សមាជិកសភារបស់សហរដ្ឋអាមេរិកនឹងបើកការពិភាក្សាមួយនៅថ្ងៃទី២១ខែតុលាខាងមុខនេះ ពាក់ព័ន្ធជាមួយវិធានការមួយចំនួនលើដំណើរការប្រជាធិបតេយ្យ និងការធ្វើពាណិជ្ជកម្មរបស់កម្ពុជា។
តាមសេចក្ដីប្រកាសព័ត៌មានកាលពីម្សិលមិញគឺកិច្ចពិភាក្សានៅថ្ងៃទី២១នោះ ផ្តោតលើការអនុវត្តសន្ធិសញ្ញាទីក្រុងប៉ារីស២៣ តុលា ឆ្នាំ១៩៩១។ ការពិភាក្សាក៏មានការលើកឡើងពីដំណើរការប្រជាធិបតេយ្យ និងការគោរពសិទ្ធិមនុស្ស ហើយពាក់ព័ន្ធដល់ការធ្វើពាណិជ្ជកម្មផង។
សេចក្តីប្រកាសព័ត៌មាន៖ « ការពិភាក្សានេះក៏នឹងពិនិត្យលើវិធានការធ្វើពាណិជ្ជកម្ម និងលទ្ធិប្រជាធិបតេយ្យនៅកម្ពុជា។ ចំណុចទាំងពីរនេះ សភាអាចមានឥទ្ធិពលក្នុងការរុញឱ្យរបបលោក ហ៊ុន សែន ដែលបានប្រព្រឹត្តិខុសកន្លងមកកែតម្រូវវិញ»
ក្នុងសេចក្ដីប្រកាស សមាជិកសភាអាម៉េរិករូបនេះ ក៏បានបញ្ជាក់ថា រដ្ឋាភិបាលកម្ពុជាបច្ចុប្បន្នមិនគោរពលើខ្លឹមសារសន្ធិសញ្ញាទីក្រុងប៉ារីស ដែលតម្រូវឱ្យកម្ពុជាដំណើរការតាមបែបលទ្ធិប្រជាធិបតេយ្យសេរី ពហុបក្សនោះទេ។
សមាជិកសភាសហរដ្ឋអាមេរិករូបនេះ តែងតែងរិះគន់ការដឹកនាំរបស់លោកនាយករដ្ឋមន្ត្រី ហ៊ុន សែន ពាក់ព័ន្ធការរំលោភសិទ្ធិមនុស្ស និងការរំលាយគណបក្សប្រឆាំងជាដើម។
ទោះយ៉ាង លោកនាយករដ្ឋមន្ត្រី ហ៊ុន សែន ក៏ដូចជា មន្ត្រីរដ្ឋាភិបាលផ្សេងទៀតធ្លាប់អះអាងជាញឹកញាប់ថា កម្ពុជាមានការគោរពសិទ្ធិមនុស្សពេញលេញ និងបើកឱ្យគ្រប់គណបក្សនយោបាយធ្វើសកម្មភាពដោយសេរី។ ចំពោះវិធានការលើគណបក្សសង្គ្រោះជាតិនោះគឺថា ជាការអនុវត្តច្បាប់ព្រោះ គណបក្សប្រឆាំងនេះមានផែនការផ្តួលរំលំរដ្ឋាភិបាលស្របច្បាប់។
