រដ្ឋសភាជាតិនៅថ្ងៃនេះ បានអនុម័តសេចក្តីព្រៀងច្បាប់ស្តីពីការអនុម័តយល់ព្រមលើសន្ធិសញ្ញាបំពេញបន្ថែមក្នុងការកំណត់ព្រំដែនរដ្ឋ រវាងកម្ពុជា និងវៀតណាម។
សេចក្តីព្រៀងច្បាប់នេះ ធ្វើឡើងដើម្បីអនុម័តទទួលស្គាល់លើសន្ធិសញ្ញាបំពេញបន្ថែមថ្មី ឆ្នាំ២០១៩ ដែលបានចុះហត្ថលេខារួមគ្នារវាងលោកនាយករដ្ឋមន្រ្តី ហ៊ុន សែន និងនាយករដ្ឋមន្រ្តីវៀតណាម លោក ង្វៀន សួនហ្វ៊ុក ទទួលស្គាល់បង្គោលព្រំដែនគោកចំនួន៨៤ភាគរយ កាលពីដើមខែតុលា។
យោងតាមសេចក្តីថ្លែងហេតុចេញដោយរដ្ឋាភិបាលចុះថ្ងៃទី១ ខែវិច្ឆិកា ឆ្នាំ២០១៩ បញ្ជាក់ថា សេចក្តីព្រៀងច្បាប់នោះ គឺធ្វើឡើងដោយផ្អែកលើមូលដ្ឋាននៃសន្ធិសញ្ញាបំពេញបន្ថែមលើសន្ធិសញ្ញាកំណត់ព្រំដែនរដ្ឋឆ្នាំ១៩៨៥ និងសន្ធិសញ្ញាបំពេញបន្ថែមឆ្នាំ២០០៥ រវាងប្រទេសកម្ពុជា និងប្រទេសវៀតណាម ហើយត្រូវបានសភាអនុម័តយល់ព្រមនៅព្រឹកមិញនេះ ដោយសំឡេងគាំទ្រ១១០លើ១១០។
សេចក្តីព្រៀងច្បាប់នេះដែរ គឺមានចំនួ៣មាត្រា ក្នុងនោះមាត្រា១ចែងពីការអនុម័តយល់ព្រមលើសន្ធិសញ្ញាបំពេញបន្ថែមលើសន្ធិសញ្ញាកំណត់ព្រំដែនរដ្ឋឆ្នាំ១៩៨៥ និងសន្ធិសញ្ញាបំពេញបន្ថែមឆ្នាំ២០០៥ រវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម ដែលបានចុះហត្ថលេខានៅរដ្ឋធានីហាណូយនៃសាធារណរដ្ឋសង្គមនិយមវៀតណាម នាថ្ងៃទី៥ ខែតុលា ឆ្នាំ២០១៩។ ដោយឡែកមាត្រា២ ចែងថារាជរដ្ឋាភិបាលនៃព្រះរាជាណាចក្រកម្ពុជាត្រូវបន្តរាល់នីតិវិធីដើម្បីអនុវត្តសន្ធិសញ្ញាបំពេញបន្ថែមនេះ។ ចំណែកមាត្រាចុងក្រោយ ចែងថាច្បាប់នេះត្រូវបានប្រកាសជាការប្រញាប់។
រដ្ឋមន្រ្តីការពារជាតិ លោក ទៀ បាញ់ ថ្លែងនៅក្នុងអង្គប្រជុំថា សន្ធិសញ្ញាបំពេញបន្ថែមថ្មីនេះ ធ្វើឡើងក្នុងគោលបំណងរក្សាការគ្រប់គ្រងដីធ្លីស្រែចម្ការរបស់ពលរដ្ឋប្រទេសទាំងពីរដែលពួកគេបាននិងកំពុងរស់នៅកាន់កាប់ និងកែប្រែតំបន់ព្រំដែនកម្ពុជា-វៀតណាមឱ្យទៅជាតំបន់ព្រំដែនសន្តិភាព មិត្តភាព សហប្រតិបត្តិការ និងជំនះធ្វើបញ្ចប់ការងារខណ្ឌសីមា និងបោះបង្គោលព្រំដែនគោកឱ្យបានឆាប់រវាងប្រទេសទាំងពីរ។
លោក ទៀ បាញ់ ថ្លែងបន្ថែមថា៖ «សន្ធិសញ្ញាបំពេញបន្ថែមឆ្នាំ២០១៩ នឹងត្រូវផ្តល់សច្ចាប័ន និងចូលជាធរមានបន្ទាប់ពីផ្លាស់ប្តូរលិខិតូបករណ៍សច្ចាប័ន និងធ្វើជា៣ច្បាប់ ជា៣ភាសា គឺភាសាខ្មែរ ភាសាវៀតណាម និងភាសាបារាំង។ ក្នុងករណីមានការបកស្រាយខុសគ្នា អត្ថបទជាភាសាបារាំងត្រូវយកមកធ្វើជាឯកសារគោល។ សន្ធិសញ្ញាបំពេញបន្ថែមឆ្នាំ២០១៩នេះ គឺជាឯកសារផ្លូវច្បាប់ប្រវត្តិសាស្ត្រដ៏មានសារសំខាន់បំផុតក្នុងការទទួលយកសមិទ្ធិផលនៃប្រទេសទាំង២សម្រេចបានមកដល់បច្ចុប្បន្ននោះគឺ៨៤ភាគរយ »។
