្រហ្មទណ្ឌដែលរៀបចំឡើងដោយអាណានិគមន៍ហូឡង់តាំងពីឆ្នាំ១៩១៨ ហើយឥណ្ឌូនេស៊ីពិភាក្សាផ្លាស់ប្តូរចង់កែប្រែទាំងពីទសវត្ស១៩៤០ ក្រោយពេលទទួលបានឯករាជ្យ៕
