របាយការណ៍របស់រដ្ឋាភិបាលវៀតណាមបង្ហាញថា ក្នុងរយៈពេល១០ខែនៃឆ្នាំ២០១៩នេះ ទីក្រុងហាណូយទទួលបានការវិនិយោគគិតជាទឹកប្រាក់ជិត៧ប៊ីលានដុល្លារអាមេរិក ធ្វើឱ្យទីក្រុងមួយនេះទទួលបានការវិនិយោគពីក្រុមហ៊ុនបរទេសច្រើនជាងបើគេប្រៀបធៀបតំបន់ផ្សេងទូទាំងប្រទេស។
របាយការណ៍ចុះផ្សាយដោយទីភ្នាក់ងារព័ត៌មានវៀតណាមបង្ហាញថា ក្នុងរយៈពេល១០ខែនេះ ទីក្រុងហាណូយទទួលបានការវិនិយោគចំនួន៦,៨៥ប៊ីលានដុល្លារ ក្នុងនោះមានការបោះទុនវិនិយោគថ្មី និងការទិញភាគហ៊ុនបន្ថែមលើការវិនិយោគដែលកំពុងដំណើរការ។
ចំណែកតំបន់ដែលទទួលបានការវិនិយោគធំលំដាប់ទី២នៅក្នុងប្រទេសវៀតណាមក្នុងរយៈពេល១០ខែនេះគឺទីក្រុងហូជីមិញ ទទួលបានការវិនិយោគពីបរទេសចំនួន៤,៩៦ប៊ីលានដុល្លារអាមេរិក។ ក្រុមហ៊ុនបរទេសដែលបន្ថែម និងដាក់ទុនវិនិយោគថ្មីនៅក្នុងប្រទេសវៀតណាម ពិសេសក្នុងទីក្រុងហាណូយនេះ រួមមានក្រុមហ៊ុនពីជប៉ុន ហុងកុង និងក្រុមហ៊ុនរបស់ថៃជាដើម។
របាយការណ៍របស់ទីក្រុងហាណូយបង្ហាញថា ទឹកប្រាក់នៃចំនួនវិនិយោគទាំងនេះភាគច្រើនផ្តោតទៅលើតំបន់កំពុងអភិវឌ្ឍន៍ក្នុងទីក្រុង ដំណើរការឧស្សាហកម្ម ពាណិជ្ជកម្ម សេវាកម្ម ទំនាក់ទំនង និងប្រព័ន្ធព័ត៌មាន។
ដោយឡែកនៅក្នុងខែតុលានេះ ទីក្រុងហាណូយបានផ្តល់អាជ្ញាប័ណ្ណដល់ក្រុមហ៊ុនចំនួន៩១ ដែលមានគម្រោងវិនិយោគចំនួន៤៦៨លានដុល្លារ ក្នុងនោះ៧២ក្រុមហ៊ុនមកពីបរទេស និង១៩ក្រុមហ៊ុនជាក្រុមហ៊ុនសហការគ្នា។
នៅក្នុងខែតុលានោះ គម្រោងមួយឈ្មោះ«ទីក្រុងឆ្លាតវៃរបស់ទីក្រុងហាណូយ»ទទួលបានវិនិយោគច្រើនជាងគេ។ គម្រោងនេះអនុវត្តលើផ្ទៃដី២៧២ហិកតា ស្ថិតនៅតាមបណ្តោយសងខាងផ្លូវ Nhat Tan Noi Bai ចម្ងាយជាង១១គីឡូម៉ែត្រ។ គម្រោងទីក្រុងឆ្លាតវៃនេះ បែងចែកអគារជា៥ផ្នែក ដែលអនុវត្តបច្ចេកវិទ្យាអ៊ិនធឺណិត រួមទាំងភាពឆ្លាតវៃនៃការគ្រប់គ្រងថាមពល ប្រព័ន្ធមធ្យោបាយដឹកជញ្ជូន ការគ្រប់គ្រងសន្តិសុខ ប្រព័ន្ធអប់រំសេដ្ឋកិច្ច និងរបៀបនៃការរស់នៅដោយឆ្លាតវៃ។
គម្រោងថ្មីនៅក្នុងទីក្រុងហាណូយក៏មានការលើកឡើងពីការកសាងមជ្ឈមណ្ឌលហិរញ្ញវត្ថុដែលមានអគារកម្ពស់១០៨ជាន់ ដើម្បីដើរតួនាទីជាមជ្ឈមណ្ឌលហិរញ្ញវត្ថុនៅក្នុងប្រទេសវៀតណាម និងនៅតំបន់អាស៊ានទាំងមូល៕
