តុលាការកំពូលចេញដីការបង្គាប់ឱ្យនាយទាហាន៣នាក់ ដែលបានប្រើហិង្សាវាយលើអតីតំណាងរាស្ត្របក្សប្រឆាំង២រូបកាលពីឆ្នាំ២០១៥ឱ្យសងសំណងរដ្ឋវប្បវេណីសរុប១០០លានរៀល។ ដីការសម្រេចត្រូវបានតុលាការប្រកាសនៅព្រឹកថ្ងៃទី២៨ខែតុលា ឆ្នាំ២០១៩នេះ។
មេធាវីការពារក្ដីតំណាងរាស្ត្រទាំងពីរនិងជាតំណាងដើមបណ្ដឹងរដ្ឋប្បវេណី លោកកែត ឃី មានប្រសាសន៍ថាការសម្រេចនេះធ្វើឱ្យកូនក្ដីលោកមិនអស់ចិត្តទេ ហើយនេះជាឆន្ទានុសិទ្ធិរបស់តុលាការដែលបិទផ្លូវតវ៉ា។
លោកមេធាវី កែត ឃី មានប្រសាសន៍ថា៖ ថ្ងៃនេះឃើញតុលាការកំពូលគាត់តម្លើងសំណងឱ្យកូនក្ដីខ្ញុំពី ពី៤០លានរៀលមក៥០លានរៀលវិញ វាឡើងបានតិចតួច ប៉ុន្តែយើងអស់ការតវ៉ាត្រឹមហ្នឹងហើយ។តើសំណងនេះសមនឹងព្យាសកម្មឬទេ? នៅតែមិនសមអ៊ីចឹងតែយើងអស់ផ្លូវតវ៉ា យើងមានតែយកសាលដីកាហ្នឹងទៅសុំឱ្យសមត្ថកិច្ចអនុវត្តសាលដីកាហ្នឹង។
លោក កែតឃី បន្ថែមថា គ្រប់ដំណាក់កាលសវនាការទាមទារសំណងរដ្ឋប្បវេណីបន្ថែមនេះ ភាគីខាងជនជាប់ចោទមិនដែលចូលខ្លួនមកបំភ្លឺក្នុងតុលាការឡើយ ហើយសូម្បីតែមេធាវីក៏មិនមានវត្តមានដែរ។
កាលពីជាង៤ឆ្នាំមុន គឺនៅថ្ងៃទី២៦ខែតុលាឆ្នាំ២០១៥ អ្នកតំណាងរាស្ត្រមណ្ឌលខេត្តស្វាយរៀង លោក គង់ សភា និង អ្នកតំណាងរាស្ត្រមណ្ឌលខេត្តកំពង់ចាមលោក ញ៉យ ចំរើន មកពីអតីតគណបក្សសង្គ្រោះជាតិ ត្រូវបានក្រុមបាតុករព្រួតគ្នាវាយឲ្យរងរបួសធ្ងន់ធ្ងរនៅក្បែររបងរដ្ឋសភាជាតិ ។ កាលណោះ លោក គង់ សភា បានរងរបួសបាក់ឆ្អឹងខ្ទង់ច្រមុះ និងរហែកក្រដាសត្រចៀក ដែលត្រូវតែវះកាត់ជាបន្ទាន់។ ចំណែកឯលោក ញ៉យ ចំរើន បានរងរបួស បាក់ឆ្អឹងកដៃខាងស្ដាំ និងបាក់ឆ្អឹងរង្វង់ភ្នែកខាងស្ដាំ ដែលត្រូវឆ្លងកាត់ការវះកាត់ដូចគ្នា។
