យុវជនចលនាមាតាធម្មជាតិ ប្តេជ្ញាដើរឱ្យដល់ក្រុងព្រះសីហនុ បើទោះជាត្រូវជួបឧបសគ្គអ្វីក៏ដោយ ដើម្បីសម្រេចបំណងរបស់ពួកគេក្នុងការទាមទារឱ្យអាជ្ញាធរខេត្តជាប់មាត់សមុទ្រមួយនេះរុះរើសំណង់កាស៊ីណូចិនខុសច្បាប់មួយនៅកោះរ៉ុងសន្លឹម។
យុវជនចលនាមាតាធម្មជាតិ កំពុងធ្វើធម្មយាត្រាថ្មើរជើងពីរាជធានីភ្នំពេញទៅក្រុងព្រះសីហនុដោយប្រើរយៈពេល១០ថ្ងៃ(ចាប់ពីថ្ងៃទី១៥ ដល់២៥ ខែតុលា) ដើម្បីទាមទារឱ្យអាជ្ញាធរខេត្តចុះរុះរើសំណង់កាស៊ីណូចិន ជីន ទីង ដែលសង់ឡើងរំលោភលើដីឆ្នេរ និងបង្កផលប៉ះពាល់ដល់បរិស្ថាន។
ធម្មយាត្រាក្រុមយុវជននេះ ធ្វើឡើងក្រោយពីពួកគេបានដាក់ញ្ញាតិទៅអភិបាលខេត្តព្រះសីហនុ លោក គួច ចំរើន នៅថ្ងៃទី២៣កញ្ញាកន្លងទៅ ដើម្បីទាមទារឱ្យអាជ្ញាធរចាត់វិធានការច្បាប់ ចុះរុះរើសំណង់កាស៊ីណូចិន ជីន ទីង ស្ថិតនៅភូមិកោះរ៉ុងសន្លឹម សង្កាត់កោះរ៉ុងសន្លឹម ក្រុងព្រះសីហនុ។
យុវជនចលនាមាតាធម្មជាតិ កញ្ញា ឡុង គន្ធា បានលើកឡើងថា ក្រុមកញ្ញាបានជួបបញ្ហាមិនអាចស្វែងរកវត្តស្នាក់ពេលយប់បាន ហើយមានព្រះសង្ឃ១អង្គមានអាពាធ និងយុវជនជានារីម្នាក់ពងជើង តែយ៉ាងណាកញ្ញាអះអាងថា ក្រុមកញ្ញានឹងមិនរាថយឡើយ។
កញ្ញា ឡុង គន្ធា ប្រាប់ វីអូឌី តាមទូរសព្ទថា៖«ពួកខ្ញុំគឺប្តេជ្ញាថានឹងត្រូវទៅឱ្យដល់ក្រុងព្រះសីហនុទោះជាមានឧបសគ្គប៉ុនណាក៏ដោយ គឺយើងត្រូវទៅឱ្យដល់។ […] មកដល់ពេលហ្នឹងមាន៧នាក់ដដែល អ្នកដែលធ្វើដំណើរថ្មើរជើងហ្នឹងមាន៤អង្គ-នាក់ ដែលព្រះសង្ឃ១អង្គ ហើយយុវជនយើង៣នាក់ ជាស្រ្តី២នាក់ ហើយព្រះសង្ឃ១អង្គទៀតដែលអាពាធ ព្រះអង្គបានធូរស្បើយហើយ។ ប៉ុន្តែយើងអត់ទាន់ហ៊ានឱ្យព្រះអង្កនិមន្តខ្លាចព្រះអង្គលាប់ជំងឺវិញ»។
យុវជនចលនាមាតាធម្មជាតិ លោក ហ៊ុន វណ្ណៈ ឱ្យដឹងបន្ថែមថា ក្រុមរបស់លោកជួបបញ្ហាលំបាកបំផុតក្នុងការស្វែងរកកន្លែងស្នាក់អាស្រ័យពេលយប់ចាប់ពីថ្ងៃធ្វើធម្មយាត្រារយៈពេល៤ថ្ងៃមកនេះ។
