លោកនាយករដ្ឋមន្ត្រី ហ៊ុន សែន អំពាវនាវដល់ប្រជាពលរដ្ឋកម្ពុជា និងវៀតណាមជួយថែរក្សាបង្គោលព្រំដែនឱ្យបានគង់វង្ស ដើម្បីប្រែក្លាយតំបន់នេះឱ្យទៅជាកន្លែងមានការអភិវឌ្ឍន៍ប្រកបដោយសុខសន្តិភាព។
ក្នុងឱកាសទៅបំពេញបេសកកម្មនៅវៀតណាមនៅថ្ងៃនេះ លោកនាយករដ្ឋមន្ត្រីបានលើកឡើងថា លោកខិតខំជំរុញដំណើរការចរចាបោះបង្គោលព្រំដែនជាមួយវៀតណាមដើម្បីបញ្ចប់ជម្លោះនានាដែលធ្លាប់កើតមាន។ លោកក៏បានអំពាវនាវដល់អាជ្ញាធរ និង ពលរដ្ឋឱ្យជួយថែរក្សាបង្គោលព្រំដែន។
សារលើហ្វេសប៊ុកលោក ហ៊ុន សែន៖« សម្តេចតេជោ ក៏សូមអំពាវនាវដល់អាជ្ញាធរដែនដី ក៏ដូចជាប្រជាពលរដ្ឋនៃប្រទេសទាំងពីរ សូមចូលរួមជាមួយគ្នាថែករក្សាបង្គោលព្រំដែនឲ្យបានស្ថិតស្ថេរគង់វង្ស និងរួមគ្នាប្រែក្លាយតំបន់ព្រំដែនឲ្យទៅជាព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍជានិច្ចនិរន្តរ៍។ »
ក្នុងពិធីចុះហត្ថលេខារវាងលោកហ៊ុន សែន នាយករដ្ឋមន្ត្រីកម្ពុជា និងលោក ង្វ្រៀន សួនហ្វុក នាយករដ្ឋមន្ត្រីវៀតណាមនៅថ្ងៃនេះ ភាគីទាំងពីរទទួលស្គាល់បង្គោលព្រំដែនដែលបោះហើយបានចំនួន៨៤ភាគរយ ហើយភាគីទាំងពីរប្តេជ្ញាខិតខំបោះបង្គោលដែលនៅសល់ចំនួន១៦ភាគរយទៀតឱ្យបានឆាប់។