បន្ទាប់ពីកើតមានហេតុការណ៍វាយតំណាងរាស្ត្ររួចមក លោកនាយករដ្ឋមន្ត្រីហ៊ុន សែន បានចេញបញ្ជាឱ្យសមត្ថកិច្ចចាប់ខ្លួនជនសង្ស័យប៉ុន្តែបុរសបីនាក់ ដែលស្ថិតក្នុងវីដេអូវាយតំណាងរាស្ត្រនោះបានចេញមុខមកសារភាព។ យោធិន៣រូបរួមមាន លោក ចាយ សារិទ្ធ លោកម៉ៅ ហឿន និងលោកសុត វណ្ណនី បានចេញមកសារភាពទទួលកំហុស។ បន្ទាប់ពីនោះមកបុរសទាំងបីត្រូវបានសមត្ថកិច្ចបញ្ជូនដាក់ពន្ធនាគារ ។ ឆ្លងកាត់សវនាការអង្គសេចក្ដីរួចមក តុលាការរាជធានីភ្នំពេញនៅថ្ងៃទី២៦ខែឧសភាឆ្នាំ២០១៦បានចេញសាលក្រមផ្តន្ទាទោសពួកគេទាំងបីនាក់ ឲ្យជាប់ពន្ធនាគារ៤ឆ្នាំ តែអនុវត្តទោសតែ១ឆ្នាំនិង ៣ឆ្នាំទៀត ត្រូវព្យួរ ក្នុងបទចោទ «ប្រើអំពើហិង្សាដោយចេតនាមានស្ថានទម្ងន់ទោស» ហើយ សាលក្រម ក៏បានកំណត់ឲ្យពិរុទ្ធជនទាំងនោះ បង់ប្រាក់ចូលរដ្ឋ (ផ្នែកព្រហ្មទណ្ឌ) ចំនួន៦លានរៀល ក្នុងម្នាក់ៗ ហើយផ្តល់សំណងរួមគ្នា (ផ្នែករដ្ឋប្បវេណី) ចំនួន៨០លានរៀល ជូនលោក គង់ សភា និងលោក ញ៉យ ចំរើន ដែលជាជនរងគ្រោះ។
អតីតអ្នកតំណាងរាស្ត្រមណ្ឌលស្វាយរៀង លោក គង់ សភា បានសរសេរក្នុងបណ្ដាញសង្គមហ្វេសប៊ុក កាលពីថ្ងៃទី២៦ ខែតុលា ឆ្នាំ២០១៩ ចំខួបបួនឆ្នាំនៃថ្ងៃដែល បាតុករវាយរូបលោក និងលោក ញ៉យ ចំរើន ដោយលោកចាត់ទុកថា វាជាហេតុការណ៍ដែលរៀបចំតាមការបញ្ជារបស់រាជរដ្ឋាភិបាលដឹកនាំដោយលោកនាយករដ្ឋមន្ត្រីហ៊ុនសែន ។
លោកសរសេរក្នុងន័យដើមថា ៖បើរបបយង់ឃ្នងដូចខ្មែរក្រហមនេះនៅដឹកនាំជាតិ នោះប្រជាពលរដ្ឋខ្មែរទាំងអស់និងក្លាយជាជនរងគ្រោះ ដោយសារប្រព័ន្ធយុត្តិធម៌របស់ជនផ្តាច់ការមិនបានផ្តល់ពន្លឺនៃយុត្តធម៌។
ទោះជាយ៉ាងណាក្ដី អ្នកនាំពាក្យគណបក្សប្រជាជនកម្ពុជា លោក សុខ ឥសាន្ត បានបដិសេធនិងថាជាការចោទប្រកាន់ដោយគ្មានភស្តុតាងនេះ ដោយលោកបង្វែរសំណួរសួរទៅកាន់ក្រសួងយុត្តិធម៌វិញ។
អនុក្រឹត្យមួយដែលចុះកាលបរិច្ឆេទនៅថ្ងៃទី១៧ ខែវិច្ឆិកា ឆ្នាំ២០១៦ បានដំឡើងឋានន្តរសក្ដិដល់យោធិនដែលជាពិរុទ្ធជនវាយតំណាងរាស្ត្រទាំងបីនាក់នោះទៀតផង ។ លោក សុត វណ្ណី និងលោក ម៉ៅ ហឿន ត្រូវតម្លើងពីវរសេនីយ៍ទោទៅជាវរសេនីយ៍ឯក ចំណែកលោក ចាយ សារិទ្ធ ត្រូវបានដំឡើងពីវរសេនីយ៍ឯកទៅជាឧត្ដមសេនីយ៍ផ្កាយ១ នៃបញ្ជាការដ្ឋានអង្គរក្ស៕