លោក វណ្ណៈ និយាយថា៖«យើងសុំវត្តទី១ គឺវត្តចំបក់ហ្នឹងគឺគេបិទទ្វារអត់ឱ្យយើងចូលទេ។ ហើយក៏បានសួរនាំនេនតូចដែលចាំបិទទ្វារហ្នឹងក៏គាត់ថា រាល់ដងគឺអត់ដែលបិទទ្វារទេ ទើបតែថ្ងៃហ្នឹងគឺខាងលើគេប្រាប់ថា ចៅអធិការប្រាប់ថា ឱ្យបិទទ្វារទៅព្រោះខ្លាចមានគេហែចូល។ បន្ទាប់មកក៏យើងព្យាយាមសុំវត្តទី២វត្តធម្មយុតនៅគៀកគ្នាដែរ ក៏ព្រះអង្គគុណម្ចាស់នៅវត្តហ្នឹងក៏បានប្រាប់ថាគាត់ចង់ ចង់អនុញ្ញាតឱ្យយើងស្នាក់នៅព្រោះវត្តសម្រាប់ព្រះសង្ឃ ជាពិសេសគឺស្វាគមន៍ព្រះសង្ឃដែលដើរធម្មយាត្រាដើម្បីសង្គមដើម្បីជាតិហ្នឹងដែរ តែគាត់អត់មានជម្រើសទេ»។
ប្រធានបណ្តាញយុវជនកម្ពុជា លោក ទឹម ម៉ាឡៃ ដែលបានតាមដានធម្មយាត្រាក្រុមយុវជនចលនាមាតាធម្មជាតិ លើកឡើងថា រាល់សកម្មភាពរបស់ក្រុមយុវជនដើម្បីទាមទាររកដំណោះស្រាយចំពោះផលប៉ះពាល់បរិស្ថាន គួរតែត្រូវបានលើកទឹកចិត្ត។
លោក ម៉ាឡៃ មានប្រសាសន៍ថា៖«ក្នុងសង្គមរបស់យើង ឬក៏នៅក្នុងប្រទេសផ្សេងទៀត ជាប្រទេសដែលគេចង់ឱ្យមានការលើកកម្ពស់ការអនុវត្តនូវសិទ្ធិគេក៏ការលើកទឹកចិត្តយុវជនក្នុងការការពារបរិស្ថានបែបនេះ ខ្ញុំយល់ថា ត្រូវបានគាំទ្រ ត្រូវបានសាទរ។ ហើយគួរយុវជនផ្សេងទៀតដែលជាអ្នកស្រលាញ់ហ្នឹងបន្តការគាំទ្រ ហើយជាពិសេសពីរដ្ឋាភិបាលផងដែរ»។
ឆ្លើយតបទៅនឹងការទាមទាររបស់ក្រុមយុវជន អ្នកនាំពាក្យរដ្ឋបាលសាលាខេត្តព្រះសីហនុ លោក ឃាង ភារម្យ បានប្រាប់ វីអូឌី កាលពីថ្ងៃពុធថា អាជ្ញាធរខេត្តបាននិងកំពុងដំណើរការនីតិវិធីទៅលើសំណង់អាគារកាស៊ីណូចិន ជីន ទីង នោះហើយ ពោលគឺ រដ្ឋបាលខេត្តមិនមែននៅស្ងៀមនោះទេ។
លោក ឃាង ភារម្យ មានប្រសាសន៍ថា៖«(ញ្ញត្តិ)ក្រុមយុវជនមាតាធម្មជាតិ រដ្ឋបាលខេត្តបានទទួលហើយ ហើយក្នុងនោះក៏មានចំណារពីអភិបាលខេត្តដែរ។ លោកបានចារនៅលើនោះ ថានឹងចាត់ការតាមនីតិវិធី ហើយបើញ្ញាតិដាក់ហើយ លោកនៅតែបន្តធ្វើព្យុះហយាត្រាអ្វីរបស់លោកនោះ អាហ្នឹងជារឿងរបស់លោកមួយទៀត ប៉ុន្តែ អាជ្ញាធរខេត្តលោកបាននិងកំពុងតែធ្វើការងារហ្នឹងហើយ»។
កាលពីខែឧសភា អាជ្ញាធរខេត្តព្រះសីហនុ រួមមានក្រុមការងារចម្រុះ និងព្រះរាជអាជ្ញាផង បានចេញដីកា និងចុះទៅបង្ខំបិទកាស៊ីណូខុសច្បាប់ខាងលើ បន្ទាប់ពីរដ្ឋបាលខេត្តបានចេញសេចក្តីជូនដំណឹងឱ្យបិទ២លើកហើយមិនមានប្រសិទ្ធភាព៕
