អាជ្ញាធរខេត្តព្រះសីហនុអះអាងថាខ្លួនបានរកឃើញសាកសពស្ត្រីជនជាតិអង់គ្លេសម្នាក់ដែលបាត់ខ្លួននៅកោះរ៉ុងកាលពីថ្ងៃទី២៤ ខែតុលានោះហើយនៅរសៀលថ្ងៃនេះ។
អ្នកនាំពាក្យសាលាខេត្តព្រះសីហនុលោក ឃាង ភារម្យ ប្រាប់វីអូឌីថា ស្ត្រីជាជនជាតិអង់គ្លេសដែលមានឈ្នោះ Amelia Bambridgeត្រូវបានកម្លាំងសមត្ថកិច្ចចម្រុះប្រទះឃើញសាកសពអណ្តែតលើផ្ទៃសមុទ្រនៅត្រង់ចំណុចកោះឆ្លាមក្បែរព្រំដែនសមុទ្រកម្ពុជា-ថៃ។
លោកបន្ថែមថា៖«បាទហ្នឹងហើយ ត្រឹមត្រូវហើយយើងបានរកឃើញហើយសពរបស់គាត់»។
នាយប៉ុស្តិ៍នគរបាលសង្កាត់កោះរ៉ុងលោក យិត ណែមសូទី បញ្ជាក់បន្ថែមថាសាកសពដែលរកឃើញនោះពិតជាសាកសពរបស់ស្ត្រីជនជាតិអង់គ្លេសដែលបាត់ខ្លួនពិតមែនដោយលោកថា សំអាង និងកំណត់សំគាល់ទៅលើស្នាមសាក់នៅលើដៃរបស់នាង។
ប៉ុន្តែយ៉ាងណាអាជ្ញាធរទាំងពីរនាក់នេះមិនទាន់អាចបញ្ចាក់ពីមូលហេតុដែលបណ្តាលឲ្យជនរងគ្រោះស្លាប់នៅឡើយរហូតមកដល់៦ល្ងាចថ្ងៃទី៣១ តុលានេះ។
រដ្ឋបាលខេត្តព្រះសីហនុបានឲ្យដឹងថា ស្ត្រីជនជាតិអង់គ្លេសឈ្មោះ Amelia Bambridge កើតថ្ងៃទី១៤ ខែកក្កដា ឆ្នាំ១៩៩៨ កាន់លិខិតឆ្លងដែនលេខ ៥៣១៨៩០៨៣៣ បានចេញពីក្រុងព្រះសីហនុទៅកោះរ៉ុង កាលពីវេលាម៉ោង៥ល្ងាចថ្ងៃទី ១៩ ខែតុលា ឆ្នាំ២០១៩ ហើយទៅដល់កោះរ៉ុងនៅម៉ោង៦ល្ងាច។ មុនបាត់ខ្លួនជនរងគ្រោះរូបនេះបានចូលស្នាក់នៅផ្ទះសំណាក់ Ness Beach នៅម៉ោង៨:១៥នាទីយប់ ថ្ងៃខែឆ្នាំដដែលក្នុងគោលបំណងទេសចរណ៍។
អភិបាលក្រុងកោះរ៉ុង លោក នួន ប៊ុនថុល បានប្រាប់វីអូឌីនៅរសៀលថ្ងៃនេះថា នារីឈ្មោះ Amelia Bambridge បានបាត់ខ្លួនចាប់តាំងពីវេលាម៉ោង ៣ទៀបភ្លឺព្រឹកថ្ងៃទី២៤ ខែតុលា បន្ទាប់ពីគាត់បានជួបជុំរីករាយជាមួយមិត្តភក្តិរបស់គាត់ជាជនជាតិបរទេសនៅឯរមណីយដ្ឋានមួយស្ថិតនៅភូមិកោះតូច នៅលើកោះរ៉ុងនេះ៕
