បុរាណវិទូមកពីនាយកដ្ឋានអភិរក្សប្រាសាទក្នុងឧទ្យានអង្គរ បានប្រទះឃើញបដិមាព្រះកេសព្រះពោធិសត្វលោកេស្វរៈ ឬលោកេសូរ១អង្គ កប់ក្រោមស្រទាប់ដីត្រង់បរិវេណខ្លោងទ្វារចូលភាគខាងកើតប្រាសាទតានៃ។
យោងតាមប្រភពពីទំព័រ Facebook របស់ក្រសួងវប្បធម៌ ផ្សព្វផ្សាយនៅថ្ងៃពុធនេះគឺ ការប្រទះឃើញនោះ គឺនៅពេលក្រុមអ្នកជំនាញបុរាណវិទ្យាធ្វើកំណាយជួសជុលខ្លោងទ្វារចូលខាងកើតប្រាសាទតានៃភាគនិរតី ដើម្បីរកថ្មដំបូលដែលធ្លាក់ចុះកប់ក្នុងគំនរថ្ម និងដីដំបូកយកមកជួសជុលប្រាសាទកាលពីព្រឹកម្សិលមិញ។
ប្រភពដដែលឱ្យដឹងថា ចម្លាក់ព្រះកេសលោកកេស្វរៈនោះស្ថិតក្នុងរចនាបថបាយ័ន ពីចុងស.វ.ទី១២ និងដើមស.វ.ទី១៣ក្នុងរាជ្យព្រះបាទជ័យវរ្ម័នទី៧ មានរូបព្រះពុទ្ធលើផ្នួងសក់ មានត្រចៀកខាងស្តាំ តែគ្មានខាងឆ្វេង ច្រមុះឆែប និងរបកសាច់ថ្មលើផ្ទៃព្រះភ័ក្រ្តម្ខាង ដោយឡែក ចំពោះដងខ្លួនវិញមិនត្រូវបានប្រទះឃើញនោះទេ។
បុរាណវិទូនៃនាយកដ្ឋានអភិរក្សប្រាសាទក្នុងឧទ្យានអង្គរ លោក ស៊ា សុភារុន ឱ្យដឹងក្នុងសំណេរពីប្រភពដដែលថា សភាពខូចខាតរបស់រូបចម្លាក់ប្រកេសព្រះលោកេសូរ អាចបណ្តាលមកពីការប៉ះទង្គិចអ្វីមួយ ឬគុណភាពថ្មនៅលើផ្ពាល់ម្ខាងមិនសូវល្អ។
លោក សុភារុន បន្ថែមថា ចម្លាក់បុរាណមួយនេះប្រហែលជាមិនស្ថិតនៅទីតាំងនេះពីដើមរៀងមកនោះទេ ព្រោះគ្មានភស្តុតាងណាមួយបញ្ជាក់ថាមានដងខ្លួននៅកន្លែងដែលបានប្រទះឃើញនោះទេ។
ប្រភពដដែលឱ្យដឹងទៀតថា ក្រុមការងារអាជ្ញាធរអប្សរាបានចុះពិនិត្យ វាស់វែង និងយករូបចម្លាក់ព្រះកេសបុរាណនោះទៅរក្សាទុកនៅអាជ្ញាធរជាតិអប្សរាបណ្តោះអាសន្ន ដើម្បីធ្វើការចុះបញ្ជីនិងថតរូបទុកជាឯកសារ ព្រមទាំងរៀបចំបែបបទស្នើយកទៅរក្សាទុកនៅអភិរក្សដ្ឋានអង្គរ៕
