ចិន និងអាមេរិកនឹងជួបចរចាគ្នាក្នុងកម្រិតអនុរដ្ឋមន្រ្តី ដើម្បីស្វែងរកកិច្ចព្រមព្រៀងមួយ បើកផ្លូវទៅរកច្រកចេញពីសង្គ្រាមពាណិជ្ជកម្មរវាងប្រទេសទាំងពីរដែលកំពុងឈានដល់ដំណាក់កាលប្រឈមមួយផ្សេងទៀត។
យោងតាមសារព័ត៌មាន Straits Times មន្រ្តីជាន់ខ្ពស់នៃប្រទេសទាំងពីរនឹងជួបពិភាក្សាគ្នានៅរដ្ឋធានីវ៉ាស៊ីនតោន រយៈពេល២ថ្ងៃ(ថ្ងៃទី១០-១១ ខែតុលា ម៉ោងក្នុងតំបន់) ស្របពេលវិធានការដំឡើងពន្ធជុំថ្មីរបស់អាមេរិកដាក់លើចិនមកដល់សប្តាហ៍ក្រោយ ហើយប្រទេសទាំង២ គ្រោងបង្កើនសម្ពាធពន្ធលើគ្នាទៅវិញទៅមកនៅខែធ្នូ។
ប្រភពពីសារព័ត៌មាន South China Morning Post ឱ្យដឹងថា ប្រសិនបើគ្មានកិច្ចព្រមព្រៀងណាមួយកើតចេញពីជំនួបនេះទេ អាមេរិកនឹងបង្កើនពន្ធលើទំនិញចិនតម្លៃ២៥០ពាន់លានដុល្លារ ពី ២៥ភាគរយដល់៣០ភាគរយ ចាប់ពីថ្ងៃទី១៥តុលា តាមការគ្រោងទុក និងបន្ថែមពន្ធថ្មី១៥ភាគរយ លើទំនិញចិនតម្លៃ១៦០ពាន់លានដុល្លារ នៅថ្ងៃទី១៥ ខែធ្នូ។ ចំណែកចិន នឹងចាត់វិធានការតបតវិញ។
យោងតាមសារព័ត៌មាន CNBC ក្រុមអ្នកជំនាញមើលឃើញថា ជំនួបរវាងអាមេរិកនិងចិននឹងមិនទទួលបានលទ្ធផលអ្វីជាដុំកំភួននោះទេ ដោយសារភាពមិនទុកចិត្តគ្នាកំពុងកើនឡើង ហើយថា ច្រើនបំផុតភាគីទាំងពីរពន្យាពេលក្នុងការចាប់ផ្តើមវិធានការពន្ធជុំបន្ទាប់នៅសប្តាហ៍ក្រោយ។
ក្រុមអ្នកយុទ្ធសាស្រ្តលើកឡើងថា ការស្វែងរកកិច្ចព្រមព្រៀងពាណិជ្ជកម្មរវាងប្រទេសទាំងពីរ កាន់តែពិបាកនឹងទៅរួច ដោយសារភាគីទាំងពីរបាត់ទំនុកចិត្តរវាងគ្នានិងគ្នា ជាពិសេស ក្រោយជំនួបកំពូល G-20 កាលពីចុងខែមិថុនា។ ក្នុងជំនួបនោះ លោកប្រធាធិបតីចិន Xi Jinping ថា លោកប្រធានាធិបតី Donald Trump ជាមនុស្សខុសប្រក្រតីដែលលោកមិនអាចទុកចិត្តបានឡើយ។ ការថ្លែងបែបនេះ គឺបន្ទាប់ពីលោក Trump និយាយថា កិច្ចព្រមព្រៀងពាណិជ្ជកម្ម មិនមានសេចក្តីថា គ្មានវិធានការពន្ធនោះទេ។
កាលពីសប្តាហ៍មុន អាមេរិកបានដាក់ក្រុមហ៊ុនបច្ចេកវិទ្យាចិន២៨ ក្នុងបញ្ជីខ្មៅ ដោយចោទក្រុមហ៊ុនទាំងនោះរំលោភសិទ្ធិជនជាតិភាគតិចកាន់សាសនាអ៊ីស្លាមក្នុងខេត្ត Xinjiang និងបិទការផ្តល់ទិដ្ឋការដល់មន្រ្តីជាន់ខ្ពស់របស់ចិនមួយចំនួនដែលពាក់ព័ន្ធក្នុងរឿងនេះ។
នៅក្នុងជម្លោះពាណិជ្ជកម្មដែលបានអូសបន្លាយ១៨ខែមកនេះ ការនាំចេញរបស់ចិនទៅអាមេរិកបានធ្លាក់ចុះ ៩ភាគរយ នៅក្នុងរយៈពេល៨ខែ ឆ្នាំ២០១៩ និងការនាំចូលពីប្រទេសនេះវិញបានធ្លាក់ចុះ២៨ភាគរយ តែសម្រាប់ការនាំចូលសរុបវិញ គឺឋិតនៅថេរ ខណៈការនាំចេញធ្លាក់ចុះ៥ភាគរយ គិតលើថេរវេលាដូចគ្នា។
ដោយឡែក ការនាំចេញរបស់អាមេរិកទៅកាន់ប្រទេសចិនបានធ្លាក់ចុះ១២,៥ភាគរយ ស្មើនឹងជាង៤៣ពាន់លានដុល្លារ គិតត្រឹមបំណាច់ខែសីហាឆ្នាំនេះ ធៀបនឹងឆ្នាំមុន ប៉ុន្តែការផ្គត់ផ្គង់ទំនិញទៅកាន់ប្រទេសម៉ិចស៊ីកូវិញ មានការកើនឡើងខ្ពស់បំផុត ហើយអាត្រាពលរដ្ឋអាមេរិកគ្មានការងារធ្វើក៏ថយចុះទាបបំផុតគិតត្រឹម៥ទសវត្សន៍ចុងក្រោយ។
យោងតាមអ្នកវិភាគរបស់បណ្តាញសារព័ត៌មាន Bloombergs ទឹកប្រាក់ចំនួន ២,៧៦ពាន់ពាន់លានដុល្លារ ដែលកំពុងធ្វើចរាចរនៅជុំវិញសកលលោក កំពុងឋិតក្នុងហានិភ័យដោយសារសកម្មភាពនិន្នាការពារនិយមកើនឡើង ហើយធ្វើឱ្យអាជីវកម្មផ្សេងៗកាន់តែប្រឈមគ្រោះថ្នាក់ និងទាមទារការប្រយ័ត្នប្រយែងកាន់តែខ្លាំង៕
