តុលាការកំពូលនៅថ្ងៃនេះ សម្រេចច្រានចោលបណ្ដឹងសុំនៅក្រៅឃុំរបស់អតីតអ្នកបកប្រែទូរទស្សន៍រុស្ស៊ី RT រឿង«ម្ដាយខ្ញុំលក់ខ្ញុំ» លោករ៉ាត់ រ័ត្នមុន្នី ។
ក្នុងសាលាសវនាការនៅតុលាការកំពូលកាលព្រឹកមិញចៅក្រមជំនុំជម្រះនៃតុលាការកំពូល បានប្រកាសរក្សាការសម្រេចរបស់សាលាឧទ្ធរណ៍ទុកជាបានការ ដោយមិនអនុញ្ញាតឱ្យលោក រ៉ាត់ រ័ត្នមុន្នី បាននៅក្រៅឃុំជាបណ្ដោះអាសន្ននោះឡើយ។
មេធាវីការពារក្ដីឱ្យលោក រ័ត្នមុន្នី លោក សំ ទិត្យសីហា មានប្រសាសន៍ថាវាគឺជាប្រការគួរឱ្យសោកស្ដាយចំពោះកូនក្ដីលោកនិងក្រុមគ្រួសារ។លោកបញ្ជាក់ថា លោកនឹងស្នើកាន់សាលាឧទ្ធរណ៍ដើម្បីពន្លឿនសវនាការអង្គសេចក្ដីឱ្យបានឆាប់ ខណៈដែលកូនក្ដីលោកជាប់គុកអស់ជាង៨ខែមកហើយនោះ។
លោក សំ ទិត្យសីហា មានប្រសាសន៍ថា៖ «វាពិតជាលំបាកសម្រាប់កូនក្ដីខ្ញុំ ខ្ញុំពិតជាសោកស្តាយណាស់ដែលតុលាការសម្រេចបែបនេះក្នុងនាមជាមេធាវីខ្ញុំនឹងខិតខំបន្តទៀតដើម្បីរកយុត្តិធម៌ឱ្យកូនក្ដីខ្ញុំ»។
ភរិយារបស់លោក រ៉ាត់ រ័ត្នមុនី គឺអ្នកស្រី ឡុង គីមហ៊ាង ថ្លែងថាការសម្រេចនេះពិតជាអយុត្តិធម៌ចំពោះប្ដីគាត់ណាស់។
អ្នកស្រីសរសេរក្នុងន័យដើមថា ៖« ពលរដ្ឋខែ្មរយើងជាច្រើន ពេលនេះ ក៏កំពុងព្រាត់ប្រាស់គ្រួសារ សាច់ញាតិ និងកំពុងរងភាពអយុត្តិធម៌ដូចពួកយើង ដោយសារតែតុលាការកម្ពុជា»។
លោក រ៉ាត់ រត្នមុនី ត្រូវបានសាលាដំបូងរាជធានីភ្នំពេញសម្រេចផ្ដន្ទាទោសកាលពីថ្ងៃទី២៦ ខែមិថុនា ឆ្នាំ២០១៩ ឱ្យជាប់ពន្ធនាគារ ២ឆ្នាំ ក្រោមបទចោទថា បាន «ញុះញង់ឱ្យមានការរើសអើង»។ លោកត្រូវបានចាប់ខ្លួនដោយប៉ូលីសថៃនៅក្នុងទីក្រុងបាងកកកាលពីថ្ងៃទី៧ ខែធ្នូ ឆ្នាំ២០១៨ ខណៈលោកព្យាយាមសុំសិទ្ធិជ្រកកោននៅឯការិយាល័យសុំទិដ្ឋាការទៅប្រទេសហូឡង់នៅប្រទេសថៃ។ ក្រុមគ្រួសាររបស់លោក បានសុំអន្តរាគមន៍ជាច្រើនដងច្រើនសារទៅកាន់ស្ថានទូតរុស្ស៊ីប្រចាំនៅកម្ពុជា ប៉ុន្តែមិនមានចម្លើយតបឡើយ៕