នៅក្នុងសេចក្តីថ្លែងការមួយចុះថ្ងៃទី៣ ខែវិច្ឆិកាម្សិលមិញ គណបក្សប្រជាធិបតេយ្យមូលដ្ឋានបានទាមទារឱ្យរដ្ឋសភាពន្យាពេលអនុម័តលើសេចក្តីព្រៀងច្បាប់នេះ ដោយខ្លួនយល់ឃើញថា ការអនុម័តធ្វើឡើងក្នុងស្ថានភាពអ្នកនយោបាយកំពុងមានការបែកបាក់គ្នា។
អ្នកនាំពាក្យគណបក្សនេះ គឺលោក ឡឹក សុធា លើកឡើងប្រាប់ វីអូឌី នៅរសៀលថ្ងៃនេះថា លោកមានការខកចិត្តចំពោះការដែលរដ្ឋសភាមិនអើពើលើការទាមទារ និងក្តីបារម្ភរបស់ខ្លួន។
លោក ឡឹក សុធា មានប្រសាសន៍ថា៖ «ការផ្តល់សច្ចាប័នបន្ថែមទៅលើកិច្ចការព្រំដែនក្នុងកាលៈទេសៈនេះ វាជារឿងមិនល្អទាល់តែសោះ ដោយសារទី១ គឺស្ថានភាពនយោបាយនៅពេលនេះ ហាក់បីដូចជាមិនទាន់មានការបង្រួបបង្រួម ឬក៏ស្រុះស្រួលគ្នានៅឡើយ។ ហើយទី២ រដ្ឋាភិបាល និងប្រទេសជាតិដឹកនាំដោយគណបក្សតែមួយ ហើយនេះគឺជាក្តីបារម្ភរបស់យើង ដែលយើងអាចថាការផ្តល់សច្ចាប័ននៅពេលនេះ វាអាចនាំទៅដល់វិបត្តិ និងការលាបពណ៌ ការចោទប្រកាន់ហ្នឹងរឹតតែខ្លាំងក្លាជាងមុនទៀត»។
យ៉ាងណា លោកថា នឹងបន្តដាក់ញាត្តិសុំទៅព្រឹទ្ធសភា និងព្រះមហាក្សត្រធ្វើការពន្យាពេលផ្តល់សច្ចាប័ន និងឡាយព្រះហស្ថលេខាលើសេចក្តីព្រៀងច្បាប់នោះ។
អតីតតំណាងរាស្រ្តគណបក្សប្រឆាំងដែលសកម្មលើបញ្ហាព្រំដែន គឺលោក អ៊ុំ សំអាន ទាត់ចោលការអនុម័តរបស់រដ្ឋសភានៅថ្ងៃនេះ ដោយលោកចាត់ទុកថា ជាការកាត់ដីឱ្យខាងប្រទេសវៀតណាម ហើយថានឹងធ្វើការសើរើរឿងនេះឡើងវិញ នៅពេលគណបក្សរបស់លោកកាន់អំណាច។
លោក អ៊ុំ សំអាន មានប្រសាសន៍ថា៖ «ការអនុម័តថ្ងៃនេះ គឺជាការអនុម័តរបស់រដ្ឋសភា គឺជាការអនុម័តដោយខុសច្បាប់ ដោយសារអី? រដ្ឋសភាឯកបក្សហ្នឹងកើតឡើងចេញមកពីការបោះឆ្នោតក្លែងក្លាយឆ្នាំ២០១៨ ដែលរំលាយប្រជាធិបតេយ្យ ដែលរំលាយគណបក្សប្រឆាំងដ៏ធំនៅកម្ពុជា ហើយរៀបចំការបោះឆ្នោតក្លែងក្លាយ។ ដូច្នេះ ការអនុម័តរបស់រដ្ឋសភានៅថ្ងៃនេះ មិនយកជាការទេ»។
កម្ពុជា និងវៀតណាម មានព្រំដែនគោករួមគ្នាប្រវែង ១២៧០គីឡូម៉ែត្រ ដោយនាយករដ្ឋមន្រ្តីប្រទេសទាំងពីរបានចុះហត្ថលេខាទទួលស្គាល់បង្គោលព្រំដែនគោកបោះរួមចំនួន ៣១៤បង្គោល ស្មើ៨៤ភាគរយ។ នៅសល់ចំណុចមិនឯកភាពគ្នា១៦ភាគរយទៀត នឹងធ្វើបន្តបន្ទាប់ពីភាគីបារាំងផ្តល់ផែនទីចម្លងតាមមាត្រដ្ឋានបំប្លែងពីខ្នាត១លើ១០០ពាន់ មកខ្នាត១លើ៥០ពាន់ តាមកិច្ចព្រមព្រៀងកម្ពុជា និងវៀតណាម៕
