មន្ត្រីជាន់ខ្ពស់រដ្ឋាភិបាលកម្ពុជា និង តួកគី បានប្តេជ្ញាពង្រឹងកិច្ចសហប្រតិបត្តិការសេដ្ឋកិច្ច ពាណិជ្ជកម្ម វិនិយោគ និងវិស័យសក្តានុពលពាក់ព័ន្ធដទៃទៀត ក្នុងគោលបំណងបង្កើនទំហំពាណិជ្ជកម្មរវាងប្រទេសទាំងពីរឱ្យឈានដល់ ១០០០លានដុល្លារអាមេរិកនាពេលពេលអនាគត។
យោងតាមទំព័រហ្វេសប៊ុករបស់ក្រសួងពាណិជ្ជកម្មកាលពីថ្ងៃម្សិលមិញ ឱ្យដឹងថាការប្តេជ្ញានេះ ធ្វើឡើងរវាងរដ្ឋមន្ត្រីក្រសួងពាណិជ្ជកម្មកម្ពុជា លោក ប៉ាន សូរស័ក្តិ ជាមួយរដ្ឋមន្រ្តីក្រសួងកសិកម្ម និងរុក្ខាប្រមាញ់ នៃសាធារណរដ្ឋតួកគីលោក បេគៀរ ប៉ាកដឺមៀលី (Bekir Pakdemirli) ក្នុងកិច្ចប្រជុំលើកទី២ នៃគណៈកម្មការសេដ្ឋកិច្ចចម្រុះរវាងមន្ត្រីជាន់ខ្ពស់ព្រះរាជាណាចក្រកម្ពុជា និងសាធារណរដ្ឋតួកគី កាលពីថ្ងៃទី១៧-១៨ ខែតុលា ឆ្នាំ២០១៩ នៅទីក្រុងអង់ការ៉ាប្រទេសតួកគី។
យោងតាមប្រភពដដែលនេះឲ្យដឹងថា ដោយគិតចាប់តាំងពីឆ្នាំ ២០១៤ រហូតដល់ឆ្នាំ២០១៨ ទំហំពាណិជ្ជកម្មកម្ពុជា-តួកគី មានចំនួនប្រមាណ ៥១០ លានដុល្លារអាមេរិកប៉ុណ្ណោះ។ កម្ពុជានាំចេញទៅកាន់ប្រទេសតួកគីមានទំហំទឹកប្រាក់ជាង ៤៣៧ លានដុល្លារអាមេរិក និងនាំចូលពីតួកគីមានទឹកប្រាក់ជាង ៧២ លានដុល្លារអាមេរិក។
លោក ប៉ាន សូរសក្តិ ត្រូវបានដកស្រង់សំដីមកថា កម្ពុជាទំនិញដែលមានសក្តានុពលក្នុងការនាំចេញទៅកាន់ប្រទេសតួកគី រួមាន៖ សំលៀកបំពាក់ កង់ ស្វាយ មៀន កៅស៊ូ ដំឡូងមី ពោត ម្រេច និងអង្ករ ។ល»។
កាលពីថ្ងៃទី១៤ តុលា ឆ្នាំ២០១៩ សមត្ថកិច្ចកម្ពុជានិងតួកគី បានសហការគ្នាចាប់ខ្លួនបុរសជនជាតិតួកគីម្នាក់គឺលោក Osman Karaca ជាអតីតនាយកសាលាអន្តរជាតិហ្សាម៉ាន់ បច្ចុប្បន្នប្តូរមកជាសាលាអន្តរជាតិផារ៉ាហ្គន់ បញ្ជូនទៅតួកគីតាមសំណើរបស់រដ្ឋាភិបាលតួកគីកន្លងមក។
ទីភ្នាក់ងារព័ត៌មានរ៉យទ័រ(Reuters)ដែលបានចុះផ្សាយរឿងនេះ សរសេរថា ទីភ្នាក់ងារស៊ើបការណ៍សម្ងាត់របស់តួកគីបានចាប់ខ្លួនលោក Osman Karaca សញ្ជាតិម៉ិកស៊ិកដើមកំណើតតួកគីពីប្រទេសកម្ពុជា ហើយនាំទៅឃុំខ្លួននៅប្រទេសតួកគី ក្រោមបទចោទ បង្កើតនិងរៀបចំផែនការធ្វើរដ្ឋប្រហារ កាលពីឆ្នាំ២០១៦ជាមួយបណ្ដាញភេរវកម្មមួយ ដឹកនាំដោយលោក Fethullha Gulen ដែលកំពុងនិរទេសខ្លួននៅសហរដ្ឋអាមេរិក ៕